CORTES Bohol, (PIA) — Gihipno karon ang lakang nga makakuha ang kagamhanan sa tukmang datus kabahin sa coronavirus disease gikan sa mga barangay. Gihimo kini aron mao nay pasikaran nga datus nga basehanan sa saktong desisyon sa mga tigbuhat sa palisiya.
Kini samtang ang kagamhanan wala pay piho nga sistema sa pagtali sa mga apektado sa kagaw sa COVID-19.
Agi og paglikay sa mga taho nga walay kapasikaran nga mahimong saligan sa paghimo og desisyon, kining lakang sa pagkuha sa barangay level data ug metrics ang pagabuksan alang sa mas kasaligan nga datus, sa labing dali nga panahon.
Matud sa Department of the Interior and Local Government (DILG) sa usa ka Memorandum nga gipagawas niadtong Abril 28, gimanduan niini ang nga opisyales sa lokal nga kagamhanan sa pagpasugod og paambit ug pagtaho sa gikinahanglan nga barangay level data gamit ang automated online LGU data collection system nga giugmad sa University of the Philippines COVID-19 Pandemic Response Team.
Pinaagi sa memorandum, gihimong opisyal nga lakang ang Coronavirus Disease 2019 (COVID-19) Information for Real Time Modeling ug Analytics nga ipatuman sa mga gobernador, city ug municipal mayors, DILG Regional Directors ug kadtong may kalambigitan sa pagpugong sa pagkatag sa coronavirus disease (COVID).
Segun pa sa DILG, ang paghimo og maayong desisyon nanginahanglan sa tukmang panahon nga kasayuran, sanglit ang mga desisyon nga himoon sa kagamhanan sa pagtubag sa COVID makaangin man sa kinabuhi ug panginabuhi-an sa mga Pinoy.
Ang konsiderasyones aron mas mapamaayo pa ang mga de-kalidad nga desisyon sa kagamhanan gipasubay lamang sa kalidad sa kasayuran nga makit-an sa mga opisyal nga taho , piho nga testing, monitoring ug ang pagtutok gayud sa mga kaso.
Dason sa DILG, dako ug ikatabang kon ang barangay-level COVID-19 data mahimong makuha sa nga tighimo og palisiya sa adlaw nga tanan.
Kini nga barangay level COVID-19 data nga i-assign ngadto sa city ug municipal disaster risk reduction management officer makuha sa https://endcov.ph fill-upan sa MDRRMO ang dashboard subay sa gikinahanglang barangay level cumulative data sa dili pa mag alas 6:00 sa hapon kada adlaw.
Kini nga barangay level data ug metrics importante kaayo sa paghimo og mas tukma nga mga modelo sa pagkatag sa sakit, sa kapaspason niini, pagtumbok sa mga lugar nga naa sa hotspots ug outbreaks ug sa magtuon sa dagan niini sa matag adlaw.
Dugang sa DILG, kini kritikal sa pagtabang sa kagamhanan nga makuha niini ang kasaligan nga policy decisions sama sa kanus-a ug diing dapita sugdan pagbukas ang mga ekonomikanhong kalihukan. (rahc/PIA-7/Bohol) ……………..more news