TAGBILARAN CITY, (PIA)—Aron may igo pa nga panahon ang mga sakop nga makabayad sa binuwan nga hatagan, gi-uswag na usab sa Social Security System (SSS) ang tagal sa bayranan sa kontribusyon sa mga sakop, ug kini taman karong Hunyo 15, 2020.
Nahisakop na sa ma-uswag usab ang bayad sa kontribusyon ang mga household employers, mga self-employed, voluntary ug non-working spouse nga sakop sa SSS alang sa unang kwarter sa 2020, apil na ang mga contribution payments sa mga regular employers alang sa buwan sa Pebrero, Marso ug Abril, 2020.
Kadtong mga employer nga adunay aprobado nga installment proposals ubos sa Contribution Penalty Condonation Program makapahimulos usab sa Hunyo 15 nga deadline, aron sila makadeposito sa ilang mga post-dated checks nga gikinahanglan alang sa Pebreo, Marso, Abril ug Mayo 2020.
Matud pa ni SSS President ug CEO Aurora C. Ignacio, ang palugway nagtumong sa paghatag sa mga sakop ug employers sa dugang panahon nga makabayad sa ilang kontribusyon, bisan pa sa mga kalisdanan sa pagbayad dala sa mga pagpugong nga gipatuman sa pagpakgang sa pagkatag sa coronavirus disease 2019 (COVID-19) pandemic, bisan pa kon kini giluagan na dili pa lamang dugay.
Giawhag ni Ignacio ang mga sakop ug employers nga dili na maghuwat pa sa deadline pa aron mobayad sa kontribusyon.
Gani, matud niya, mahimo kamo nga mogamit sa online ug mobile payment facilities gawas pa sa kasagaran nga over-the-counter transactions sa mga buhatan sa SSS ug sa mga bangko ug mga bayad centers nga katambayayong sa ahensya.
Gipahinumdom usab ni Ignacio nga ang mga indibidwal nga sakop mahimong mobayad sa kontribusyon pinaagi sa Moneygment sa My.SSS web portal nga naa sa SSS Website, sa PayMaya pinaagi sa SSS Mobile App, Bayad Center Mobile App, o sa mga online banking facilities sa Security Bank alang niadtong mga kliyente sa SecurityBank nga adunay deposit didto.