Bohol Light Padayon sa Upgrading ug Clearing Operation

Sinulat ni Sheryl B. Paga

Obligasyon sa usa ka distribution utility ang pagmintenar sa mga distribution line facilities aron masiguro nga luwas sa kadaot ang dapit ug mahatagan ug insakto nga power reliability ang maong mga lugar nga nasakop sa franchise area niini.

Ang Bohol Light Company, Inc. padayon nga naghimo ug mga clearing operations dinhi sa syudad sa Tagbilaran sa tinguha nga makapadayon sa paghatag og dekalidad nga serbisyo sa kuryente. 

Ang Bohol Light aduna mga kalihokan sama sa modification sa mga oversagging secondary lines, pagpuli sa mga kahoy nga poste ngadto sa concrete poles, stringing ug upgrading sa mga primary nga distribution lines, splitting of loads sa mga common distribution transformers ug pakokorek sa mga nabantayang hotspots aron malikayan ang mga low voltages or power fluctuations ug pagpamutol sa mga sanga o punoan sa kahoy nga hapit na nga motakdo sa distribution lines.

Ang maong kalihokan dako ug tabang aron maminusan ang wala planoha nga mga pagkabalda sa kuryente ug mapauswag ang power efficiency ug reliability dinhi sa dakbayan sa Tagbilaran.

Awhag sa Bohol Light ang kooperasyon sa mga konsumidor kung adunay mga service lineman nga mangayo sa inyong pagtugot kung ugaling nga mubarog ug poste diha sa boundaries sa mga yuta o mga sanga/punoan sa kahoy nga maapektuhan niining atong mga kalihukan. 

Basi usab kini sa mandato sa Department of Energy ubos sa balaod Republic Act 11361 kabahin sa Anti Obstruction of Power Line Act.

Nakabalik na sa pag-andar ang PU No.1

Sinulat ni Victor L. Tambis

Pumping Unit No. 1 sa Bohol Water Utilities

Sa tinguha nga makanunayon ug permenente ang bul-og sa tubig nga gi apod-apod ngadto sa mga konsumidor, ang Bohol Water mipahibalo nga human sa dul-an usa ka bulan nga pag repair ug pag rehabilitate sa Pumping Unit No. 1, ang maong tinubdan nakabalik na sa pag-andar niadtong April 8, 2025.

Kining maong kalamboan naghatag ug kasulbaran sa mga dapit nga nakasinati sa kakulang sa tubig tungod sa pagkawala sa supply nga gialagaran sa maong tinubdan. 

Atong mahinumduman nga adunay problemang teknikal nga nasinati ang PU No. 1 nga maoy hinungdan sa pagkapalong niini sukad pa sa Marso 12, 2025 diin ang maong pagkawala sa serbisyo nakaapekto sa daghanang mga dapit sulod sa gialagaran nga mga lugar.

Pinaagi sa paningkamot sa mga tinugyanan sa BWUI diin “round the clock” kini nga nag atiman sa maong pag repair, nakabalik kini sa serbisyo sa nahisgutang petsa.

Gipaningkamotan sa mga tinugyanan sa Operation Department sa maong buhatan nga walay pagkapalong sa mga pumping units nga magpanghitabo, gawas sa pagkapalong sa kuryente nga dili kapugngan, niining umaabot nga kapistahan sa syudad sa Tagbilaran ug gipaniguro niini nga makaserbisyo sa mga konsumidor sigun sa panginahanglan sulod sa gialagaran nga mga dapit.

Ordinansa sa HIV AIDS

STI Council, gisugdan

Sinulat ni Rey Anthony Chiu

Gikan sa Ordinansa nga nagmugna sa Provincial Human Immune Virus / Acquired Immune Deficiency Syndrome Multi sectoral council, gilantaw sa Sangguniang Panlalawigan (SP) Committee on Health and Public Sanitation karon ang panginahanglan nga lig-onon pa ang mga mekanismo aron pugngan ug sumpoon ang mga sakit nga dala sa pagpakighilawas, pinaagi sa pagmugna sa Bohol Province STI, HIV, ug AIDS Council (BPSAC).

