PBBM misaad ug mas maayong suports alang sa mga Pinoy scientist 

Sinulat ni Elvira Bongosia

Si Presidente Ferdinand “Bongbong” Marcos Jr. misaad nga hingpit nga suportahan ang mga Pilipinong siyentipiko nga nagpasiugda sa ilang mahinungdanon nga papel sa pag-ayo sa ekonomiya sa nasud ug sa pag-atubang sa mga hagit sama sa krisis sa klima kun climate change.

“You may always be assured that I and my administration will extend all support in making science and innovation an instrument of progress and prosperity for the Filipino (Mahimo kang makasalig kanunay nga ako ug ang akong administrasyon mohatag sa tanang suporta sa paghimo sa siyensya ug kabag-ohan nga instrumento sa pag-uswag ug kauswagan sa Filipino),” matud pa ni Marcos atol sa 18th Annual Balik Scientist Program (BSP) Convention sa Philippine International Convention Center sa syudad sa Pasay dili pa dugay.

Gidasig sa Pangulo ang tanang nanambong sa moang kalihokan nga magpadayon sa pagpangita alang sa daghang mga paagi aron magtrabaho sa usag usa sa paggamit sa siyensya ug kabag-ohan alang sa kaayohan sa katawhan.

Sumala pa ni Marcos, ang pandemya nagdala sa panginahanglan alang sa mga katilingban nga magbag-o.

Ang Pangulo miingon nga sa kasamtangang mga kahimtang nga nakaapekto sa nasud, ang mga Filipino scientist makatabang sa nagkalain-laing mga kabalaka, sama sa climate change mitigation ug adaptation.

Gipasiugda ni Marcos ang kritikal nga tahas sa Department of Science and Technology (DOST)—uban sa tabang sa mga miapil sa Balik Scientists—aron matubag ang perennial nga mga isyu sa nasud pinaagi sa research and development initiatives.

Matud pa sa Pangulo nga kinahanglang padayong palig-onon ang pagpatuman sa Balik Scientist Program ug mangitag paagi nga makahatag ug dugang insentibo aron madasig ang mas daghang Filipino scientist nga mobalik sa nasud ug mopaambit sa ilang kahanas.

Giingong kinahanglang hatagan ug insentibo ang mga namalik nga siyentista nga gustong mopadayon sa ilang mga karera sa lokal, nga nagpasiugda nga pinaagi sa Balik Scientist Program, mahatagan sila ug kagamitan, pasilidad, ug gikinahanglang pondo.