Bohol Light: Electrical Fire Safety Tips
Sinulat ni Sheryl B. Paga
Ang Bohol Light Company, Inc buot magpahinumdum ngadto sa mga katawhan mahitungod sa mga basic Electrical Fire Safety Tips sa tanang higayon aron paglikay sa sunog o peligro.
Atong matngonan ang saktong pagawi sa extension cords ug sockets nganha sa mga electrical outlets susama niining musunod:
Kon makamatikod nga adunay deperensya ang wiring sa electrical cords or kung magdugang ug sockets/outlets, ipatan-aw kini ug usa ka electrician nga adunay kahibalo sa insaktong pagtaod niini.
Kung makasinati ug mga insedente sa pag-spark o pagkayo sa plug o socket/outlet, palonga ang power supply diha sa main breaker ug kontak ug electrician aron ma-inspect ug ma-repair kini or tawag sa opisina sa Bohol Light alang sa temporaryong pagpalong alang sa siguridad sa atong panimalay.
Ayaw pagsuway ug repair sa mga electrical problems kung dili ikaw suhito ug walay kahibalo tungod kay ang kuryente dili makita ug dilikado.
“
Ang Bohol Light sa kanunay ngapahinumdum sa mga katawhan nga “Luwas ang Magmatngon” ug mag-amping sa kanunay kay ang atong kaluwasan, garantiya sa siguridad sa atong pamilya.
Busa kon aduna kitay mga pangutana o nagkinahanglan ug assistance sa Bohol Light linemen, tawag gilayon sa 24/7 hotline number (038)-427-2372, mobile no. 0920-960-2372 o padala ug mensaha sa official messenger account “Bohol Light” alang sa mas dal inga pagresponde o katin-awan.
Pag-ugmad sa linya gihatagan ug prioridad sa BWUI
Sinulat ni Victor L. Tambis
Makita sa hulagway sa itaas ang mga kalihokan sa Bohol Water pagladlad ug dugang mga linya sa nagkalain-lain nga dapit sulod sa gi-alagaran nga mga lugar
Gawas sa pag-ugmad ug dugang tinubdan, usa sa gihatagan ug prioridad sa Bohol Water mao ang pag-ugmad sa mga linya niini. Ang maong Kompanya mopahibalo ngadto sa mga konsumidor, ilabi na sa naagian sa bag-o nga linya nga nagasubay sa parte sa mga Barangay sa Cabawan, San Isidro ug Tiptip, nga mahimo na kini nga mo apply for water connection sa ilang buhatan o dili ba pagpakisayod mahitungod niini pinaagi sa pagtawag sa BWUI pinaagi sa mga numero: 411-0210 ug 412-3154 / cellphone no. 0917-720-8672.
Subay niini, lakip sa maong programa mao ang paglad-lad ug linya subay sa Daraunday St, Barangay Dao diin aduna kini’y gilay-on nga 1,087 meters o lapas sa usa ka kilometro magasugod haduol sa Dao Brgy. Hall nga motadlas sa maong kalye (maagian ang entrance sa Lind p-1) ug hangtod na kini sa eskina Dominique drive, Brgy. Tiptip. Kon walay mga kakulian, ilabi sa mga necessary permits, gibanabana nga masugdan kining maong proyekto sa bulan sa Septembre, 2025 nga matapos sulod sa 30 ka adlaw.
Human sa maong dapit, isunod usab ang pagladlad ug linya sa mga dapit sa Zamora St. nga adunay gilay-on nga 1,650 meters o usa ug tunga sa kilometro ug ang Toledo St, nga adunay gilay-on nga 935 meters o duol sa usa ka kilometro. Kining duha ka kalye anaa sa Barangay Dao, Tagbilaran City.
Pagkakaron, nagpadayon ang pagpuli sa mga linya sa Capayas St., Brgy. Bool (pasaka padulong sa habitat) diin anaa na kini sa 98% nga makompleto ug ang laing proyekto sa susamang dapit, sa sulod mismo sa Habitat Village, nga anaa na 30% ang completion niini.
Stakeholders nagsugod na ug latag sa Bohol ICT Roadmap
Sinulat ni Rey Anthony Chiu
Nagkatapok aron mug-naon na ang Bohol Information Communication Technology (Bohol ICT) Roadmap, aron i-andam ang Bohol sa pagkahimo na niini nga bag-ong daku nga hub sa business process management o mas nailhan’g call center operations.