Ang BPSAC mao nay tahasan sa pagtuki sa mga programa ug pag coordinate sa mga mga isyu ug mga inisyatiba nga may kalambigitan sa Sexually Transmitted Infections (STI), Human Immuno Virus (HIV) ug Acquired Immuno Deficiency Syndrome (AIDS) dinhi sa Bohol.

Kahinumduman nga ang lalawigan sa Bohol nagpanday na sa Ordinance No. 2007-007, nga nagmugna sa Provincial HIV/AIDS Multisectoral Council.

Karon, dala sa panginahnaglan, ang Rodinansa himoon na nga Strenghtening The Provincial Local Aids Council, Providing For A Comprehensive STI, HIV, and AIDS Prevention And Control Program As Well As Support Services To Persons Living With Such Diseases And Appropriating Funds For Its Implementation,” nga una nanga gibasa segun sa mandu sa balaod.

Segun sa datus nga nakuha, sukad sa 1984 ngadto sa Septembre 2024, mikabat na sa 749 ka taho sa HIV infections sa Bohol, ug namatikdan ang 98 ka bag-ong kaso nga milutaw sa katapusang siyam ka buwan sa 2024.

Ang sama nga kasayuran nagtug-an nga kasagaran sa mga bag-ong kaso, naglambigit sa mga lalaki, nga daghan sa nag edad og 25-34 age group. Sunod na niini ang mga lalaki nga anaa sa 15-24 age group.

Niining kasamtangan nga sitwasyon, nakit-an sa SP ang dinali-an nga panginahanglan nga sa pagpalig-on sa mga mekanismo alang sa paglikay, ug pagpugong sa pagtakod sa STI, HIV ug AIDS sa dili pa kini ingon ka grabe nga mamahimong krisis.

Subay niini, nahukman nga kining BPSAC mahimong apilan na sa mga tawo nga mahimong direktang biktima sa sakit nga aktibong mahi-apil, alang sa mas epektibo nga kampanya niini.

Giangkon usab sa SP nga ang kalampusan sa pagpakigbugno sa STIs, HIV, ug AIDS makab-ot lamang pinaagi sa komprehensibo nga programa nga magtutok sa lawom nga pagsabut sa kawad-on, dili patas nga pagtratar sa babae ug lalaki, kakuwang sa edukasyon ug pagpihig sa katilingban.

Partikular nga mga punto sa gilantaw nga ordinansa mao nga ang kagamhanan maghimo’g mga lakang sa pagpa-asdang ug pagpatuman sa mga lakang nga magpugong ug magsumpo sa STI, HIV ug magtumong pagtabang sa mga komunidad nga nameligro sa sakit.

Isukip na usab sa ordinansa ang paghimog komprehensibo nga kampanya sa pagpakatap sa kasayuran aron pabag-on ang kahibawo ug kasayuran kon diin mahimong makakuha sa luwas, legal, sayon abton ug dekalidad nga serbisyo sa pag-atiman sa natakdan aron tudloan ag publiko sa komplikado nga sitwasyon ug pamenosan ang kaulaw nga dala niini.

Apil usab sa ordinansa ang mga probisyon sa pagpanalipod sa kaayohan sa mga mga biktima sa STI, HIV, ug AIDS, mga naghatag sa serbisyo lakip na ang mga health workers, social workers, case managers, ug peer educators, apil na usab ang mga polisiya nga isukip aron magtubag sa mental health issues, stress ug burnout tungod sa emotional ug psychological nga pangnahanglan sa trabaho.

DOH sa World Immunization Week

Palapdan ang kasayuran

kabahin sa pagpabakuna

Sinulat ni Rey Anthony Chiu

Napruwebahan na nga may mga sakit nga kaniadto dili matambalan, apan aron pwede na nga pangandaman aron sa nahisgutang sakit, ang mga tawo dili na matakdan o mataptan.

