Sinulat ni Rey Anthony Chiu
Nangandam na usab ang Commission on Elections (COMELEC) sa pagbukas sa registration alang sa Sangguniang Kabataan ug Barangay Elections (BSKE).
Ang mga makaapil niini, kadtong mga nag-edad og 15 anyos nianang adlaw sa piliay, o sa Oktubre 23, 2023, ug kadtong mga wala pa makarehistro kay naapikehan niadtong mga higayon sa pagpangrehistro.
Kini maoy gipadayag ni Eliseo Labaria, Election Supervisor ug Provincial Director sa COMELEC Bohol.
Ang pagpadayag sa COMELEC, nunot usab sa opisyal na nga pagsibog sa BSKE gikan sa Disyembre 5, 2022 niining tuiga ngadto sa Oktubre 23, 2023, subay sa lagda nga himoon ang piniliay sa katapusang semana sa Oktubre.
Daghang nagtuo nga ang kakuwang sa pundo sa COMELEC sa pagpatuman sa mga lagda alang sa luwas nga pagbotar ilabi na sa nagpadayong hulga sa Coronavirus disease (COVID), usa ka dakung rason sa panginahanglan nga ipa-oktaba ang pagbotar sa mga barangay officials ug SK.
Sa kasagarang pundo nga pahat alang sa piniliay, P10 ngadto sa P12 bilyones ang mahimong abton sa mga pagpahilunan sa dugang nga mga kinahanglanon alang sa mas luwas nga BSKE, segun pa sa mga nahipos nga taho, hinuon kini dili kompirmado sa ahensya sa piniliay.
Ang pagbalik na sa face to face classes, nakapalisud sa posisyon sa COMELEC kay daghan na nga mga classrooms nga gigamit sa klase ang angay ipahiluna na usab aron magamit sa piliay.
Dugang panalipod pa usab batok sa sakit ilabi na kay nagpadayun pa ang hulga sa COVID.
Daghan pa usab ang nagtuo nga ang pagsibug sa eleksyon, maghatag sa kagamhanan sa dyutay nga lugway aron may magamit pang pundo alang sa COVID response ug sa uban pang gikinahanglang galastohan niini.
Mao nga subay niini, giawhag na usab sa COMELEC sa Bohol ang mga kabatan-onan nga wala makaapil sa pagparehistro niadtong miaging registration nga mangandam alang sa pagbukas og usab sa pagparehistro.