Gihiusa sa Bohol ICT Council kauban sa Bohol Economic Development and Investment Promotions Office (BEDIPO), ug sa Department of Information Communications Technology (DICT), ang mga importante nga sector sa IT-BPM, alang niining katuyuan, didto sa JJs Seafoods Restaurant, Agosto 5.
May mga representante sa Talent (mga trabahante sa call centers ug mga gradwado sa IT BPM courses), infrastructure (o kadtong tighatag ug mga imprastraktura sama sa internet providers, telephone companies ug tag-iya sa mga buildings nga giyak-an sa mga call centers).
Dito usab ang mga taga academe (tunghaan nga nagtanyag ug bansay sa mga call center agents) ug taga gobyerno, aron hiusahon ang mga pangandoy sa tanan ngadto sa usa ka industriya nga magpa-isa sa ekonomiya sa Bohol.
Kini pinaagi sa Strengths, Weaknesses, Opportunities ug Threats workshop nga giapilan sa mga representante sa break-out sessions.
Kahindumduman nga ang IT-BPM, nahimo na nga usa sa mga nag-una nga tinubdan sa kapanarbahoan dinhi sa Bohol.
Nagpadayon na dinhi ang operasyon sa Task US, Ibex, GenPact ug Sagility, lakip na ang mga start-up companies nga nagtanyag ug mga solusyon alang sa mga proseso sa negosyo.
Gibutyag usab sa IT BPM Association of the Philippines pinaagi sa presidente niini nga si Jack Madrid nga sa sunod tuig, gitarget sa kagamhanan nga paabton na sa 2 milyones ang mga tawo nga makatrabaho sa IT BPM, kay kini may tinuig nga revenues nga moabut sa $40 bilyones nga gikatampo sa pag-ugmad sa Pilipinas.
Gidugang ni Madrid nga ang mga talagsaon nga kalampusan sa Bohol sa pagpalig-on niini sa imprastraktura, talent ug sa pagpahiluna sa kagamhanan aron mas sayon makasulod ang negosyante dinhi, maoy kina-ingnan nga ang Bohol dili na emerging IT BPM location apan ang labing dayag nga kapilian sa pagpasugod sa negosyo.
PAGSUBAY SA MAPA. Gihimo sa mga sakop sa Bohol ICT Council uban usab sa mga stakeholders niini ang Development Roadmap sa Bohol ICT Council, aron magpabilin ang lalawigan nga madanihon sa mga interesado mopahimutang sa ingon nga negosyo ug maghatag ug dugang de-kalidad nga trabaho alang sa mga Bol-anon. (Hulagway gikan sa PIABohol)
GIPANGUNAYAN. Mismo si BEDIPO Head Maria Fe Dominise, kanhi Bohol Chamber of Commerce and Industry president ug Bohol ICT Council Official Albert Uy ug ICT Council President ug web developer Jay Paul Aying, aktibong ming-apil sa paghimo sa Bohol ICT Roadmap pinaagi sa workshop didto sa JJs Seafood Restaurant, Agosto 5. (Hulagway gikan sa PIABohol)
SA YELLOW ALERTS SA NGCP
Pagdaginot, likayi pag gamit sa koryente sa ‘peak hours’
Sinulat ni Rey Anthony Chiu
Sa milabay nga duha na ka adlaw, nagpagawas ang National Grid Corporation of the Philippines (NGCP) sa Visayas sa Yellow Alert status sa grid, tungod sa kasamtangan nga duol sa kakuwang sa supply sa koryente sa kinatibuk-ang grid sa Kabisay-an.
Ipakayab sa NGCP ang yellow alert kon ang magamit nga supply sa koryente sa tibuok Visayas Grid, halos motupong na sa panginahanglan.
Dala sa 11 ka mga planta sa koryente nga temporaryong nagshutdown, ug lain pang 4 nga gipamenosan ang kapasidad sa pagpagawas sa koryente, mao nga 725.2 megawatts ang kadaghanon sa koryente nga dili una masupply sa grid alang sa pangunsumo sa mga kabalayan, buhatan ug mga industriya dinhi, gipasabot ni Michael Ligalig, ang NGCP information Officer sa Visayas.
Niini, matud sa NGCP, sa 2,369 megawatts nga peak nga panginahanglan sa Visayas, delikado na nga mokunhod pa ug wala nay magamit nga supply sa 2,538.
May nahibilin na lamang nga 169 megawatts nga pwede magamit sa emerhensya, hinungdan sa Yellow Alert.