Ug kay napamatud-an na nga ang pagpakunhod sa sakit nga makuha, ug pagpalingkawas sa tawo sa sayo nga kamatayon, agresibo nga itusok sa Department of Health (DOH) ang pagpamakuna, dungan sa paghandum sa World Immunization Week karong Abril 24 ngadto sa 30.

Gani, pinaagi sa usa ka Regional Circular, si Dr Jaime Bernadas, DOH Regional Director, ming-aghat sa tanan nga hepe sa mga local nga kagamhanan, apil na ang mga hepe sa mga tambalanan, mga rural health units ug mga natungdan nga mga katawhang may responsibilidad,  nga ipakatag ang kasayuran kabahin niining dinungan nga kalihukan.

Ang World Immunization Week, gihandum matag katapusan nga semana sa Abril, ug nagpakayab sa kamahinungdanon sa bakuna sa pagpanalipod sa katawhan: bata man o edaran, sa tanan nga mga sakit nga pwede kapugngan.

Karong tuiga, sa pagsagop sa tema nga “Pangkalahatang Pagbabakuna, KayangKaya” kini nagtutok sa pagseguro nga maabut pa ang daghang katawhan, ilabi na sa  mga kabataan , nga sila mabakunahan.

Matud ni Dr Bernadas, sa atong pagtikang sa tungatunga sa atong tumong nga abton ang Immunization Agenda 2030, ang World Immunization Week naglantaw sa ugma nga mas lapad nga kapadulngan sa katawhan nga magkinahanglan sa bakuna ug mas mapasayon pa ang pagpa-ugmad sa kinatibuk-an nga kahimsog sa nasud.

Atong ipakita nga ang pagkunhod sa mga masakit ug pagluwas sa kinabuhi mahimong maangkon sa pagpabakuna, aghaton ang mga LGUS nga palapdan pa ang ilang paningkamot sa pagpatuman sa mas lig-on nga kampanya ngadto sa mga kabarangayan, aghat ni Dr Bernadas.

Nunot niini, giawhag sa DOH ang pagpahigayon og mga Fora kabahin sa National Immunization Program, paghimo og mga kampanya pagpahibaw sa katawhan, paghimo og mga community outreach, health afirs ug kampanya sa social media kabahin niini.

Emergency care sakop na karon sa

Philhealth para sa tanang miyembro

Sinulat ni Elvira Bongosia

Hingpit nang gipatuman sa Philippine Health Insurance Corp. (Philhealth) ang Outpatient Emergency Care Benefit (OECB) Package, nga nahimong available sugod niadtong Pebrero 14, 2025.

Sa usa ka press release, gipahibalo niini nga ang tanang miyembro sa Philhealth, lakip ang ilang legal dependents, may katungod na sa pag-avail sa ilang kaugalingon sa package sa bisan asang accredited nga ospital sa tibuok nasod, gikan sa Level 1 ngadto sa Level 3 nga mga pasilidad.

Kini nga inisyatiba kabahin sa paningkamot sa Philhealth nga mapauswag ang pag-access sa mga serbisyong medikal nga emerhensya nga wala magkinahanglan og pagka-ospital, ilabi na sa mga kaso nga giklasipikar nga dinalian o emerhensiya.

Ang OECB Package ma-access na sa mga ospital nga walay dugang gasto, sumala sa giklaro sa Philhealth Advisory 2025-0009.

Gipahayag sa ahensya nga ang mga ospital wala magkinahanglan og dugang nga akreditasyon aron mahatagan og benepisyo, tungod kay ang ilang kasamtangan nga akreditasyon nagsakop na sa gikinahanglan nga kapasidad alang sa emergency nga pag-atiman sa outpatient.

Ang Philhealth nagpagawas usab og Advisory 2025-0017, nga nagtubag sa mga kabalaka sa mga pasyente nga na-admit sa emergency department human sa petsa sa rollout nga wala maka-avail sa mga benepisyo sa OECB niadtong panahona.

