By Elvira Bongosia, PIA
TAGBILARAN CITY, (PIA) — Gisugdan na sa Department of Education (DepEd) kaniadtong Hunyo 1, ang pagpahigayon og remote enrollment alang sa usa ka buwang enrollment period sa mga pampublikong tunghaan alang sa School Year 2020-2021.
Ubos sa remote enrollment, dili na kinahanglang moadto pa ang mga estudyante o ginikanan sa mga eskwelahan aron mo-enroll isip paglikay sa hulga sa coronavirus disease 2019 (COVID-19).
“Whole month of June under sa atong calendar that is the enrollment period. Pero atong gi-klaro nga walay bata nga moadto sa eskwelehan aron magpa-enroll,” matud pa ni Bohol Provincial Schools Division Superintendent Bianito Dagatan.
Gidasonan usab kini sa kusganong panawagan ni Desiderio Deligerio, ang operations division chief sa DepEd Bohol Schools Division atol sa pakighinabi sa DYTR news.
Gibutyag ni Deligero nga mamahimong makontak sa mga ginikanan ang mga magtutudlo sa ilang anak pinaagi sa text, email, facebook, chat sa messenger ug uban pang virtual nga pamaagi alang sa enrolment gumikan kay ang DepEd nagpatuman sa “no-face-to-face interactions”.
Samtang gipahayag ni DepEd Undersecretary Diosdado San Antonio nga ang enrollment gikan sa Hunyo 1 taman 15 ipahigayon pinaagi sa internet, text o tawag sa mga adviser sa niaging tuig sa mga estudyante.
Giingong mahimo usab nga ang mga ginikanan ang motawag sa mga adviser sa ilang anak pinaagi sa mga numerong ilang igahin alang sa enrollment.
May mga enrollment focal person (EFP) usab nga modawat og tawag ug motubag sa mga pangutana kalabot sa kindergarten, transferees, Balik-Aral ug ALS learners.
Matud pa nga tugotan lamang ang physical enrolment human sa unang duha ka semana sa enrollment period apan kinahanglang seguradohon nga masunod ang mga health ug safety protocol.
Sa ipahigayong usa ka buwan nga enrollment, may tubagon nga survey ang mga ginikanan kalabot sa pili-on nila nga mode of learning alang sa ilang mga anak karong school year kun modules o internet ba.
Samtang gilusad usab karong semanaha sa DepEd ang 2020 Brigada Eskwela ug Oplan Balik Eskwela.
Gipasabot ni Deligero nga lahi ang Brigade Eskwela karong tuiga nga imbes nga manglimpyo ug mangandam sa mga tunghaan ang mga ginikanan, ilang giaghat kini nga muhatag sa mga panagang batok sa Covid-19 virus sama sa alcohol, hand santizers, sabon sa paghugas sa kamot, face shields ug uban pa.
Manghinaot ang operations division chief nga mosanong sab ang mga ginikanan nga aktibong mosalmot ug motabang sa Brigada Eskwela karong tuiga ilabina nga padayon pang gisagobang ang hagit gumikan sa corona virus disease (Covid-19). (ecb/PIA7-Bohol uban sa taho ni Charles Dave Responte)