Sa napakunhod nga supply, kini gikuygan usab sa ka-init sa panahon.
Ang ka init sa panahon, magpakibra sa tubig sa mga hydropower plants mao nga malimitahan ang koryente nga mahimo, ug magpugos sa mga tawo nga mosulod sa mga balay ug mogamit sa dugang mga appliances sama sa air-conditioning, electric fans para mahupay ang ka init, nga usab makadugang sa panginahanglan sa koryente.
UNSA MAY EPEKTO NIINI?
POWER RATIONING. Samtang ang Yellow Alert dili maoy kina-ingnan sa mga brown-out, ang kagamay sa back-up power nga magamit, nagpahimutang sa grid sa dako nga peligro, kay kon may lain pang planta nga madaut, kini magpahimutang na sa grid sa pugos nga pagbahin sa koryente, nga ikahasul sa kinatibu-ang konsumidor nga gi-alagaran sa grid.
MOMAHAL ANG BAYRANAN. Mahimo nga ang kakuwang sa koryente nga masupply sa grid, magpakuwang usab sa supply ngadto sa Wholesale Electricity Spot Market, nga giisip nga merkado alang sa ginagmay o tigi-tigi nga pagpalit sa supply nga gikinahanglan. Kon dyutay ra ang baligya, mahimong kini makapamahal sa presyo sa WESM.
IPASA ANG NAGASTO. Kon ang utilities company mopalit sa mas napamahal nga supply, sagad lamang usab nga ipasa kini sa mga namalit nga utilities ngadto sa mga konsumidor, kinsa maoy mag-agwanta, sa mga butang nga wala usab silay mahimo.
Samtang ang Yellow Alert usa lamang ka senyas nga ang supply kay kuwang alang sa panginahanglan, ang pagka-shutdown sa usa pa ka planta nga nagsupply, mahimong magpakuwang na sa supply nga kinatibuk-ang gikinahanglan, mao nga mahimo na hinuon nga RED alert nga makaingon sa brown-outs, pagrasyon sa supply ug pagmahal sa bayranan sa koryente.
UNSA MAY PWEDE MAHIMO?
Kay ang yellow alert mahitabo tungod kay daku ang panginahanglan ug damay ra ang supply, ang pagpakunhod sa panginahanglanb mahimo na nga makasolbad niini.
Ang pagpakunhod sa supply tungod sa daku nga panginahanglan, mahimong masolbas sa pagpagamay sa panginahanglan.
Pinaagi sa pagdaginot sa koryento, ug paglikay sa daku nga gamit sa koryente ilabi na sa mga oras sa adlaw nga labing taas ang paggamit niini, kini giisip nga makatabang aron makahatag hupay sa grid ug makapugong sa panginahanglan nga mosaka ang presyo sa koryente.
DENR mi-awhag: pananum ug kahoy para sa ‘carbon credits,’ sagang sa katalagman
Sinulat ni Rey Anthony Chiu
Ming-awhag ang Department of Environment and Natural Resources (DENR) ngadto sa mga katawhan ilabiu na sa pribado nga sector sa pag-apil sa proyekto niining forest restoration isip pamaagi nga mamkuha ang kompanya sa carbon credits ug lig-on nga kalibutang nakasugakod sa katalagman.
Kini samtang gipadayag ni DENR Secretary Raphael P.M. Lotilla nga ang mga kasalangan, dili lamang katigayonan sa kalikopan apan ekonomikanhong kabtangan usab.
Didto sa paglagdaay sa Memorandum of Understanding (MOU) tali sa DENR ug sa Ayala Group of Companies ubos sa programa niining Forests for Life: 5 Million Trees by 2028 program, gitumong sa proyekto nga makapananum ug magpabuhi sa 5 milyones ka kahoy nga tumindok sa kalasangan ug tubig-saluran sa Ilocos Norte, Bataan, Rizal, Leyte, Bukidnon, and Lanao del Norte.
Kini usab samtang ang Pilipinas nangandoy nga makakuha ug carbon credits pinaagi sa paghimog tugbang nga mga kalihukan nga makahigop sa carbon nga gibuga sa mga human activities ngadto sa kalikopan.
Matud ni Lotilla, unta dili lamang usab mangandoy nga mananom tungod sa carbon credits, tinguhaon unta nga mamahimo ang nasud nga mahi-apil sa regional hub, aron tan-awon kon tinuod ba nga may daghang kaayohan kon mamahimong regional o global hub.
