Sinulat ni Elvira Bongosia
Giklaro karon sa National Vaccination Operations Center (NVOC) nga dili mandatory alang sa mga estudyanteng mosulod sa sunod nga school year ang pagpatupok ug coronavirus disease 2019 (COVID-19) vaccine.
Sa Laging Handa Public Briefing, miingon si National Vaccination Operations Center Chairperson ug Department of Health (DOH) Undersecretary Myrna Cabotaje nga paglapas sa balaod ang mandatory nga pagbakuna sa mga estudyante.
Gidugang pa niini nga dili usab kini mahimo nga himuong requirement sa mga tunghaan alang sa ilang mga estudyanteng mosulod na sa buwan sa Agosto.
Matud pa ni Cabotaje nga kinahanglan pa gihapon nga may consent o pagtugot sa mga ginikanan ug pagsugot sa bata ug dili pinugos ang paghatag ug booster dose sa mga nag- edad 12 hangtod 17 anyos.
Kini ang nakalatid sa balaod kalabot sa pagbakuna sa maong age-group.
Nagpabiling boluntaryo ug di mahimong himuong pugos ang pagpatupok ug booster-dose batok sa COVID sa mga kabataan.
Apan kong si Usec. Cabotaje ang pangutan-on, giingong gusto niyang himuong mandatory ang pagpa-booster sa mga estudyante ilabi na nga mobalik na sila sa face-to-face-classes.
Apan dili man kini mahimo mao nga ang mahimo lamang nila mao ang manawagan sa mga ginikanan nga boluntaryong dalhon ang ilang mga anak sa mga vaccination center.
