Dugang pamaagi pagbayad sa Bohol Light nga kuryente giluwatan
Sinulat ni Sheryl B. Paga
Maayong balita!
Ang Bohol Light mipahibalo sa dugang kabag-ohan alang sa mas sayon ug walay hasul nga pagbayad sa kuryente.
Gamit ang Gcash Application diha sa atong tagsa-tagsa ka mga mobile phone, mahimo na kitang mubayad sa atong kuryente bisan kun dili na kita muanha sa opisina sa Bohol Light.
Kini nagpasabot nga mas daghan na kita og oras para sa uban pang mga butang sa atong adlaw-adlaw nga kinabuhi.
Sa pag-gamit sa bag-ong teknolohiya, ang proseso sa pagbayad mahimong mas paspas ug mas komportable alang sa tanan.
Sayon lamang ang mga lakang niini:
Step 1: Ablihi ang GCash app ug pilia ang Bills
Step 2: Pilia ang Electric Bills
Step 3: Pangitaa ang Bohol Light Company, Inc.
Step 4: Isulod ang hustong Account Number ug Account Name sumala sa imong billing statement
Step 5: Susiha ang mga detalye sa bayad ug pilia ang Confirm
Step 6: Mabalhin ka sa usa ka pahina nga nagkumpirma sa imong malampususong transaksyon.
Mahimo usab kitang mubayad pinaagi sa mga accredited payment partners nga natala sa ubos:
Adunay mga flyers nga atong gipanghatag, aron mas mapalapdan kining atong mga pamaagi ug matubag ang dugay ra natong gihulat nga higayon nga mao ang pagbayad via online na lamang.
Nagtumong ang Bohol Light nga mas mahatagan og maayong serbisyo ang mga konsumidor pinaagi sa pagpangita og mas sayon ug dali nga mga paagi sa pagbayad sa kuryente.
Tungod niini, ang Bohol nag-awhag sa mga konsumidor sa pagbayad gamit ang atong mga Third Party Collection Agents aron malikayan ang pagpila ug paghulat ilabi na sa panahon nga tingbayad o gikan sa hatasan nga mga non-working days.
BWUI nagpadayon pagmentenar sa mga tinubdan sa tubig
Sinulat ni Victor L. Tambis
Mga tinugyanan sa BWUI padayon nga nag komponi sa PU No. 1
Sa padayon nga pagpadangat sa efficiente nga serbisyo sa panubig ngadto sa mga konsumidor, ang Bohol Water mihatag ug dakong pagtagad sa regular nga pag mentenar sa mga tinubdan sa tubig o pumping stations sa maong kompanya.
Sa labing ulahi nga kalihokan niini, gitutukan sa mga tinugyanan sa operation department ang pag rehabilitate sa pumping unit no. 1 diin nihunong kini pag-andar niadtong Marso 12, 2025 ug gibanabana nga makabalik kini pag-andar karong petsa 7 sa Abril.
Ang mga dapit nga naapektohan sa pagkadaot sa maong pumping unit mao ang Barangay Dampas, Mansasa, Bool, San Isidro, Taloto, parte sa Dao, parte sa Booy, parte sa Pob. 3, Dasitam ug Libertad sa Baclayon ug ang lungsod sa Dauis.
Kining mga lugara nakasinati sa paghinay sa supply sa tubig ug mobalik kini sa normal kon makabalik na pag-andar ang maong PU sa nahisgutang petsa.
Human makabalik pag-andar ang PU No. 1 ug agi ug pag pangandam sa umaabot nga kapistahan sa syudad sa Tagbilaran ug sa ubang mga lugar, lain na usab ang mga kalihokan nga gihan-ay sa production section aron pagsiguro nga malikayan ang unscheduled breakdown sa mga tinubdan niining mga panahona.
Gipaningkamutan sa Bohol Water nga madugangan ang mga tinubdan aron pagtubag sa nagsaka nga panginahanglan sa mga konsumidor sa tubig.
BPPO, mipalig-on sa kampanya batok sa ilegal nga droga
Sinulat ni Elvira Bongosia
Ang Philippine National Police-Bohol Provincial Police Office (BPPO), sa pakigtambayayong sa Kagamhanan sa Probinsiya sa Bohol, nagpalig-on sa ilang kampanya batok sa ilegal nga drugas pinaagi sa pagpahigayon ug Forum on Illegal Drugs sa Ceremonial Hall sa Kapitolyo niadtong Abril 2.
