Sinulat ni Elvira Bongosia
Nunot sa kalampusan sa “Kadiwa ng Pasko” atol sa panahon sa Pasko, si Presidente Ferdinand R. Marcos Jr. niadtong Lunes, Pebrero 27, nilusad sa “Kadiwa ng Pangulo” sa dakbayan sa Sugbo aron mahatagan ang mga konsumidor ug presko ug barato nga mga produkto sa agrikultura ug pangisda.
Sa iyang pakigpulong, si Presidente Marcos nalipay sa pagpalapad sa Kadiwa caravan ug miingon nga kini dili lamang makatabang sa mga Pilipino sa pagsagubang sa mga epekto sa pagsaka sa presyo sa pagkaon apan sa pagdugang usab sa kita sa mga lokal nga mag-uuma, mangingisda ug gagmay nga mga negosyo.
“Dati ang nagsimula nito ay ‘yung Kadiwa ng Pasko. Gumawa ng Kadiwa para noong Christmas season. Iyon lamang ay napuna namin ay napaka popular at gustong-gusto ng tao dahil nga naman ay may bilihin na mas mura kaysa sa makukuha sa labas,” giingnan sa Presidente ang mga lokal nga suppliers ug mga konsumidor nga didto sa Cebu Provincial Capitol Grounds.
Ang Kadiwa nga programa usa ka farm-to-consumer market chain nga nagwagtang sa mga intermediary, nga nagtugot sa mga lokal nga prodyuser nga makamugna ug mas taas nga kita pinaagi sa pagbaligya sa ilang produkto direkta ngadto sa mga konsumidor.
Si Presidente Marcos, kinsa nagsilbi usab nga kalihim sa Department of Agriculture (DA), sa sayo pa misaad nga lugwayan ang programa sa Kadiwa lapas sa panahon sa Pasko aron padayon nga matabangan ang mga Pilipino taliwala sa pagtaas sa gasto sa mga nag-unang palaliton tungod sa inflation.
Ang Presidente miingon nga adunay kapin sa 500 ka mga tindahan sa Kadiwa sa tibuok nasud, ug mibutyag sa plano sa gobyerno sa paglusad sa “Kadiwa para sa Manggagawa” nga pagapangunahan sa Department of Labor and Employment (DOLE).
