Pugos ang quarantine alang sa mga gikan sa mga nasud nga adunay bag-ong matang sa COVID-19 

Sinulat ni Rey Anthony Chiu

Pugos nga 14 ka adlaw nga quarantine didto sa pasilidad sa New Clark City, sa mga mosulod sa nasud nga nagagikan sa mga nasud nga adunay gikataho nga kaso sa bag-ong matang sa Coronavirus disease (COVID-19).

Gani, sumala sa sugyot sa Inter Agency Task Force on the management of Emerging Infectious Diseases (IATF-EID) kini, bisan pa kon mo pasar sila sa ilang obligasyon nga makapakita sa negatibo nga resulta sa Reverse Transcription Polymerase Chain Reaction (RT-PCR).  

Kining tanan subay sa temporaryo una nga pagpa-undang sa mga byahe gikan sa United Kingdom ngadto sa Pilipinas, matud pa sa Department of Health (DOH), ug subay sa desisyon sa IATF-EID nga gilatid sa Resolution No. 90, nga nagsugyot ug travel ban taman sa Disyembre 31, 2020 ug gilugwayan ug duha ka semana sa Bureau of Immigration, human mikanaog ug mando si Presidente Duterte.

Niini, sa pagka karon, kadtong mga mingbyahe o nagagikan sa Hong Kong, Singapore, Australia, South Africa, ug Japan gipangayoan na ug pugos nga quarantine sulod sa 14 ka adlaw, bisan pa mo negatibo sila sa COVID pinaagi sa RT PCR testings, sumala sa DOH.

Kuyog usab niini, ang DOH hingpit nga nagtutok sa tanang nasud nga adunay dokumentado nga kaso sa bag-ong matang sa COVID-19.

Matud gihapon sa DOH, ang tanan nga positibo sa RT-PCR nga mga samples ilabi na kadtong gikan sa United Kingdom, ginaduso na ngadto sa Philippine Genome Center, Research Institute for Tropical Medicine, ug sa University of the Philippines National Institutes of Health alang sa proseso nga gitawag ug genome sequencing aron mapalig-on pa ang biosurveillance  sa nasud.

Una na usab nga gisugyot sa DOH, subay sa rekomendasyon sa iyang mga batid, nga timbangon ug maayo ang paghimo sa pagpugong sa pagdawat sa mga byahe gikan sa mga nasud nga adunay natala nga bag-ong matang sa COVID-19 ilabi na kon may gikataho na nga local transmissions didto.

Nunot usab niini, gidason sa DOH ang kamahinungdanon sa pagtamud sa minimum public health standards (MPHS) pinaagi sa gibatasan nga pagpanghunaw, pagtuman sa maayong kina-iya sa pag-ubo ug pagpanghatsi, saktong paagi sa pagsuot sa face mask ug face shields, physical distancing sa usa ka metros ang kalay-on ug ang pagsiguro nga ang lugar nga pundohan, adunay igo nga air circulation.