Bohol Light Andam na serbisyo sa Undas 2026
Sinulat ni Sheryl B. Paga
Ang Bohol Light niduyog sa pagpangandam sa “Undas 2026” alang sa kinatibuk-ang kasaulogan sa panahon sa paghandum sa adlaw sa mga santos ug sa mga minahal sa kinabuhi nga atoa na sa laing kalibutan. Gihatagan ug dakong pagpangandam ang mas epsiyente nga supply sa kuryente sa mga sam-ang dinhi sa syudad sa Tagbilaran.
Andam usab ang “Quick Response Team” sa Bohol Light alang sa mas dali nga pagresponde kung adunay mahibagat nga mga problema sa koneksyon sa kuryente ilabi na atol sa pagsaulog sa mga misa diha sa nagkalain-laing mga sementeryo sulod sa franchise area.
Gawas pa niana, ang buhatan sa Bohol Light nagpahigayon usab ug kompetasyon diha sa opisina tali sa mga departamento diin nagpakita sa mga talento sa pagdekorar isip magsaulog sa “Halloween” uban sa mga kabataan nga sakop sa pamilya sa Bohol Light. Madasigon kining gisalmutan sa tanang mga empleyado ug naghatag ug kalipay sa usag-usa bisan paman sa mga hagit sa pagpanarbaho.
Nagpakita kini ug dugang kasadysa sa mga kabataan ug ngadto sa mga konsumidor nga nakasaksi sa maong kalihukan. Ang maong kasaulogan usa sa mga importanting okasyon sa matag kinabuhi diin ang pamilya maoy sentro aron kita makabaton ug mas lig-on nga kumunikasyon ug koneksyon tali sa kompanya ug empleyado.
Bulawanon ang maong kalihukan sa Bohol Light nga nasinate sa mga empleyado sa ikaduhang higayon ubos sa pagdumala sa Primelectric Holdings Inc. (PHI). Naghatag kini ug dibersyon o kausaban sa mag panglantaw sa mga empleyado ug paglaum sa mga konsumidor. Sa ingon niini, madasigon ang tanan sa pagpaambit sa mga kalampusan aron mapadangat sa kinatibuk-ang kumunidad dinhi sa ‘syudad sa Tagbilaran.
Sulod sa duha na ka tuig ang nakalabay, pasalig sa Bohol Light ang paghatag ug mas sadya ug walay puas nga paghatag ug inspirasyon alang sa taga Tagbilaranon.
Pag “upgrade” sa mga linya gihimo sa Bohol Water
Sinulat ni Victor L. Tambis
Mga tinugyanan sa Distribution Section naghimo sa mga kalihokan pag upgrade sa mga linya sa Bohol Water
Agi’g dugang kalambo-an sa serbisyo sa panubig, lakip nga gihatagan ug unang pagtagad sa Bohol Water mao ang pag “upgrade” sa mga linya nga nagasubay gikan sa mga tinubdan ug ngadto padulong sa mga konsumidor. Usa niini mao ang linya sa eskina Espuelas St ug ang pagsumpay sa bag-o’ng linya nga nagasubay sa B. Inting St, Tagbilaran City nga gihimo niadtong adlawng Myerkules, October 28, 2026 diin naga sumpay kini sa main line nga naga subay sa J.A. Clarin St. Ang maong main line mao ang giagian sa bulo-og sa tubig gikan sa mga tinubdan o pumping stations nga nahimutang gawas sa syudad sa Tagbilaran.
Ang upgrading sa nahisgutang mga linya nakahatag ug dugang supply sa downtown area ilabi na sa Barangay Pob. 2 ug parte sa Barangay Cogon, diin kaniadto, naka sinati kining mga dapita sa hinay ang pressure sa tubig. Atong mahinumduman nga sa niaging semana, o niadtong Octobre 23, 2026, gihimo sa Bohol Water ang flushing o pagpagawas sa tubig sa main line nga nagasubay sa J.A. Clarin St. gikan sa lungsod sa Corella aron pagseguro ug pag mentenar sa kalidad sa tubig ug agi usab ug pagpangandam sa dugang supply gikan sa nagpadayon nga pag ugmad sa mga tinubdan o pumping stations sa maong Kompanya.
