Sinulat ni Elvira Bongosia
Nanawagan sa publiko ang Malakanyang nga sundon ang minimum public health standards taliwala sa hulga sa monkeypox virus.
Matud pa ni Acting Presidential Spokesperson ug Presidential Communications Operations Office (PCOO) Kalihim Martin Andanar, dili angay magpakampante ang publiko tungod kay adunay mga kaso sa maong virus sa ubang nasud.
Gidugang pa ni Andanar nga gipangusgan na sa Department of Health (DOH) ang 4-door strategy apil na usab ang screening process sa mga border sa Pilipinas aron malikayan ang pagsulod sa monkeypox.
Una nang giklaro sa mga eksperto nga ang monkeypox virus dili kaayo delikado kong itandi sa ubang virus tungod kay naa sa 1% lamang ang fatality rate niini.
Gitumbok ni Andanar nga mahinongdanon gihapon ang pagsunod sa minimum public health standards tungod kay nagpabilin pa gihapon ang hulga sa Coronavirus disease (Covid).
Samtang sa Laging Handa Public Briefing, gisugyot ni Infectious Disease Expert Dr. Edsel Salvana nga gawas sa active surveillance, gitambag usab niini ang pagsuot ug face mask nga giingong usa sa mga epektibong paagi aron makalikay sa monkeypox.
Sa pagkakaron, nagpabiling zero o wala pay kasong monkeypox ang natala sa Pilipinas.
