DepEd, nagpahinumdom sa 5-days F2F sugod sa Nobyembre 2 

Sinulat ni Elvira Bongosia

Gisubli sa Department of Education (DepEd) nga mandatory na sugod sa umaabot Nobyembre 2, 2022 ang face-to-face classes sa mga pampublikong tunghaan sa tibuok nasod.

Apan dili sakop niini ang mga tunghaan nga nahatagan og ‘exemption’ sa regional directors sa buhatan, apil ang mga nakansela ang klase tungod sa mga kalamidad.

“All public schools across the country will be mandated to implement five days of in-person classes starting 02 November 2022,” matud pa sa gipagawas nga pahayag sa DepEd.

Kakabot niini, andam na ang mga publikong tunghaan sulod sa Tagbilaran City Division sa DepEd alang sa pagpatuman sa full face-to-face nga klase karong Nobyembre 2.

Kini ang gibutyag ni City Division Superintendent Dr. Joseph Irwin Lagura sa usa  ka interbyu sa radyo niadtong Lunes, Oktubre 17, 2022, sa Newsmakers ug Uban Pa.

Matud pa ni Lagura nga 10 sa 24 ka mga pampublikong tunghaan sa nasangpit nga dibisyon ang nagpahigayon na og face-to-face classes. Kining 10 ka mga tunghaan nag-implementar na sa tibuok face-to-face nga klase sa wala pa ang iskedyul sa Nob. 2, 2022.

Giingong andam kining mga tunghaan nga ipatuman ang hingpit nga face-to-face nga klase tungod kay wala nay mga babag sa pagbuhat niini.

Pipila sa mga tunghaan sa division nagpahigayon na ug in-person nga klase bisan sa miaging school year, pagbutyag pa ni Lagura.

Gibutyag usab sa opisyal nga adunay 2 ka shift ug ang iskedyul sa shift nagdepende sa partikular nga pagdumala sa eskwelahan. Usa ka shift sa buntag samtang ang laing shift sa hapon.

Gipasabot ni Lagura nga gikinahanglan ang pagsagop sa shifting schedule aron ma-accommodate ang tanang estudyante taliwala sa kakuwang sa mga lawak-tunghaan.