Sinulat ni Elvira Bongosia
Gimando ni Presidente Ferdinand “Bongbong” Marcos Jr. niadtong Lunes, Hulyo 25, 2022, ang pag-isyu sa 30 milyong physical cards ug 20 milyong digital IDs sa Philippine Identification System (PhilSys).
Sa iyang unang State of the Nation Address (SONA), miingon si Marcos nga ang target mao ang pag issue ug mokabat sa 92 milyon ka mga ID sunod tuig.
Giduso usab sa Pangulo ang digitalization sa tanang government records.
“The voluminous records stored in the government warehouses and archives have to be digitized,” pagtumbok pa ni Marcos Jr.
Matud pa sa Pangulo nga makatabang ang national ID aron mapadali ang mga transaksyon sa publiko sa mga ahensya sa gobyerno.
Niadtong niaging semana, nihatag ug pahayag ang Philippine Statistics Authority (PSA) nga naapud-apod na niini ang 14 milyong national IDs hangtod niadtong Hulyo 8, 2022.
Samtang gimanduan usab ni Marcos ang Department of Information and Communications Technology (DICT) nga himuon nang digitize ug tarungon ang database sa gobyerno.
Matud pa niini nga kinahanglang matag datos sa mga ahensya ug buhatan daling mahatag sa matag-usa.
