Sinulat ni Elvira Bongosia
Nagpadayon pa karon ang pagpangdawat sa Department of Education (DepEd) sa online application alang sa Senior High School Voucher Program (SHS-VP).
Gipahibalo sa DepEd nga kinahanglang maghimo ug account sa Online Voucher Application Portal (OVAP) ang aplikante hangtod Hulyo 22, 2022 ug ang deadline usab sa pagduso sa aplikasyon taman sa Hulyo 29, 2022.
Samtang mahibaw-an ang resulta sa aplikasyon sa Agosto 22, 2022 ug ang kwalipikado sa programa mahimong kuhaon ang ilang voucher sugod sa nahisgotang petsa.
Matud pa sa DepEd nga awtomatikong kwalipikado ang mga nakakumpleto ug Grade 10 sa School Year 2021 – 2022 sa mga pampublikong tunghaan, apil na usab ang mga nakatapos sa junior high school sa mga pribadong tunghaan nga Educational Service Contracting (ESC) grantees.
Ang mga kinahanglang mo-apply sa programa mao ang mga Grade 10 completers sa mga pribadong eskwelahan nga ESC grantees.
Ang Senior High School Voucher Program usa ka programa sa gobyerno nga nagtinguhang mahatagan og tabang pinansyal ang mga estudyante sa Senior High School (SHS) pinaagi sa gitawag nga vouchers.
Gipahinumdom sa DepEd nga responsibilidad sa mga estudyante ug sa ilang ginikanan/guardian ang ilang voucher applications ug sa pagpili sa ilang Senior High School nga pagatunghaan. Sila usab ang responsable nga siguradohon nga sakto ug kumpleto ang mga dokumentong iduso sa PEAC National Secretariat pinaagi sa OVAP sa wala pa ang gitakdang deadline.
Responsibilidad usab sa aplikante ang pag-check sa resulta sa ilang aplikasyon. Ang mga estudyante nga adunay successful application pagatawagon og Qualified Voucher Recipients (QVRs).
Responsibilidad usab sa mga OVRs nga i-redeem ang ilang voucher hangtod sa Nobyembre 4, 2022.