Ang inisyatiba nagtutok sa paghatag ug gahom sa mga PNP personnel, public information officers ug media aron mopalawom ang ilang pagsabot sa problema sa ilegal nga drugas sa lalawigan sa Bohol.
Si Provincial Public Information Officer ug hepe sa Provincial Community Affairs Development Unit, PLt. Col. Norman Nuez mitaho sa talagsaong mga nahimo sa pagkunhod sa suplay sa droga gikan sa tuig 2020 taman Enero 2025.
Adunay kinatibuk-ang 2,808 ka mga operasyon ang gihimo sa panahon, nga misangpot sa pagkadakop sa 3,110 ka mga indibidwal.
Nakumpiska usab sa mga otoridad ang 65.877.844 ka gramos sa ilegal nga drugas, nga adunay gibana-banang balor nga P447,972,215.60.
Ang lalawigan nagpadayon sa pagpa-uswag sa ilang Barangay Drug Clearing Program diin 735 ka barangay o 66.28 porsiyento ang opisyal nga nadeklarar nga drug-cleared, sukad niadtong Pebrero 2025.
Base sa gipakitang datos, 100 porsyento sa mga barangay sa lungsod sa Albuquerque, Alicia, Balilihan, Candijay, Catigbian, Garcia Hernandez, Loboc, Lila, Maribojoc, San Isidro, Trinidad, ug Sikatuna nakab-ot ang drug-free status.
Ang kalamposan sa pagkunhod sa gidaghanon sa mga barangay nga apektado sa druga tungod sa paningkamot sa kapolisan nga adunay 2,808 ka operasyon nga gihimo ug 3,100 ka indibidwal/suspek ang nasikop.
Gipa-ambit ni Nuez ang komprehensibo nga kampanya sa BPPO batok sa ilegal nga droga nga matud pa niagi ug daghang mga hugna, lakip ang Oplan Double Barrel, Double Barrel Alpha, Double Barrel: Reloaded, Dobleng Barrel: Reloaded Re-launching, PNP Campaign Plan Double Barrel Finale Version 2022, ug Anti-Illegal Drug Operations through Reinforcement and Education (ADORE).
Kini nga mga inisyatibo molungtad sa daghang mga tuig ug nahimong instrumento sa pagsumpo sa droga sa tibuok probinsya, sumala ni Nuez.
Gilusad sa PNP ang Anti-Illegal Drugs Operations through Reinforcement and Education (ADORE) isip katapusang hugna sa Oplan Double Barrel.
Sa pag-ila sa kamahinungdanon sa rehabilitasyon, ang BPPO nagpatuman ug community-based rehabilitation program, nga naghatag sa mga drug surrenderees ug mga kahinguhaan ug suporta alang sa reintegrasyon sa katilingban.
Ang BPPO subling nagpamatuod sa ilang dili matarug nga pasalig sa pagwagtang sa ilegal nga drugas ug pagsiguro sa kaluwasan sa publiko pinaagi sa padayon nga pagpatuman sa balaod, edukasyon, ug mga paningkamot sa rehabilitasyon.
Ang Philippine National Police-Bohol Provincial Police Office (PNP-BPPO), sa pakigtambayayong sa Kagamhanan sa Probinsiya sa Bohol gipakusgan ang kampanya batok sa ilegal nga drugas pinaagi sa pagpahigayon ug Forum on Illegal Drugs nga gitambongan sa PNP personnel, public information officers ug media sa Ceremonial Hall sa Provincial Capitol niadtong Abril 2, 2025. (Hulagway gikan sa PIA7-Bohol)
Bag-ong mga tractors sa DAR magpausbaw sa produktibidad sa mga ARB sa Bohol
Sinulat ni Elvira Bongosia
Mokabat sa 115 ka agrarian reform beneficiaries (ARBs) sa Bohol ang gipaabot nga mopalambo sa ilang farming efficiency ug agricultural productivity pinaagi sa bag-ong mga tractor nga gipang-apod-apod sa Department of Agrarian Reform (DAR).
Sa usa ka news release nga gipagawas niadtong Miyerkules, ang DAR miingon nga ang inisyatiba, nga kabahin sa Major Crop Block Farming Program, nagtumong sa paghatag ug modernong kagamitan sa agrikultura aron mapalambo ang abot ug panginabuhian sa mga ARB.