Kini usab samtang gipasabut sa DENR secretary ang panginahanglan sa pagtinabangay sa kagamhanan ug sa pribado nga sector aron mahimong mas lukop ang mga resulta nga gilauman: pangkalikopan ug pangekonomiya.
Pananglit, sa gilagdaan nga MOA, samtang nanaad ang pribadong kompanya sa pagtuman sa iyang programa sa pagpananum, nga mag-apil na sa pagpili ug pag-andam sa lugar tamnan, pagmatubo sa mga liso nagdto sa lawngon, pagpananum ug magmintinar ngadto na sa pagpanalipud sa napatamnan nga mga lugar.
Sa MOA, kini nagtugot nga ang mga pribadong kompanya makagamit sa ilang mga kahinguhaan lakip na ang pagpalihok sa ilang mga gisagop nga komunidad alang sa pagpatunhay sa programa.
Sa katungod sa DENR, pinaagi sa iyang Forest Management Bureau ug nga buhatan, motabang sila pagpili sa mga tamnanan isip reforestation sites, magtanyag sa technical nga tabang sa pagkuha sa mga permits, pagmonitor sa programa ug pagseguro nga kini masukip sa public registry of partners sa DENR.
ANg mga kompanya nga mamakuha ug carbon credits, dili lamang makatabangs a kalikopan sa sa ekonomikanhong panginahanglan sa mga komunidad nga nagtanum niini, makakuha usab sila ug mga pundo gikan sa gawas sa nasud pinaagi sa mga carbon-finance institutions.
KRITIKAL ANG PAGPABALIK. Sa pila na ka tuig, hinay nga nangawala ang mga karaan ug tumindok nga mga kahoy nga mao usab ang gisaligan ug pagkaon sa mga langgam ug mga ihalas nga hayop, nga maoy gibuhat sa mga estudyante sa Clarin. Niini nga paagi, mapatambok ug balik ang mga kalasangan, kay sa mga karaang kahoy, mas mopaspas ang pagpahiuli sa mga kalasangan. (Hulagway gikan sa PIABohol/BPEMO)
BTr mi-awhag sa publiko sa pag-invest sa RTB31
Sinulat ni Elvira Bongosia
Gi-awhag sa Bureau of Treasury (BTr) ang publiko sa pag-apil sa pinakabag-ong retail treasury bonds sa ahensya nga nagtanyag aron makadaginot sa ilang kwarta, samtang nagtabang usab sa nasudnong kagamhanan sa pagtigom ug pondo alang sa mga proyekto sa kalamboan sa nasod.
Niadtong Agosto 5, gilusad sa BTr ang Ika-31 nga tranche sa Retail Treasury Bonds (RTB).
Matud pa ni BTr-Bohol Chief Treasury Operations Officer II Chloe Redeja, kini nagpasiugda sa paghatod sa saad ni Presidente Ferdinand R. Marcos, Jr. aron mahimo ang pagtigom ug pagpamuhonan nga ma-access sa matag Pilipino.
Ang RTB 31 usa ka 5 ka tuig nga tenor investment nga adunay gross interest rate nga 6.000% kada tuig, nga bayran matag quarter hangtod sa pagka-mature niini sa Agosto 20, 2030.
Matud pa ni Redeja nga ang ang pagtanyag sa publiko magsugod Agosto 5, 2025 hangtod Agosto 15, 2025.
Uban sa minimum nga pohunan nga P5,000 lang, ang RTBs accessible ug halos walay risgo nga investment instruments nga gigarantiyahan sa tibuok pinansyal nga kapasidad sa gobyerno sa Pilipinas.
Ang tanan nga mga Pilipino, dinhi ug sa gawas sa nasud, dali nga makapahimulos sa ilang kaugalingon sa mga RTB aron makatabang sa pagpauswag sa ilang kinabuhi ug pagsuporta sa mga programa ug proyekto nga prayoridad sa publiko aron makab-ot ang inklusibo nga pagtubo.
Aron maabot ang mas daghang Pilipino, ang mga RTB anaa na sa counter, pinaagi sa online banking, ug labing bag-o sa GBonds pinaagi sa GCash, nga naghimo sa pagpamuhunan nga yano sama sa pagpalit ug load.
Sa pakigtambayayong sa Philippine Digital Asset Exchange (PDAX) ug Bonds.ph, ang GBonds nagtugot sa hingpit nga verified users nga mamuhonan sa government bonds sa ubos sa P 500 ug walay bank account nga gikinahanglan.
