Sinulat ni Elvira Bongosia
Makita na online ang nagkalain-laing impormasyon kalabot sa sitwasyon sa industriya sa bugas sa nasod pinaagi sa bag-o lang nga gipagawas nga Rice Data Analytics o RiceLytics. Usa kini ka accessible nga website alang sa publiko nga gimugna sa Philippine Rice Research Institute (PhilRice).
Makita sa website ang mga datos kalabot sa rice area, production, mga ani matag ektarya, kinaiya sa mga rice farmer, kauban ang mga pamaagi ug teknolohiya nga gigamit sa pag-uma sa nasud.
Makita usab sa RiceLytics website ang status sa industriya sa bugas sa nasyonal, rehiyonal ug hangtod sa probinsyal nga lebel.
Tinguha sa Ricelytics nga pinaagi sa mga datos nga nakapatik, makatabang kini sa paghimo ug mga desisyon ug patakaran sa nagkalain-laing lebel sa gobyerno.
Sa wala pa namugna ang RiceLytics website, ang maong mga datos ginapagawas lamang pinaagi sa mga na-publish nga briefer, infographics, libro, ug slide.
Sa mga gustong makita ang mga nahisgotang datos sa RiceLytics, mahimong mobisita lamang sa www.philrice.gov.ph/ricelytics/.