Ang Bohol Water padayon sa pagpangandam sa epekto sa umaabot nga gibalita nga kusog o strong El Niño diin matud pa masinati kini sa bulan sa Desyembre ning tuiga ug molanat hangtod na sa hingapos sa sunod tuig 2027.
Subay niini, ang Bohol Water padayon nga nag-awhag sa mga konsumidor sa pag obserbar sa mga “Water saving tips” ug hustong paggamit sa tubig aron malikayan ang pagnihit niini.
Obispo Varquez nanawagan sa mga magtutuo nga panalipdan ang kinaiyahan sa Bohol samtang gidawat ang pag-uswag
Sinulat ni Elvira C. Bongosia
Nanawagan si Bishop Crispin “Bai” Varquez sa mga magtutuo nga panalipdan ang kinaiyahan sa Bohol, samtang gidawat ang kalamboan nga dili isakripisyo ang mga mithi, kultura, ug identidad sa probinsya.
Sa iyang mensahe human sa iyang pagka instalar isip ika-8 nga Obispo sa Diocese of Tagbilaran, gipasiugda ni Varquez nga ang pagtubo sa ekonomiya kinahanglan maglakip sa kaayohan sa mga mamumuo ug sa mga lokal nga komunidad, lakip na usab ang pagtabang sa sunod nga henerasyon sa mga mag-uuma aron mahimong kompetitibo ang agrikultura.
Gipahinumdoman usab niya ang katawhan nga ang turismo dili lamang nagdepende sa mga turista, ug mga negosyante, apan sa hiniusang paningkamot sa tanang sektor nga adunay papel sa industriya.
Niadtong Martes, Oktubre 27, 2026, sa St. Joseph the Worker Cathedral Shrine sa syudad sa Tagbilaran gipahigayon ang Santos nga Eukaristiya, canonical possession ug solemne nga pag-instalar kang Varquez.
Gipangunahan kini ni Manila Archbishop Jose Cardinal Advincula Jr., uban sa Apostolic Nuncio sa Pilipinas nga si Archbishop Charles Brown, Cebu Archbishop Alberto Uy, ug uban pang mga obispo nga kauban sa pagsaulog sa Misa.
Sa iyang wali, gipasiugda ni Advincula ang kamahinungdanon sa pagpaubos ug kayano diha sa pagtuman sa misyon sa usa ka obispo, ug gihisgotan ang panginahanglan nga magpabiling debotado kang Kristo samtang nag-alagad sa Simbahan ug sa katawhan niini.
Si Varquez, nga lumad sa Sevilla, natawo niadtong Disyembre 5, 1960. Gisugdan niya ang iyang pag-alagad isip pari sa Diocese sa Tagbilaran, diin siya gi-ordenahan niadtong Abril 14, 1989. Sa ulahi, naghupot siya ug mahinungdanong mga katungdanan sulod sa maong diocese, lakip na ang pagserbisyo isip formator sa seminaryo ug vicar general.
Niadtong Agosto 2007, gitudlo siya ni Papa Benedicto XVI isip obispo sa Borongan, Eastern Samar. Nadawat niya ang iyang ordinasyon isip obispo niadtong Oktubre 18, 2007, ug pormal nga gipahimutang sa iyang katungdanan sa Borongan niadtong Nobyembre 8 sa maong tuig. Human sa hapit 19 ka tuig nga pagpangulo ug pag-atiman sa diocese sa Eastern Samar, mibalik si Varquez sa Bohol aron mangulo sa diocese diin nagsugod ang iyang bokasyon.
