Sinulat ni Elvira Bongosia
May madawat nga dugang benepisyo ang mga solo parents sa nasud.
Kini human nahimo nang balaod niadtong Hunyo 4, 2022 ang Republic Act (RA) Number 11861 o mas giila isip Expanded Solo Parents Welfare Act, nga nag-amyenda sa pipila ka probisyon sa RA 8972.
Nakalatid sa bag-ong balaod nga aduna nay flexible work schedule ang mga solo parent employee, monthly cash subsidy alang sa minimum wage earners, ug scholarship alang kanila ug sa ilang anak.
Hatagan usab ang mga solo parent ug dugang parental leave benefits aron mabalanse ang trabaho ug responsibilidad sa ilang anak, ilabi na sa mga panghitabo diin kinahanglan ang presensya sa mga ginikanan.
Nakalatid usab sa balaod nga awtomatiko silang magbaton ug health insurance ubos sa National Health Insurance Program (NHIP) sa PhilHealth.
Ubos gihapon niining bag-ong balaod, gipalapdan ang kahulogan sa solo parent.
Ang DSWD, katambayayong ang nagkalain-laing departamento sa gobyerno, magmugna ug komprehensibong social protection services package alang sa solo parent ug mga anak niini.
Hingpit kining nahimong balaod niadtong Hunyo 4, 2022 ug mahimong epektibo 15 ka adlaw human mapatik sa mga pahayagan.
