Uban sa dakong pagpaubos ug mapasalamaton nga kasingkasing, ako nagapasalamat una sa tanan sa Ginoo, ang Maayong Magbalantay, nga sa Iyang walay kinutuban nga kahigugma ug kaalam, nagtawag kanako sa pag-alagad isip inyong Obispo.

Sa pagkatinuod, dili ako takos sa maong tahas, ug nasayod ako sa akong mga kahuyang ug kakulangan. Apan sa taliwala niini, ako mosalig nga ang grasya sa Ginoo igo ug labaw pa, ug nga ang tanan mahitabo sumala sa Iyang kabubut-on.

Sa dugay nga panahon nga paghulat, nakita ko ug nabati ang kalig-on sa atong pagtoo isip usa ka komunidad. Ang inyong mga pag-ampo, pagpailub, ug paglaum wala lamang nagpamatuod sa inyong gugma sa Simbahan, kondili usa usab ka pahinumdom nga ang Ginoo maglihok sa hustong panahon. Busa karon, uban sa dako nga kalipay, ako nagpasalamat kaninyong tanan nga naghiusa sa pag-ampo aron hatagan kita og bag-ong magbalantay. Ang inyong mga pangamuyo akong gidala, ug kini magpadayon nga akong kusog ug sandigan sa akong pag-alagad kaninyo.

Dili kini akong panaw lamang, kondili atong panaw isip usa ka pamilya sa pagtoo. Gitawag kita sa paglakaw nga nagkahiusa, nagtinabangay, ug nagtinahuray, samtang kita gigiyahan ni Kristo nga atong Maayong Magbalantay.

Malipayon kong ipaambit kaninyo nga ang akong Episcopal Ordination and Installation pagabuhaton sa Mayo 26, 2026 (Martes), 9:00 sa buntag sa Katedral ni San Jose sa Syudad sa Tagbilaran.

Gidapit ko ang tanang kaparian, relihiyoso ug relihiyosa, ug tanang katawhang matuohon nga maghiusa niining mahinungdanon nga selebrasyon sa atong Diyosesis.

✠ EPISCOPAL CONSECRARION (Ordination)

  • Principal consecrator: Most Rev. Alberto “Abet” S. Uy, D.D., Arsobispo sa Sugbo
  • Co-consecrators:
  • Most Rev. Crispin “Bai” Varquez, Obispo sa Boronggan
  • Most Rev. Socrates “Soc” Mesiona, Obispo sa Apostolic Vicariate of Puerto Princesa

✠ CANONICAL POSSESSION (Installation)

  • Installing Prelate: His Grace, Most Rev. Charles John Brown, Apostolic Nuncio

Sa pagsugod sa akong ministeryo, ako mapahiubsanon nga nagahangyo sa inyong padayon nga pag-ampo. Hinaut nga ang Espiritu Santo maggiya kanato sa pagtukod sa usa ka Simbahan nga mas lig-on sa pagtoo, mas buhi sa paglaum, ug mas mapuno sa gugma ug pag-alagad sa isigkatawo.

Magkita kita sa Mayo 26 – usa ka adlaw sa grasya alang sa atong tanan.

Daghang salamat ug ang Ginoo magapanalangin kanatong tanan.

By:
Bishop Gerardo Saco Jr