Sinulat ni Elvira Bongosia
Giklaro sa Department of the Interior and Local Government (DILG) sa mga Local Government Unit (LGU) nga sayop ang pagkumpiska sa mga lisensya sa mga motorista sa ilang mga traffic enforcer nga milapas sa balaod sa trapiko.
Matud pa sa DILG nga ang Land Transportation Office (LTO) lamang ang adunay katungod nga mohimo niini.
Sa gipagawas nga memorandum ni DILG Kalihim Benjamin Abalos Jr. nga gilagdaan niadtong Setyembre 14, 2022, ubos sa Reiteration of Pertinent Provision on Road Safety and Transportation gidili ang pagkumpiska ug lisensya sa mga local traffic enforcers.
Sa probisyon sa DILG-Department of Transportation (DOTr) Joint Memorandum Circular (JMC) No. 01, series 2008, section 3.4 diin naglatid nga mahimong mag-issue og traffic citation ticket ang mga LGUs apan ang LTO ug ilang mga deputized agents lang ang makasakmit sa mga lisensya sa pagmaneho.
Sa pagkakaron, mas daghang local traffic management units ang naka-deploy sa mga kadalanan human magpagawas ug Temporary Restraining Order (TRO) ang Korte Suprema sa pagpatuman sa No-Contact Apprehension Program (NCAP).
Imbes nga mga traffic camera, ang mga enforcer nibalik sa pisikal nga pagpanakop sa mga masayop nga motorista apan gipasidan-an ni Abalos ang gihimong sayop nga pagkumpiska sa mga liaensya sa traffic enforcer sa LGU.
Tungod niini, gimanduan sa DILG ang tanang LGU nga sundon ang ilang mga ordinansa ug patakaran sa trapiko aron masiguro nga ang ilang mga traffic management unit nagsunod sa nahisgotang probisyon sa nalatid nga JMC.
Karong gibalik ang memorandum nga gipagawas ni Abalos, angay nga sundon kini sa mga LGU tungod na usab sa dakung kahasol alang sa mga motorista nga kuhaon pa ang ilang lisensya gikan sa mga LGU.