NI: Eleazar Acampado
Ang Gubat Luyo sa Telon
SAMTANG nagpadayon ang kainit sa panahon, nagpadayon usab ang atong pag-alindasay sa unsay sunod nga mahitabo sa kagubot nga nahitabo dili lang sa atong tagsa-tagsa ka panimalay, sa komunidad apan labaw na didto sa Kaulohan, nga gibidahan sa atong mga politiko ug sa mga namunoan sa mga ahensiya sa atong kagamhanan, labi na sa ehekutibo.
Ang kalit nga pag-ilis sa liderato sa Senado diin si Senador Alan Peter Cayetano na ang milingkod isip bag-ong senate president, naghatag og dako kaayong pag-alindasay sa kagamhanan ilabi na sa ehekutibo ug timaan sa usa ka lawom nga krisis sa atong nasod.
Dili na nato ikatago ang mga timailhan. Kini nga gubat dili lang basta duladula sa mga politiko. Kini usa ka gubat kon ang Senado magpabilin ba nga itoy sa Malacañang ug sa Kamara, o mobalik ba kini sa iyang sagradong papel ubos sa Konstitusyon, ang kataposang paril ug makapanalipod sa katawhang Pilipinhon batok sa gahom nga nagserbisyo lang sa kaugalingon.
Kalit nga mibutho ang hadlok apan gihimong kataw-anan nga isyu sa social media. Kini ang hungihong nga “No-El” o No Election. Daghang mga memes ug tabi-tabi ang nag-ingon nga basin nagplano, nagmaniobra, nangamang na usab ang mga anaa sa gahom nga kanselahon ang umaabot nga eleksiyon aron walay mailisan sa puwesto, hinuon molungtad pag dugang mga tuig sa ilang puwesto nga dili na mogasto.
Apan luyo niining mga komedya, seryoso ang sitwasyon. Mismong si Senador Imee Marcos ang nibutyag sa usa ka makatugaw nga senaryo. Sumala pa niya, ang kalit nga pagbinitaray sa mga alyansa ug ang pag-ilog sa kontrol sa Senado dako og kalambigitan sa pagduso sa Charter Change o Cha-Cha.
Ang gikahadlokan nga senaryo mao nga kon makuha sa administrasyon ang hingpit nga kontrol sa Senado, dali ra nilang mapatuman ang kausaban sa Konstitusyon nga maglugway sa termino sa mga anaa sa gahom. Kay sa tinud-anay lang mao kini ang legal nga pamaagi sa pagpatay sa eleksyon. Ang “No-El” dili lang diay basta tsismis. Usa kini ka seryosong hulga.
Nganong nahadlok sila kang Cayetano ug Bato? Mao kini ang rason kon ngano nga gipaspasan og suway ang pagguba sa bag-ong mayoriya sa Senado pipila lang ka adlaw human milingkod si Cayetano. Si Cayetano usa ka batid sa balaod, hait og salabotan ilabi na sa debate, ug lisod suwatan og script sa Malacañang.
Dungan niini, gigamit usab ang bahad nga pagdakop sa ICC batok kang Senator Bato dela Rosa aron pahilomon ang mga mobabag. Ang usa ka kontroladong Senado daling makalubong sa mga imbestigasyon sama sa flood-control scandal, apan ang usa ka independenteng Senado makababag sa self-serving nga Charter Change ug makapanalipod sa institusyon gikan sa pagka-biktima sa politikanhong interes.
Tan-awa ang pagkaatol sa pagpasaka og mga kaso sa mga senador ug kon unsa ka paspas ang resbak sa tinuod nga nagkupot sa gahom aron maseguro nga walay mobabag sa ilang plano. Paspas karon ang pagpangatake sa mga senador nga dili mahawiran sa ilong. Giatake pinaagi sa mga kaso sa DOJ ug Ombudsman ang mga senador nga dili daling mapaluhod sa Malacañang:
Si Sen. Rodante Marcoleta nag-atubang og kasong plunder tungod sa campaign contributions.
Si Sen. Joel Villanueva ug Sen. Francis “Chiz” Escudero anaa ubos sa preliminary investigation alang sa malversation ug graft.
Si Sen. Mark Villar gihimoan og case buildup sa Ombudsman, samtang si Sen. Camille Villar gi-ablihan og imbestigasyon sa DOJ tungod sa conflict of interest.
Si Sen. Jinggoy Estrada nag-atubang usab og bag-ong reklamo sa plunder.
Kini nga mga kaso pulos bag-o. Dili ba kini usa ka klaro nga mensahe sa pagpanghadlok? Sama sa akong nasulat kaniadto sa akong balak:
Bisan maliso pa ang buko sa kawayan
hingpit ka nang dili maminaw
sa hilom nga laylay sa akong kahiladman
sa pagkaabo sa imong dalunggan.
Ang administrasyon karon bungol na sa hilak sa katawhan. Ang ilang dalunggan nahimo nang abo sa kamatuoran. Ang ilahang gipalabi mao ang pagpanalipod sa kaugalingong trono ug dako nga budget nga dili hingpit matunong sa angay padulngan samtang ang ordinaryong Pilipino ilabi na ang mga Bol-anon, nag-antos sa kamahal sa palaliton ug grabeng epekto sa langyab nga korapsiyon.
Ang nasod nangita og Senado nga adunay kaisog sa pag-ingon og DILI. Dili sa korapsiyon, dili sa kontroladong imbestigasyon, ug dili sa pagguba sa Konstitusyon aron lang makalikay sa eleksiyon.
Kon gibutang man sila sa Ginoo alang sa usa ka rason, hinaot ila kining barogan. Ug mobarog sila alang sa interes sa kinabag-ang katawhan. Kay alang sa mga tawo nga nagtuong hingpit silang gamhanan, delikado kining mga tawo nga dili nila mahimong mandoan.
Busa mga, Sano, magpabilin kitang mabinantayon. Bantayan nato nga mapreserbar ang atong katungod sa pagpili. Kay ang gubat sa Senado karon, maingon nga gubat usab alang sa atong kaugmaon ug sa mosunod pang henerasyon.