Si Provincial Agrarian Reform Program Officer (PARPO) Ronald Pumatong bag-o lang nagpahigayon ug makuting inspeksyon sa mga ekipo, uban ni Barangay Agrarian Reform Council chairperson Lumirane Calamba, aron maseguro nga ang mga traktora makaabot sa gikinahanglan nga mga sumbanan, pagsiguro sa kalidad ug kasaligan niini.
Matud pa ni Pumatong nga kini nga mga traktora mahinungdanon alang sa pagdugang sa produktibo sa agrikultura. Pinaagi sa pagsiguro sa ilang kalidad, ma-maximize ang ilang mga benepisyo alang sa mga ARBs.
Duha ka organisasyon sa mga mag-uuma sa Bohol – ang Mahayag Alicia Farmer’s Association Incorporated (MAFAI) sa lungsod sa Alicia nga adunay 70 ka miyembro nga ARB, ug ang San Miguel-Babag Dagohoy Farmers Incorporated (SABADAFA) sa lungsod sa Dagohoy nga adunay 45 ka miyembro nga ARB, ang nakadawat sa mga traktora.
Ang makinarya sa uma nagkantidad ug P1.447 milyon matag usa, nga mokabat sa kinatibuk-ang pohunan nga P2.894 milyon.
Ang DAR miingon nga ang mga traktora gidesinyo aron matubag ang lain-laing mga panginahanglanon sa pagpanguma, nga ang SABADAFA tractor haom alang sa upland farming ug rice cultivation, samtang ang MAFAI tractor nagsuporta sa upland, mais, ug rice farming.
Sa laing bahin, gipasiugda ni Calamba ang kamahinungdanon sa paghatod sa kasaligang makinarya ug kagamitan sa umahan (FME) ngadto sa mga mag-uuma, gipasiugda nga pinaagi sa paghatag ug dekalidad nga mga himan, ang ARBs makapauswag sa ilang kahusayan ug panginabuhian, nga makapalig-on sa sektor sa agrikultura sa nasud.
Uban niini nga inisyatiba, ang DAR nagpadayon sa paghatag-gahum sa mga ARB pinaagi sa paghatag ug modernong kagamitan sa pagpanguma, pagsiguro nga aduna silay mga galamiton nga gikinahanglan sa pagpausbaw sa produktibidad ug pagpalambo sa ilang panginabuhian, subay sa mga direktiba ni Presidente Ferdinand R. Marcos Jr.
Nadawat na sa Agrarian Reform Beneficiaries (ARBs) sa Bohol ang ilang bag-ong traktora gikan sa DAR. Kini nga inisyatiba, nga kabahin sa Major Crop Block Farming Program, nagtumong sa paghatag ug modernong kagamitan sa agrikultura aron mapalambo ang abot ug panginabuhian sa mga ARB. (Hulagway gikan sa DAR photo)
Tambag sa DPWH I Maghinay sa Canhangdon- Ubayon, Pinayagan Norte
Sinulat ni Rey Anthony Chiu
Alang sa mga motorista nga mosubay sa Tagbilaran North Road paingon sa Tubigon, magbantay ug maghinayhinay tungod sa Barangay Canhangdon sa Loon paingon sa Barangay Ubayon, kay may nagpadayon nga pagtrabaho sa karsada, matud pa sa Department of Public Works and Highways.
Matud pa ni Engr John Paul Gascon, District Engineer, subay sa Infrastructure Dissemination program sa DPWH, us aka locally funded nga proyekto nga magpalapad sa karsada sa kalapdon nga 3.35 metros sa isig ka kilid sa nasudnong dalan ang magpanipis sa kaagian, maong kinahanglan maghinayhinay dinhing dapita.
Ang trabaho magsugod sa kiloemtrahe 32 paingon sa kiloetrahe 33 (Canhangdon ngadto sa Ubayon) ug lain pang trabaho sa Pinayagan Norte sa Tubigon gikan sa Get Well Feel Good Clinic ngadto sa Anita Store sa dili pa moabut sa Tubigon Baptist Church.
Segun pa sa DPWH, lakip sa mga trabaho nga himoon mao ang pagkubkob, pagpabantok sa yuta, pagpasemento sa canal, pagbutang ug mga reflectorized thermoplastic pavement markings ug paglatag sa semento nga may kabag-on nga 0.28 cm.
Kining mga gilatid nga trabahoon, magkinahanglan usab sa suporta sa mga ekipo ug mga materyales nga karga niini, mao nga mahimong mohinay gyud ug malangan sa byahe.