Sumala sa advisory, kini nga mga pasyente mahimo pa nga mag-file alang sa reimbursement, kung ang ilang mga pag-angkon makatuman sa mga palisiya sa Philhealth. Naglakip kini sa hustong dokumentasyon ug klasipikasyon sa mga serbisyo nga nadawat ubos sa sakop sa OECB.

Gipatin-aw usab sa advisory ang mga detalye bahin sa Essential Emergency Care List (EECL), labi na ang kalainan tali sa “Urgent Care” ug “Emergent Care” ug kung giunsa kini nahulog sa ilawom sa Philhealth coverage.

Ang EECL Summary Form naglatid sa fixed fee schedule ug mga serbisyo sa package, nagsiguro sa transparency sa billing ug claims monitoring. Gitubag usab sa giya ang aplikasyon sa mga mandatory nga diskwento, labi na alang sa mga senior citizen ug mga tawo nga adunay mga kakulangan, ug naghatag og usa ka summarized nga pagpatin-aw sa EECL alang sa dali nga pakisayran.

Gi-awhag sa Philhealth ang mga miyembro nga naka-avail sa mga emergency services nga makig-alayon sa mga ospital alang sa kompletong set sa mga dokumento nga gikinahanglan sa pagproseso sa ilang mga claim.

Kini naglakip sa Claim Forms 1, 2, ug 4; ang PhilHealth Benefit Eligibility Form; usa ka itemized billing statement subay sa EECL fixed fee schedule; may kalabotan nga mga resulta sa laboratoryo o imaging; ang EECL Summary Form; ug waiver ug opisyal nga resibo sa ospital.

Ang kompletong listahan sa Philhealth-accredited nga mga ospital nga nagtanyag sa OECB Package mahimong ma-access pinaagi sa opisyal nga website sa ahensya. 

Gipahinumdoman sa PhilHealth ang mga miyembro nga ang mga pasyente nga na-admit sa mga emergency department sa ospital sugod niadtong Pebrero 14, 2025, nga wala maka-avail sa OECB Package sa panahon sa pag-atiman mahimo pa nga mag-file og claim, subay sa mga polisiya sa PhilHealth. (PhilHealth)

Titulo sa mga yuta sa Eskaya

mogawasay na, niining tuiga

Sinulat ni Rey Anthony Chiu

Usa ka hiniusang titulo sa yuta nga iya sa kinatibuk-an kaliwatan sa mag Eskaya ang sa dili madugay, ikahatag na gayud, saysay ni National Commission on Indigenous People’s (NCIP) Bohol Field Officer Emmilou Gonzaga didto sa Kapihan sa PIA.

KIni, kay human sa 17 na ka tuig nga pinaabutay sa mga sakop sa kaliwatan sa Eskaya nga nanimuyo sa mga bukiran nga bahin sa Duero, Guindulman, Sierra Bullones ug Pilar, mapagawas na sa NCIP en banc ang sertipiko sa kagamhanan nga nagtagad sa ilang pag-angkon sa kayutaan sa ilang mga katiguwangan.

Subay sa Indigenous People’s Rights Act (IPRA), ang mga Eskaya, kay naapil sila sa natagad sa goberno nga may karaan na nga linyada sa mga katiguwangan nga nanginabuhi sa kabukiran sa mga nahisgutang lungsod, mahimo sala nga moangkon sa mga kayutaan isip kabahin sa ilang mga ancestral domains o mga kayutaan nga giangkon na sa ilang mga katiguwangan.

Usa ka hiniusan nga titulo ang ipagawas sa goberno aron pagpamatuod nga opisyal na nga gigunitan sa mga Eskaya ang kamatuoran nga ilaha na og walay laing dili sakop sa pundok ang makapanag-iya sa nahisgutang yuta.

Matud ni Gonzaga, 2017 pa diha nga pormal nga giduso sa Eskaya, inabangan sa NCIP ang pag-angkon sa mga katuyaan sa ilang mga katiguwangan.