Dili kinahanglan ug dakung puhonan aron mokita. Pag-invest sa RTB 31 diin sa ubos nga kantidad nga ₱5,000, mokita ug guaranteed interest matag quarter, ug himuong mas secured ang kaugmaon. (Hulagway gikan sa BTr)
LGU-San Isidro gihimong permanenteng stratehiya ang CDD
Sinulat ni Elvira Bongosia
Unang gihangop sa lungsod sa San Isidro, usa ka nagtubo nga 5th-class nga munisipyo sa Bohol, ang Kapit-Bisig Laban sa Kahirapan-Comprehensive and Integrated Delivery of Social Services (KALAHI-CIDSS) nga programa sa Department of Social Welfare and Development (DSWD) niadtong 2014 nga nagbutang sa pundasyon alang sa participatory nga pagdumala ug transparency.
Sa pagtukod niini nga pundasyon, gisugdan sa LGU San Isidro ang pag-institutionalize sa Community-Driven Development (CDD) approach sa 2023. Paglabay sa duha ka tuig, ang LGU mi-issue ug Ordinance No. 11 nga nagpasiugda sa proseso sa CDD ug pagpagana sa pagpatuman sa mga proyekto nga gipangulohan sa barangay sa tanang 12 ka barangay.
Kini nga mga inisyatibo wala lamang nagsagop sa gipaambit nga mga pamaagi sa pagpondo apan gipalig-on usab ang empowerment ug transparency sa komunidad.
Ang CDD ordinance sa LGU San Isidro nagsiguro sa pag-apil sa komunidad sa pag-ila sa mga panginahanglan, pag-una sa mga interbensyon sa kalamboan, paggahin ug mga kahinguhaan para sa imprastraktura ug serbisyong sosyal, ug pagsagop sa Community Empowerment Activity Cycle (CEAC) isip estratehiya alang sa malungtaron kalamboan.
Ang CDD, ang kinauyokan nga estratehiya sa KALAHI-CIDSS, mao ang paagi diin ang DSWD makapahimo sa mga barangay nga manguna sa mga inisyatibo sa lokal nga kalamboan uban ang participatory decision-making, transparency, ug shared responsibility tali sa mga komunidad ug gobyerno nga manguna sa mga proyekto sa infra sa barangay.
Sa tuig 2025, ang 12 ka barangay sa San Isidro – Abehilan, Baryong Daan, Baunos, Cabanugan, Caimbang, Cambansag, Candungao, Cansague Norte, Cansague Sur, Causwagan, Masonoy, ug Poblacion – malampusong migamit sa CDD approach.
Ang matag barangay mipatuman sa pagkonkreto sa ilang barangay road—usa ka prayoridad nga giila pinaagi sa participatory consultations. Aron pagsuporta niini, ang Municipal Local Government Unit (MLGU) niisyu ug Executive Order nga naggarantiya sa P200,000 Municipal Counterpart kada barangay ug P200,000 nga Barangay Counterpart matag proyekto.
Kining shared funding scheme naghatag ug gahom sa mga barangay sa pagpanag-iya sa ilang imprastraktura samtang nag-awhag sa responsable nga pagpatuman.
Aron mapalig-on pa ang pagkamay-tulubagon ug performance, ang MLGU mipalabang sa Ordinance No. 1 series of 2025, nga nagtanyag ug P20,000 nga cash incentive matag usa ngadto sa top-performing barangays ubos sa tulo ka mga kategoriya: Best in Liquidation, Best in Implementation, ug Best in BDC-TWG Functionality.
Kini nga sistema sa ganti nga gibase sa mga resulta nagpataas sa moral ug nagsiguro sa taas nga kalidad, tukma sa panahon nga paghatud sa mga sub-projects.
Ingon usab, pagsunod sa usa ka Participatory Organizational Capacity Assessment (POCA) kauban ang local People’s Organizations, si Mayor Diosdado Gementiza miila sa mahinungdanong mga dapit alang sa pag-uswag ug gisugdan ang pagbansay sa pagpauswag sa kapasidad aron mapalig-on ang ilang mga kapabilidad, pagsiguro nga walay mabiyaan sa proseso sa kalamboan.
Pinaagi sa pagdawat sa CDD dili lang isip usa ka proyekto, apan isip usa ka permanente nga estratehiya sa pagdumala, ang munisipyo nagpahimutang sa pundasyon alang sa lig-on, inklusibo, ug pag-uswag nga gipangulohan sa mga tawo.