Ang mga kapilian nga kaagi-an, kon gikan sa Norte adto subay sa Catigbian Macaas Road, dayun sa Catigbian, Balilihan Corella nganhi na sa Tagbilaran.
Bukas usab ang Catigbian Macaas ngadto sa Libertad Tubigon paingon sa San Isidro Antequera, Maribojoc Cortes ug Tagbilaran.
Special recruitment pa Taiwan, Hongkong, Abril 7-6 sa BEPO
Sinulat ni Rey Anthony Chiu
Sa mga wala pa makasulod ug trabaho ug interesado nga maka-gawas sa nasud, suwayi ug apply sa Special recruitment Activity sa SK Manpower Consultants sa pagpakigtambayayong sa Bohol Employment and Placement Office (BEPO-PESO).
Ang SRA alang sa overseas employment mahitabo sa Lunes ug Martes, Abril 7-8, 2025, gikan sa alas 8:00 AM ngadto sa alas 5:00 PM didto sa BEPO-PESO Office, 3rd Floor, Bohol Provincial Capitol Building, Tagbilaran City.
Mga bakante nga pwesto isip katabang o domestic helper sa Hongkong ug caretaker alang sa Taiwan ang gipangita, segun pa ni Ma. Vilma Yorong, hepe sa BEPO.
Partikular nga gipangita ang mga babaye, 24 ngadto sa 45 anyos, mahimong nakasuway na o unang higayon pang manarbaho abroad, bisag wala pay passport basta makasabut sa pinulongan nga Ingles.
Wala usab kinahanglana ang placement fee o salary deduction alang sa mga nabakante nga pwesto.
Tumong niining recruitment activity ang pagtanyag pa sa mga opurtunidad sa kapanarbaho-an sa mga aplikante nga kwalipekado, mao nga atong giaghat ang mga interesado nga moapil dala ang mga papeles nga magpamatuod sa inyong kapasidad, dayag ni Yorong.
Sa mga buot nga mo-apply, ipadala ang Online Application niini nga link: https://bit.ly/skmanpowerconsultant2025.
Kadtong mag aplikante nga dili makahimo sa online application, mahimo usab nga mag walk in sa pagsubay sa opisina sa BEPO-PESO nianang Lunes o Martes, dala na ang mga gikinahanglang papeles.
Alang sa dugang kasayuran, bistaha ang BEPO-PESO Office, o padala ug mensahe sa ilang Facebook Page, o tawag sa 411-0138 local 43003. Mahimo usab nga adto mapadala sa application ug pangutanan sa: bepobohol@gmail.com.
Mga babayeng mag-uuma nakakat-on sa pagbansay sa POT sa saging
Sinulat ni Elvira Bongosia
Napulog lima (15) ka aktibong mga babaye gikan sa lungsod sa Maribojoc ang nakakat-on sa Package of Technology Training sa produksiyon sa saging, nga gipasiugdahan sa Department of Agriculture Central Visayas (DA7) pinaagi sa High Value Crops Development Program (HVCDP), niadtong Marso 26-27, 2025.
Ang pagbansay naglangkob sa mga hilisgotan kabahin sa Good Agricultural Practices (GAP), Cultural Management, Pest and Disease Management and Control ug Soil Sampling.
Ang mga mag-uumang babaye miagi usab sa usa ka hands-on field demonstration.
Ang mga babayeng partisipante mipadayag sa ilang hugot nga tinguha sa pagpaambit sa ilang bag-ong naangkon nga kahibalo sa ilang komunidad, ilabi na sa mga kaubang ginang sa panimalay.
Kini, uban usab sa tumong nga magtukod ug banana farming group aron makamugna ug kita ug makasuporta sa inadlaw-adlaw nga panginahanglan sa ilang pamilya.
Atol sa pagbansay, ang mga partisipante nakakat-on sa mga kakomplikado ug mga benepisyo sa pagpahiangay sa bag-ong pamaagi sa pag-uma sa saging, nakaamgo sa mga kalainan ug sa mga limitasyon sa ilang tradisyonal nga mga pamaagi.
Ang agricultural program coordinator sa DA-7 nga si Roman Dabalos ug ang senior researcher nga si Deseada Dabalos, mipaambit sa ilang personal nga mga kasinatian sa pagpananom ug saging ug mipakita pa sa ilang mga ani.