Pinaagi sa pagpagawas sa goberno sa Certificate of Ancestral Domain Claim niadtong 2017, gimandu usab sa gobernor nga hiusahon ang mga yuta nga gi-angkon sa mga sakop sa Eskaya ug sa  nahiapil sa opisyal nga sukod nga gihimo sa Department of Environment and Natural Resources (DENR).

Niadtong Marso 27, gitagad na usab sa goberno ang giduso sa Eskaya nga giangkon nga mga kayutaan, ug sunod niini, ang 3,106 hectaryas nga naapil sa giangkon sa Eskaya, iduso na ngadto sa Land Registration Authority aron mahimo na kin inga patitulohan.

Dayag ni Gonzaga, mahimong sa dili pa motapos ang tuig, makagawas na ang titulo sa kapin sa 3 mil ektaryas nga dili na gyud mailog gikan sa mga Eskaya.

Pasidaan sa CSC sa mga kawani sa gobyerno: Pag-like, share sa mga political post sa mga kandidato gidili

Sinulat ni Elvira Bongosia

Gipasidan-an sa Civil Service Commission (CSC) ang mga opisyal ug empleyado sa gobyerno nga ang pag-apil sa politikanhong kalihokan sa social media alang o batok sa usa ka kandidato o partido, bisan usa ka butang nga yano sama sa pag-like o pag-share sa usa ka post, mahimong makahatag kanila og kasamok.

Ang CSC, sa Memorandum Circular (MC) No. 03 nga pinetsahan og Marso 31, 2025, nagpahinumdum sa tanang empleyado ug opisyal sa gobyerno nga direkta o dili direktang moapil sa bisan unsang partisan nga politikanhong kalihokan para sa 2025 midterm elections ug sa unang Bangsamoro Parliamentary nga eleksyon nga gimando sa 1987 Constitution ug uban pang mga balaod.

“Social media functions such as “liking,” “comment,” “sharing,” re-posting or following a candidate’s or party’s account are considered as “partisan political activity” if these are resorted to as means to solicit support for or against a candidate or party during the campaign period,” gilatid sa MC.

Ang mga indibidwal nga sakop sa pagdili mao ang mga miyembro sa serbisyo sibil sa tanang sanga sa gobyerno sa Pilipinas, lakip na ang gipanag-iya o kontrolado nga mga korporasyon sa gobyerno, unibersidad o kolehiyo sa estado, mga opisyal sa karera nga naghupot sa mga katungdanan sa politika, unipormadong personel, ug aktibong mga miyembro sa Philippine National Police (PNP) ug Armed Forces of the Philippines (AFP), ug mga opisyal sa barangay.

Ang CSC miingon nga ang pagdili niini nga mga buhat nahisubay sa 1987 Konstitusyon nga nagmando nga walay opisyal o empleyado sa serbisyo sibil nga moapil, direkta o dili direkta, sa bisan unsang electioneering o partisan political campaign ug ang pagsubli sa Administrative Code of 1987, Omnibus Election Code, ug Local Government Unit nga naglatid nga walay miyembro sa militar ang direkta o dili direktang moapil sa bisan unsang partisan nga kalihokang potitikal, gawas lamang sa pagbotar.

Gikutlo usab sa MC ang Joint Circular No. 001 Series of 2016 sa CSC ug Comelec, nga nag-ingon nga ang ubang gidili nga mga kalihokan giklasipikar isip partisan political activities: pagporma og mga organisasyon, asosasyon, club, komite, o uban pang grupo sa mga tawo alang sa katuyoan sa pagpangayo og mga boto ug/o paghimo sa bisan unsang kampanya para o batok sa usa ka kandidato/partido; pagpahigayon og politikanhong mga caucus, komperensya, meeting, rally, parada, o uban pang susamang mga asembliya alang sa katuyoan sa pagpangayo og mga boto ug/o paghimo sa bisan unsang kampanya alang o batok sa usa ka kandidato/partido.

