Sinulat ni Elvira Bongosia
Gi-awhag karon sa Department of Health (DOH) ang publiko nga hugot gihapong sundon ang health protocol batok sa Coronavirus disease (Covid) aron maprotektahan ang ilang mga kaugalingon batok sa monkeypox virus kun makasulod kini sa nasud.
Human niini, nagpagawas ang DOH ug public health advisory kalabot sa monkeypox human ideklara sa World Health Organization (WHO) niadtong Domingo, Hulyo 24, 2022 ang Covid usa ka “public health emergency of international concern”.
Matud pa sa pahayag sa DOH, sama sa pagsunod sa minimum public health standards alang sa Covid, mahimo usab kini aron mapugngan ang pagkatap sa monkeypox virus.
Apil na niini ang pagsuot ug best-fitted face mask, pagseguro sa maayong airflow, pagpabilin sa limpyong mga kamot ug ang pag-obserba sa physical distancing.
Gawas niini, gibutyag usab sa ahensya nga ang smallpox vaccine napamatud-ang “85 percent effective” sa pagpugong sa monkeypox.
Sa usa ka pahayag niadtong Hulyo 24, 2022, giingong nag-andam na ang DOH alang sa ilang monkeypox response kauban ang ilang partners human sa pagsaka sa kaso sa virus sa pipila ka nasud niadtong Mayo 2022.
Mao nga niadtong buwan sa Hunyo, may gibutang nang real time polymerase chain reaction (PCR) sa Research Institute for Tropical Medicine (RITM) aron ma-detect ang posibleng monkeypox virus cases sa nasud.
Gawas sa pagpagawas ug interim technical guidelines alang sa pagpatuman sa monkeypox surveillance, screening, management ug infection control, miingon usab ang DOH nga nagpahigayon sila ug mga online town halls ug meetings kauban ang mga health care workers, DOH regional offices ug local health officials.