Ilang gidasig ang mga partisipante nga dawaton ang pagpananom sa saging isip usa ka malungtarong tinubdan sa long-term income.
Si Ruth Rasonabe, 74 anyos nga usa ka barangay kagawad, nipadayag sa iyang pasalamat nga didto gipahigayon ang training sa ilang lungsod sa Maribojoc, ug naapil sila nga nakadawat sa maong training.
“Dako jud akong pasalamat nga nakaapil ko ani nga training kay sa pagkakaron usa ako ka barangay kagawad, nanlimbasog jud ako kay aron madisseminate ni nako ang akong nahibal-an karon. Nalipay gyud ko kay ako pud matudloan akong mga kauban sa pagpananom ug saging,” matud pa ni Rasonabe.
Gipasiugdahan sa Department of Agriculture Central Visayas (DA7) pinaagi sa High Value Crops Development Program (HVCDP) ang pagpahigayon ug Package of Technology Training sa produksiyon sa saging nga giapilan sa mga babayeng mag-uuma gikan sa lungsod sa Maribojoc niadtong Marso 26-27, 2025. (Hulagway gikan sa DA-7 photo)
Philhealth dialysis package P6350 na
Sinulat ni Rey Anthony Chiu
Gikan sa tag P4,000 ang coverage, gipadak-an na ngadto sa P6,350 ang benefit package rate sa matag hemodialysis session, sukad pa niadtong Octobre 9, 2024.
Ug matud pa sa PhilHealth, kini aron maseguro nga dili na mo-abag pa sa galastohan ang pasyente nga ipaagi sa dialysis tungod sa Chronic Kidney Disease (CKD) Stage 5.
Basta malista ug rehistrado na sa PhilHealth Dialysis Database (PDD), dugang sa PhilHealth pinaagi ni Tess Abella, may libre na nga 156 ka hemodialysis sessions matag tuig, o kinatibuk-an nga P 990,600.00 nga kantidad sa dialysis treatment ang ibayad sa Philhealth para sa pasyente matag tuig.
Gani, gipasabut ni Abella nga ang rate nga gihisgutan, parehas na sa public o private dialysis centers.
Hinuon, sa mga private dialysis centers, mahimo nga ang mga nephrologists, mangayo ug professional fees nga katumbas sa P450.00 sa ilang serbisyo.
Ang hemodialysis, usa ka proseso sa paglimpyo sa dugo, dala na sa kapakyas sa bato (kidney) sa lawas sa paghimo sa iyang trabaho. Gamit ang makina nga may espesyal nga filter nga gitawag ug dialyzer aron maoy molimpyo sa hugaw nga dugo ug tubig, ang mahibilin nga nalimpyo na nga dugo ug tubig, ibalik usab gihapon sa lawas.
Aron usab kalikayan ang perming tusok sa matag dialysis session, maghimo ang surgeon ug vascular access aron mas sayun na nga limpyohan ang dugo famit ang fistula o plastic nga tubo nga derecho ngadto sa blood vessels.
Sa panahon sa dialysis session, itusok ngadto sa vascular access ang duha ka dagum, usa niini mohigop sa dugo gawas sa lawas paingon sa makina nga magsilbe nga kidnet aron makalimpyo sa dugo.
Sa sulod sa makina, ang dugo moagi sa nagkadaiyang mga kortina nga maglimpyo sa dugo nga moagi samtang ang dialsysate magsugat sa dugo nga gilimpyohan aron iyang ikalabay, samtang ang nalimpyo nga dugo ibomba ug balik pasulod sa lawas.
Pinaagi sa napadak-an nga benepisyo sa Hemodialysis, ang PhilHealth magpadayon pa nga motanyag sa mas gikinahanglan nga suporta sa mga pasyente nga nanginahanglan ug dialysis, aron magaan-gaan ang ilang suliran ug mas mapasayon pa ang ilang pag-akses sa uban pang gikinahanglan nga healthcare.
12 lungsod napalingkawas sa illegal nga drugas – PNP
Sinulat ni Rey Anthony Chiu
Napulo ug duha ka mga lungsod sa Bohol ang hipno na ug napaphaan na sa suliran sa illegal nga drugas, samtang sa kinatibuk-ang lalawigan, miabut na sa 735 ka mga barangay nga kanhi apektado sa illegal nga drugas ang napalingkawas na.