Gidili usab ang paghimo og mga pakigpulong, pahibalo, komentaryo o paghimo og mga interbyu alang o batok sa pagpili sa bisan kinsa nga kandidato/partido alang sa pampublikong katungdanan; pagpatik, pagpakita, o pag-apod-apod sa mga literatura sa kampanya o mga materyales nga gidisenyo aron suportahan o supakon ang pagpili sa bisan unsang kandidato/partido; direkta o dili direkta nga pagpangayo og mga boto, panaad, o suporta alang o batok sa usa ka kandidato/partido; pagsalmot isip usa ka delegado sa bisan unsang politikanhong kombensiyon, o usa ka miyembro sa bisan unsang politikal nga komite o direktor, o usa ka opisyal sa bisan unsang political club o uban pang susamang politikanhong mga organisasyon.

Lakip usab gidili ang pagdawat og bisan unsang kontribusyon alang sa politikanhong katuyoan, direkta man o dili direkta; pagpaila sa publiko nga adunay kalampusan o kapakyasan sa bisan kinsa nga kandidato o partido; pagsuot og mga t-shirt o pin, cap, o bisan unsa nga susama nga mga gamit sa eleksyon nga adunay mga ngalan sa mga kandidato o partido politikal gawas kung gitugutan sa Commission on Elections; watcher sa usa ka political party o kandidato panahon sa eleksyon; makanunayon nga presensya sa mga politikanhong rally, mga caucus sa, ug padayon nga pagpakig-uban sa pipila ka mga kandidato sa politika ug/o mga partido sa politika sa maong mga politikanhong kalihokan, hinungdan nga ang empleyado suod nga mailhan sa maong kandidato ug/o partido sa politika; paghatag og personal, pinansyal, o uban pang kwarta nga kontribusyon, mga suplay, kagamitan, ug mga materyales para sa kaayohan sa usa ka kandidato ug/o partido political; ug ang paggamit sa mga kahinguhaan sa gobyerno sama sa mga personahe, lakip ang mga job order o kontrata sa pag-hire sa serbisyo, oras, ug mga kabtangan alang sa politikanhong katuyoan.

Gitumbok sa CSC nga ang paghimo sa mga gidili nga mga buhat naglangkob sa pagsuspinde sa usa ka buwan ug usa ka adlaw hangtod unom ka buwan alang sa una nga paglapas ug pagtangtang sa katungdanan alang sa ikaduha nga paglapas.

Hinuon, ang mga napili nga opisyal sa barangay ug Sangguniang Kabataan moapil sa mga politikanhong kalihokan alang sa 2025 nga piniliay base sa gipagawas sa Commission on Elections human gipaluyohan niini ang hukom sa Korte Suprema nga ang pagdili sa pag-apil-apil sa mga politikanhong kalihokan sa panahon sa eleksiyon magamit lang sa mga opisyal ug empleyado sa serbisyo sibil ug walay labot ang mga piniling opisyal. (Comelec).

Ang Civil Service Commission, sa Memorandum Circular No. 03 nga pinetsahan og Marso 31, 2025, nagpahinumdum sa tanang empleyado ug opisyal sa gobyerno nga direkta o dili direktang moapil sa bisan unsang partisan nga politikanhong kalihokan para sa 2025 midterm elections ug sa unang Bangsamoro Parliamentary nga eleksyon nga gimando sa 1987 Constitution ug uban pang mga balaod. (CSC/PIA)

Kahadlok sa lungkab, mogawas sa

gabii, napagawas sa ‘Bohol Poll 25’

Sinulat ni Rey Anthony Chiu

Sobra sa katunga, gani 59 porsyento sa mga Bol-anon nga misalmot sa Holy Name University Bohol Poll 2025 ang nahadlok karon nga sudlon ang ilang mga panimalay sa mga tigpanglungkab, butang nga na wala na unta sa kinabuhi sa mga Bol-anon.