Niadtong Oktubre 27, 2026, gitimaan ang usa ka mahinungdanon ug makasaysayanong yugto sa kinabuhi sa Diocese of Tagbilaran, diin giabi-abi niini ang pagbalik ang usa sa iyang kaugalingong anak, si Most Rev. Crispin “Bai” B. Varquez, isip ika-8 nga Obispo sa Tagbilaran. (Hulgwagy gikan ni Elvira C. Bongosia/PIA7-Bohol)
DOLE nagpagawas ug mga giya sa kompensasyon alang
sa mga sakit nga may kalabotan sa kainit atol sa El Niño
Sinulat ni Elvira C. Bongosia
Subay sa direktiba ni Presidente Ferdinand R. Marcos Jr. nga panalipdan ang panglawas, kaluwasan, ug kaayohan sa mga mamumuong Pilipino taliwala sa mga hagit nga may kalabotan sa klima, ang Department of Labor and Employment (DOLE) nagpagawas ug mga giya nga nagklaro sa katungod sa pagdawat ug kompensasyon alang sa heat stroke, heat cramps, heat stress ug mga sakit nga dala sa kainit ubos sa Employees’ Compensation Program (ECP) atol sa El Niño ug uban pang mga panahon nga grabe ang kainit.
Ubos sa Labor Advisory No. 19, Series of 2026, nga gilagdaan ni DOLE Kalihim Francis N. Tolentino niadtong Oktubre 23, 2026, gilatid sa DOLE ang mga giya alang sa pagpugong, pagdokumento, ug pagtaho sa mga sakit nga may kalabotan sa kainit diha sa trabahoan, ingon man ang proseso sa pagpasaka ug pagtimbang-timbang sa mga claim alang sa mga benepisyo sa employees’ compensation.
Ang uban pang mga sakit nga may kalabotan sa kainit sa trabaho nga mahimong ikonsiderar naglakip sa heat syncope, heat rash, kadaot sa kaunoran, kadaot sa kidney tungod sa dehydration, ug mga sakit sa neurological.
Ang mga lagda naglangkob sa mga trabahante nga nakaseguro ubos sa ECP pinaagi sa Social Security System ug sa Government Service Insurance System nga naladlad, o mahimong makatarunganon nga gilauman nga maladlad, sa sobra nga kainit sa sulod o gawas sa mga trabahoan.
Sa pagtimbang-timbang sa mga pag-angkon, ang mga awtoridad mahimong magkonsiderar sa kinaiya sa mga katungdanan sa usa ka trabahante, mga kondisyon sa trabahoan, ang gidugayon ug kakusog sa pagkaladlad sa kainit, mga kagamitan sa pagpanalipod, ug mga lakang sa pagpugong.
Ang mga klasipikasyon sa heat index nga gi-isyu sa state weather bureau nga PAGASA mahimo usab nga mosuporta sa pagtimbang-timbang.
Ang mga employer kinahanglan nga magtipig ug mga rekord sa mga sakit nga may kalabotan sa kainit sa trabaho, motabang sa mga apektadong trabahante o sa ilang mga benepisyaryo sa pag-file sa mga pag-angkon sa kompensasyon, ug motuman sa magamit nga mga kinahanglanon sa pag-report.
Ang nagsuporta nga ebidensya mahimong maglakip sa mga pagbasa sa temperatura sa trabahoan, mga iskedyul sa trabaho, mga rekord sa kaluwasan sa trabaho, mga kahikayan sa pagpahulay sa trabaho, ug mga pahayag sa saksi.
Ang Employees’ Compensation Commission, pinaagi sa mga unit niini sa rehiyon, ug ang DOLE, pinaagi sa mga opisina niini sa rehiyon ug mga ahensya nga sakop niini, magpakatap sa mga giya ug maghatag og teknikal nga tabang aron suportahan ang pagpatuman niini.
Kapin 3K ka mga personahe gipakatap sa Bohol alang sa Undas 2026
Sinulat ni Elvira C. Bongosia
Kapin sa 3,000 ka mga pulis, sundalo, personahe sa coast guard ug bombero, mga trabahante sa disaster management, ug mga boluntaryo ang magbantay sa seguridad sa probinsya atol sa Undas o All Saints’ Day ug All Souls’ Day 2026.
Niadtong Miyerkules, Oktubre 28, ang Bohol Police Provincial Office (BPPO) nagpahigayon ug “send-off ceremony” alang sa 3,036 ka mga personahe nga ipakatap sa tibuok probinsya aron maghatag ug seguridad ug motubag sa mga emerhensya atol sa Undas.
