Sakripisyo Alang sa Mahayag nga Ugma

Ni ELEAZAR TUTOR ACAMPADO

DILI nato malikayan nga bation ang nagkakusog nga reklamo sa katawhan mahitungod sa gipatuman nga austerity measures sa atong probinsiya sa Bohol. Kay lagi, ang Provincial Executive Order kun EO No. 13 nakamugna og nagkalain-laing interpretasyon, ilabi na sa bahin sa atong mga kalingawan ug pista.

Daghan god ang nagmulo kay nganong idili na ang disco. Kay nganong limitado ang basketball. Kay nganong initan man pista ug daghan pang uban nga makahatag og kalingawan ug kabibo sa katawhan.

Ang goberno man god, gikan sa nasyonal, probinsiyal hangtod na sa atong mga kalungsoran ug kabarangayan sa lalawigan, wala nagdili sa kalingawan tungod kay gusto nila nga kita magsubo. Gihimo kini tungod kay kita anaa sa tunga-tunga sa usa ka National Emergency (EO 110). Sa presyo sa krudo nga niabot na og kapin sa ₱148 matag litro, ang matag sentabo sa panudlanan sa local government unit kinahanglan nga ampingan og gastoon lang alang sa labing mahinungdanon nga mga aspeto sa serbisyo nga dako usab og epekto sa kadaghanan.

Sa prangkahay nga pagkasulti, dili lalim ang gasto sa pagpahigayon og disco. Ang dako nga sound system sa disco nagkinahanglan og dako nga wattage. Kinahanglan pa ang barangay o ang LGU mogasto og ₱10,000 hangtod ₱15,000 para lang sa transformer. Kinsa may mobayad niini? Ang pundo sa barangay nga unta para sa medisina o ayuda?

Dili kini total ban. Ang mga coronation nights, basketball, ug reunions gitugotan gihapon, basta mogamit lang og local sound system ug sundon ang limitasyon sa oras. Kini usa ka tawag sa pagpaubos sa mga garbo ug luho aron maseguro nga dunay mabilin alang sa mas mahinungdanon nga mga butang, sama sa kaseguroan sa pagkaon.

Naay miingon nga nganon lagi kuno sa Tagbilaran, bongga man gihapon ang ilang mga aktibidad alang sa umaabot nga pista.

Kon hunahunaon mga, Sano, lahi man ang Tagbilaran, tandi sa mga kalungsoran ug barangay sa mga lungsod sa Bohol. Kay daghan sila og mga investments ug resources. Ang mga lungsod sa Bohol nagsalig tawon sa limitadong pundo. Isipon lang nga ang pagdaginot karon wala magpasabot sa kahuyang kondili nagpaila sa lawom nga panabot sa kinabuhi.

Sama sa akong nasulat kaniadto bahin ni Jozelle, ang krisis usa ka imbitasyon sa pag-usab sa atong pamaagi. Kon dili kita mobangon gikan sa atong naandan nga pag-usik-usik, kita gayod ang malunod.

Dili ta maglantaw sa kalingawan mga karon lang. Lantawon nato nga ang kahimtang sa barangay ug lungsod sa umaabot nga mga bulan. Kon dili kita magdaginot sa atong kuryente ug kahinguhaan karon, basin moabot ang adlaw nga mag-nganga na lang ta kon mosamot ug molangyab pa ang gubat sa Tungatungang Sidlakan.

Asa man mangita og dugang pundo ang mga barangay ug lungsod nga ihatag sa katawhan nga nanginahanglan kon karon pa lang makibrahan og dakong konsumo sa transformer ug saba nga mga sound system?

Ang pagdaginot usa ka sakripisyo, apan kini usa ka sakripisyo nga dunay katuyoan. Ang pagpaubos sa atong gusto karon maghatag kanatog lig-ong pundasyon sa pag-atubang sa mga hagit sa mosunod nga mga adlaw, buwan ug tuig.

Sama sa pagkabanhaw ni Hesus nga atong gisaulog kaniadtong Easter Sunday, ang matag pagkamatay sa atong naandan nga mga binuhatan magdala og bag-o ug mas lig-on nga kinabuhi.

Hinaot makahatag kita og kalamdag dili pagkatagkatag. Maghiusa kita sa pagdaginot aron sa kataposan, dili kita magmahay. Kay ang tinuod nga nangandoy og maayong tingusbawan mao man ang komunidad nga andam mosakripisyo alang sa kaayohan sa tanan.

Magmaalamon, magdaginot, ug padayon sa pag-asenso, Sano!