Sa Bohol Poll nga nagpagawas sa mga hunahuna ug panahum sa 400 ka mga Bol-anon gikan sa Districts 1, 2 ug 3, ug sa Tagbilaran, napagawas usab ngz 39 porsyento sa mga Bol-anong mingtubag sa survey mingsumbong usab nga mahadlok na sila mogawas sa panimalay sa kagabhion, tungod kay wala na sila mobati nga luwas kini.

Sa unang mga rounds sa Bohol Polls, dihay mga higayon nga mas daghan ang mga dili ganahan mogawas sa balay kay nahadlok sa mga rebelled, apan karon, 97% sa mga mibutag sa survey ang nagpadayag nga wala na silay nakit-ang mga armadong rebelde, ug mahimong wala nay kahadlok alang niini.

Sa susamang survey, 46 porsyento sa mga Bol-anon ang mipadayag nga seryoso kaayo ang problema sa illegal nga drugas, 16 porsyento ang miingon nga seryoso apan dili kaayo.

Hinuon, may 33 ka porsyento usab ang mipadayag nga dili angay tagdon ang drugas ug lain nga 21 porsyento ang miingon nga dili problema ang drugas sa komunidad.

Wala man isumpay sa Bohol Poll apan daghan ang nagtuo nga ang nagtubo nga mga kahadlok sa mga katawhan, dala na sa nawal na unta apan nakabalik nga suliran sa illegal nga drugas.

Apan, bisan pa niining tanan, 5 ka porsyento lamang ang mga Bol-anon nga mitubag sa survey ang wala na magtuo nga may paglaum pa ang Bohol, ug 72 porsyento ang masaligon pa gihapon nga may maayong kaugmaon pa ang Bohol.

Ang nahisgutan nga survey gihimo niadtong Marso 6 ngadto sa 29, 2025 ug may +/-5 nga margin of error.

BALAK

ANG GINOO MAOY AKO’NG MAGBALANTAY
Sinulat ni Engr. Rogelio Podelino

Ang tawo dinhi sa kalibutan
Nagkinahanglan ug gabayan
Tawhanon’g kinaiya baroganan mahuyang
Sa mga pagtental sa yawa dali matikwang

Tawo nagkinahanglan ka ug kasandigan
Aron molig-on ang imong baroganan
Hugti ang imong pag-ampo matag adlaw
Para motunhay ka sa imong pagbugtaw

Gamita ang imong rosaryohan
Aron modugang ug kalig-on imong baroganan
Sa imong pagbuhat sa ingon
Ang GINOO gikahimut-an ka dayon

SIYA kanimo kanunay nagbantay
Gihatagan ka ug anghel magbalantay
Aron ikaw sa kinabuhi dili mahisalaag
Kay ang yawa nagaandam ug lit-ag

Tumana ang IYANG napulo ka sugo
Aron ang GINOO kanimo dili masuko
Himaya-a ang ngalan sa GINOO matag adlaw
Aron SIYA sa imong paghimaya malingaw

Magbasa ug versu matag adlaw sa Bibliya
Aron sa kanunay aduna kay giya
Sa imong pagabuhaton ni-anang adlawa
Nga ikalipay tan-awon sa IYANG mga mata

Pili-a ang imong mga higala-on
Aron makalikay sa mga dautan’g panon
Sa matag adlaw nimo’ng pakigbisog
Asdanga ang mga kalisdanan aron ka mobarog

Bantayan ang adlaw nga bala-an
Mopahulay sa gimbuhaton nga tanan
Gitagana nga adlaw para lang sa GINOO
Ang buhaton magbasa lang ug mga psalmo

Kay ikaw tawo gihigugma man sa GINOO
Bisan nakasala IYA mang gipapasaylo

Hinulsolan ang mga kasal-anan
Aron mosangko kz sa imong gilakwan

Ang kinabuhi sa kalibutan daghan’g talinghaga
Magbinantayon kanunay kay daghan’g banyaga
Magmatngon sa imong mga lakang kanunay
ANG GINOO MAOY AKO’NG MAGBALANTAY