Ang seremonya, nga gipahigayon sa Camp Dagohoy ning syudad nga gipangunahan ni BPPO Provincial Director PCol. Patricio C. Degay Jr., nagpakita sa hiniusang pagpangandam sa nagkalain-laing ahensya sa gobyerno aron masiguro ang kaluwasan sa publiko samtang handumon sa mga tawo ang ilang mga mitaliwan nga minahal sa kinabuhi karong Nobyembre 1 ug 2.
Sa kinatibuk-ang gidaghanon sa mga personahe nga ipakatap, 1,334 ang gikan sa Philippine National Police (PNP), samtang 403 ang gikan sa Armed Forces of the Philippines (AFP), Bureau of Fire Protection (BFP), ug Philippine Coast Guard (PCG).
Dugang pa, 1,299 ka mga personahe ang magagikan sa mga opisina sa disaster risk reduction and management, mga medical team, barangay public safety officers, force multipliers, ug mga non-government organization.
Ang mga representante gikan sa Philippine Army, PCG, ug BFP mitambong usab sa maong seremonya, nga nagpakita sa maayong koordinasyon tali niining mga ahensya sa pagmintinar sa kalinaw ug pagpanalipod sa publiko.
Sa iyang mensahe, gipahayag ni Degay ang iyang pasalamat ngadto sa mga opisyal ug personahe nga miapil sa mga pagpangandam. Gihatagan niya ug gibug-aton ang kamahinungdanon sa disiplina, hugot nga koordinasyon, ug kanunay nga pagka-alerto aron mapadayon ang kalinaw ug kahusay sa tibuok probinsya.
Iya usab gipahinumdoman ang mga personahe nga ampingan ang ilang panglawas ug kaluwasan aron magpabilin silang andam sa pagtuman sa ilang mga katungdanan ug paghatag ug epektibong serbisyo.
Gi-awhag ni Degay ang publiko sa pagtuman sa mga protocol sa seguridad, ug makigtambayayong sa kapulisan ug uban pang mga awtoridad aron masiguro ang luwas ug malinawon nga Undas 2026.
Gibanabana sa kapulisan nga mokabat sa 240,800 ka tawo ang mobisita sa mga sementeryo sa tibuok Bohol, lakip na ang mga turista ug mga Bol-anon nga mipauli aron paghinumdom sa ilang mga namatay nga minahal sa kinabuhi.
Ang Bohol Police Provincial Office (BPPO) nagpahigayon ug send-off ceremony niadtong Miyerkules, Oktubre 28, 2026, didto sa Camp Dagohoy sa dakbayan sa Tagbilaran, alang sa 3,036 ka mga personahe nga ipakatap sa tibuok probinsya aron maghatag ug seguridad ug motubag sa mga emerhensya atol sa pagtimaan sa Undas 2026. (Hulagway gikan sa PNP-BPPO)
Mga kwalipikadong SSS members nga may monthly salary ₱10K
paubos makadawat ug hangtod ₱8K isip tabang gikan sa UPLIFT
Sinulat ni Elvira C. Bongosia
Gipahibalo niadtong Miyerkoles sa Social Security System (SSS) nga ang mga kwalipikadong miyembro ubos sa gipalapad nga sakop sa UPLIFT Assistance program sa Department of Social Welfare and Development (DSWD) makadawat ug pinansyal nga tabang nga moabot sa ₱8,000, sugod karong Oktubre 30, 2026.
Kini nga hugna sa pagpanghatag maglakip sa mga kwalipikadong miyembro sa SSS nga adunay monthly salary credits (MSC) nga dili molapas sa ₱10,000.
Ang UPLIFT Assistance naglangkob sa upat ka hugna (tranches) nga tag-₱2,000 matag usa, nga direktang i-kredito ngadto sa ilang narehistro nga SSS disbursement accounts.
Ang DSWD, inubanan sa SSS, nagpalapad sa programa aron maghatag ug dugang nga tabang ngadto sa mga kwalipikadong miyembro nga adunay MSC nga dili molapas sa ₱10,000—dugang pa sa tabang nga kaniadto gitanyag na alang sa mga miyembro nga adunay MSC nga moabot sa ₱20,000.