Ang kalamposan sa lungsod sa San Isidro sa pagsagop sa “lokal nga KALAHI” usa ka testamento sa kung unsa ang posible kung kanus-a ang mga lungsoranon gihatagan ug tingog—ug kon ang gobyerno maminaw. (Hulagway gikan sa DSWD-7 photo)
Seafaring OFW returnees gidasig sa DMW sa pagsalmot sa business plan competition
Sinulat ni Elvira Bongosia
Ang Department of Migrant Workers (DMW) mi-awhag sa mga sea-based Overseas Filipino Worker returnees nga mosalmot sa usa ka business plan competition nga may P500,000 nga premyong salapi.
Ang Likhang Marino Business Plan Competition nagtumong sa pagtabang sa mga namalik nga marinero nga mahimong mga negosyante.
Ang kompetisyon usa ka plataporma nga nagpalambo sa mga bag-ong ideya sa negosyo ug suportang pinansyal usab ug pagdumala sa negosyo.
Aron maka-qualify sa Likhang Marino, kinahanglan sila nga mga dokumentado nga OFW seafarers nga nakabalik na sa Pilipinas pagkahuman sa Hunyo 1, 2020, ug sukad sa pagbalik sa Pilipinas permanente na silang nanimuyo sa nasud ug wala pa mo-abroad alang sa pagpanarbaho, ug wala sila karon naglihok sa bisan unsang negosyo.
Dili usab kwalipikado nga mosalmot sa kompetisyon ang mga kanhi seafarer OFWs nga nakadawat ug bisan unsang programa sa National Reintegration Center for OFWs (NRCO) Kabuhayan program sama sa: Livelihood Assistance Development Program (LADP), Balik Pinay Balik Hanapbuhay (BPBH), Sa Pinas Ikaw ang Ma’am/Sir (SPIMS), Tulong Puso (TP), Linangin ang Kakayahan sa Kabuhayan Award (LIKHA).
Ang kompetisyon bukas sa orihinal ug pagsugod sa mga plano sa negosyo.
Ang mga aplikante gikinahanglan nga makumpleto ug isumite ang ilang mga entries sa LIKHA application portal hangtod Agosto 15, 2025.
Ang mga aplikante kinahanglang mosumiter sa ilang LIKHAng Marino nga aplikasyon online pinaagi sa Google form o QR code pinaagi sa NCRO o NMP (National Maritime Polytechnic) Facebook pages o sa DMW Regional Offices.
Ang grand winner makadawat ug P500,000 nga ganting salapi, ang second placer awardee makadawat ug P300,000 nga cash, ug ang third placer adunay P200,000.
Ang matag usa sa 12 ka finalists makadawat usab ug P100,000 ug trophy. (ECB/PIA7-Bohol)
Una nang gitakda sa Agosto 8 ang pagsumite sa mga entries sa LIKHA application portal apan gilugwayan kini taman sa Agosto 15, 2025. (Hulagway gikan sa DMW)
BALAK
ANG GIPANGANDOY NGA HIMAYA
Sinulat ni Engr. Rogelio Podelino
Sa kapunawpunawan didto sa kalangitan
Mga angheles ug mga kerubines nag-ambahan
Naghimaya sa LANGITNON’G HARI
Ang tinubdan sa tanan’g kinabuhi
Ang pagpuyo sa tawo dinhi sa kalibutan
Sa hinulaman nga kinabuhi angay ampingan
Kay ang tanan aduna’y kinutuban
Busa mangandam sa takna nga tanan
Ang kalipay nga kalibutanon lumalabay
Sa katagbawan sa tawo dili makahumpay
Daw duna’y haw-ang sa imong galamhan
Nga gusto nimo nga pagahulipan
Kay ang tawo ulipon man sa sala
Ang iyang baruganan labihan kahaguka
Aron makalampas sa mga pagsulay
Dangop KANIYA aron dili ka magmahay
Ang kinauyokan nga tuyo pagpakabuhi sa tawo
Nga madagaya-on ang kahimtang sa husto
Kon unsa’y buhaton aron mahidangat sa langit
Ang dapit nga wala na ang mga kasakit
Matag tawo nga mituo nga aduna’y GINOO
Nangandoy nga sa IYANG gingharian makaadto
Didto ang tanan nagmaya sa wala’y katapusan
ANG GIPANGANDOY NGA HIMAYA kon motaliwan na kita ning kalibutan