“Task group” alang sa manglarga ug manguli’ nga mga OFWs, gimugna sa DOLE 

By Elvira Bongosia, PIA

TAGBILARAN CITY, (PIA) — Nagmugna na ang Department of Labor and Employment (DOLE) og task group aron tutokan ang mga manglarga ug mamauli’ng overseas Filipino workers (OFWs) gikan sa nagkalain-laing quarantine facilities.

Gimando ni DOLE Kalihim Silvestre Bello III ang designasyon sa dugang kawani gikan sa regional ug attached agencies sa buhatan aron madugangan ang manpower requirement sa Overseas Workers Welfare Administration (OWWA).

Tumong niini nga masiguro ang hapsay nga pagbiyahe sa mga OFW gikan sa quarantine facilities paingon sa ilang mga lugar nga paulian.

Gihimo kining lakang sa DOLE human sa direktiba ni Presidente Rodrigo Duterte nga mapadali ang pagpauli sa tanang OFW nga negatibo sa COVID-19 base sa RT-PCR testing sa Philippine Coast Guard (PCG) ug Philippine Red Cross (PRC).

Samtang gitin-aw usab ni Bello nga dili intensyon sa gobyerno nga madugay ang pagpabilin sa pipila ka OFW sa quarantine ug adunay kalangay sa test results.

“DOLE and OWWA simply had no control over the testing and issuance of clearances,” pasabot pa sa kalihim.

Gawas niini, nagmugna usab og lahi pa’ng task group ang buhatan aron mapadali ang proseso sa outbound land ug sea-based workers sa mga nasod nga naglibkas na og restrictions sa employment sa mga foreign workers.

“We are doing this so as we don’t lose the jobs for our OFWs, while at the same time we help facilitate the quick homecoming and be of assistance to our returning workers,” pahayag ni Bello.