Sinulat ni Dave Albarado
Bag-o na ang commanding officer sa 47th Infantry Batallion (IB) sa Philippine Army nga nagbase dinhi sa Bohol, matud pa sa mga taho.
Kini human gipahigayon ang change of command kagahapon alang sa bag-ong commanding officer sa 47th IB sa Philippine Army dinhe sa lalawigan.
Ang gihulipan nga commanding officer sa 47th IB sa Philippine Army dinhi sa Bohol mao si Lt. Col. Allan Tabudlo human sa duha ka tuig niya nga tour of duty dinhi sa Bohol.
Si Lt. Col. Tabudlo gihulipan ni Lieutenant Colonel Allyson Depayso nga maoy bag-ong commanding officer.
Gikan si Depayso sa 303rd Infantry Brigade sa Philippine Army nga sakop gihapon sa 3rd Infantry Division.
Matod ni 1Lt. Elma Grace Remonde, ang Civil Military Operations Officer sa 47th IB nga usa ka exklusibong kalihokan ang gipahigayon niadtong adlaw nga Huwebes didto sa Camp Rajah Sikatuna nga nahimutang sa barangay Katipunan, Carmen, Bohol, isip pagsunod sa health protocols ug paglikay sa dinaghang tapok aron malikayan ang pagkatap sa Coronavirus disease (Covid).
Dugang ni Remonde nga mabalhin si Tabudlo ngadto sa 3rd Infantry Division sa Philippine Army nga nagbase sa Jamindan, Capiz.