Gipasiugda hinuon sa SSS nga ang pagbaton ug MSC nga dili molapas sa ₱10,000 wala nagpasabot nga awtomatikong kwalipikado ang usa ka miyembro alang sa UPLIFT Assistance.
Aron mahimong kwalipikado, ang mga miyembro kinahanglan nga nakabayad ug labing menos usa ka kontribusyon sa SSS sa tuig 2025 o 2026, ug kinahanglan usab nga nalakip sa database sa 2024 Community-Based Monitoring System (CBMS) sa Philippine Statistics Authority (PSA). Kinahanglan usab nga narehistro nila ang ilang disbursement accounts pinaagi sa SSS Disbursement Account Enrollment Module (DAEM) sulod sa gitakdang panahon.
Gi-awhag ang mga miyembro sa pagsusi sa ilang mga My.SSS account alang sa opisyal nga mga pahibalo mahitungod sa ilang kwalipikasyon alang sa UPLIFT Assistance.
Samtang ang mga kwalipikadong miyembro sa SSS nga adunay MSC nga ₱20,000 gikatakdang makadawat sa ikatulo ug ikaupat nga hugna sa UPLIFT Assistance—nga mokabat sa kinatibuk-ang ₱4,000—karong Nobyembre 6, 2026. Kini nagsunod sa malampusong pagpagawas sa DSWD sa una ug ikaduhang hugna sa tabang sayo ning tuiga.
Ang mga kwalipikadong benepisyaryo nga wala pa makadawat ug bisan unsang UPLIFT Assistance makadawat sa kinatibuk-ang kantidad nga ₱8,000, nga naglangkob sa tanang upat ka hugna. Kadtong nakadawat na sa unang duha ka hugna, nga mokabat sa ₱4,000, makadawat ug dugang ₱4,000 alang sa ikatulo ug ikaupat nga mga hugna. I-kredito kini nga dungan ngadto sa mga rehistradong disbursement account sa SSS sa mga benepisyaryo.
BALAK
TINUOD BA NGA ADUNAY LANGIT?
Sinulat ni Engr. Rogelio Podelino
Sukad sa pagka himugso nato sa kalibutan
Gimatuto kita sa atong mga ginikanan
Gibusog sa mga pagtulon-an nga Kristohanon
Aron magtubo nga buotan ug matinahoron
Gipasilsil sa alimpatakan ug.maayo
Ang NAPULO KA SUGO SA GINOO
Aron maoy sumbanan sa imong pagtuo
Magtubo nga hugot nga Katolikong Kristyano
Sa mga pagtulon-an ni JESU KRISTO
IYANG gitataw ang mga SUGO pag-ayo
Nga ang tawo nga nagtuman sa mga SUGO
Ang ganti ma-o ang langit maoy.pahimangno
Apan subo kaayong palandongon kanimo
Kay adunay mga tawo nga wala motuo
Nga adunay langit nga gitagana sa GINOO
Sumala sa gipadayag ni JESU KRISTO
Diha masuta kon unsa kalubas imong pagtuo
Kabahon sa langit nga gisaad ni JESU KRISTO
Kay ang kamatayon maoy bugtong pultahan
Paingon sa langit nga maoy imong padulngan
Kon ikaw hugot nga Katolikong Kristyano
Wala magduda sa mga pagtulun-an sa GINOO
Kay ang tawo aduna may katapusan
Ang kinabuhing langitnon gipangandaman
Kay ang kinabuhi aduna may utlanan
Mga kasakitan ug sakripisyo gi-antos tanan
Hinulsulan ang tanang kalapasang nahimo
Mangayo ug pasaylo nga tim-os sa GINOO
Sa dinhi pa si JESU KRISTO sa kalibutan
Kanunayng gisangyaw ang langit sa katawhan
Hinulsuli ang nabuhat ninyong mga kasal-anan
Atu-a sa langit nagpaabot ang DIOS AMAHAN
Kay ang pagpakabuhi sa tawo ning kalibutan
Ang tuyo ma-o man ang langitnong kaluwasan
TINUOD BA NGA ADUNAY LANGIT?
Si JESU KRISTO maoy nagmatuod nga ang
DIOS AMAHAN ana-a sa langit