Sa taho sa Philippine National Police, Bohol Provincial Police Office atul sa Forum on Illegal Drugs nga gipasiugdahan sa kapolisan sa Kampo Dagohoy, ug gitambongan sa mga nagkadaiyang representatnte sa mga kalungsuran, nabutyag nga ang mga kalungsuran sa Balilihan, Garcia Hernandez, Loboc, Maribojoc, Catigbian, Candijay, Trinidad, Lila, Alicia, San Isidro, Alburquerque ug Sikatuna, nawagtangan nag tunok tungod kay napapas na sa ilang mga tinugyanan ang suliran sa mga barangay nga nagpabiling apektado sa illegal nga drugas.
Lukop na ang 31 ka barangay sa Balilihan ang drug cleared, 30 ka barangay sa Garcia Hernandez, 28 sa Loboc, 22 ka mga barangays sa Catigbian ug Maribojoc, 21 ka barangay sa Candijay, 20 ka barangay sa Trinidad, 18 ka barangay sa Lila, 15 ka barangay sa Alicia, 12 ka barangay sa San Isidro, 11 ka barangays a Alburquerque ug 10 ka barangay sa Sikatuna ang drug-cleared na, matud sa taho ni Provincial Community Affairs and development Unit chief Lieutenant Colonel Norman Nuez sa Campo Dagohoy.
Sa laing bahin, nagpabilin nga labing daghang barangay ang wala pa ma limpyo sa Inabanga, kay sa 50 niini ka barangay, lima pa lamang ang drug cleared.
Sunod niini ang Tagbilaran City, nga mat y 15 ka distrito, ug duha lamang ka distrito niini ang drug cleared.
Ikatulo ang Ubay nga sa 44 ka barangay niini, 7 pa lamang ang drug cleared ug nagpabilin pa ang 37 nga nagpaabut nga ma-clear sa hiniusang bahan sa taga Philippine Drug Enforcement Agency, Philippine National Police, Department of Justice, Department of Interior and Local Government, Department of Health ug mga Local Government Units.
Ikaupat ang Baclayon nga nakapa clear sa 3 pa lamang sa 17 niini ka barangays, samtang ang Panglao, sa 10 niini ka barangays, duha pa ang drug-cleared ug walo pa ang wala.
Sa 25 ka mga barangay sa Talibon, 5 pa lamang ang drug cleared, 20 nagpabiling may hulga.
Sa 67 ka barangay sa Loon, 25 pa lamang ka barangays ang napalingkawas sa durgas, 46 pa ang limpyohonon, ug sa Cortes, sa 14 ka barangay, 4 pa ang napalingkawas samtang 10 pa ang sagubangonon.
Sa Clarin, sa 24 ka barangays, 7 pa ang nuclear sa drugas, 17 pa ang angay nga tutokan sa sunod nga mga adlaw, ug sa Sagbayan nga may 24 ka barangay, 7 pa lamang usab ka barangay ang na clear sa drugas, 17 pa ang nagpaabut nga malimpyohan sa hulga.
BALAK
SA DILI PA MOSUBANG ANG HARI’NG ADLAW
Sinulat ni Engr. Rogelio Podelino
Mangitngit pa ang kaadlawon
Wala pa mosubang ang kabugason
Ang mga mananagat atu-a na sa dagat
Nakigbisog na sa ilang mga panagat
Ang mga mamana-ay sa isda’ng danggit
Dala ang ilang iwag taliwala sa kangitngit
Sigi na ug salom dala ang pana
Maoy ilang pa-agi ang danggit makuha
Ang manapyaway nagta-on na sa ilang sapyaw
Taudtaud magbukad na sa sapyaw
Ta-on bukad ang ilang pagabuhaton
Mga isda’ng makuha isulod sa kahon
Uban’g mananagat nagladlad sa ilang pukot
Nagpati-anod sa sulog samtang nagpa-abot
Taudtaud magliba na sa pukot
Hugniton dayon ang mga isda’ng nitapot
Daghan’g klase ang pama-agi sa panagat
Kasagaran ngitngit pa sila managat
Nagbutang dagku’ng bombilya ilawom sa dagat
Aron isda modugok sa mga panagat
Gisagubang ang mga kalisud sa pagpanagat
Kini ang kinabuhi ss mga mananagat
Giantos katugnaw aron makakaon matag adlaw
Kini ang gibuhat sa mga mananagat;
SA DILI PA MOSUBANG ANG HARI’NG ADLAW