‘Mobile PCR lab’ sa Bohol, mamahimong ‘operational’ sa Hulyo 15 

Ni Elvira Bongosia, PIA

Gipahibalo ni Gob. Arthur Yap nga sa Hulyo 15, 2020 gipaabot nga mamahimong  operational na ang containerized mobile polymerase chain reaction (PCR) laboratory sa Kagamhanang Probinsiyal sa Bohol.

Gibutyag kini sa gobernador atol sa gipahigayong Network Briefing Program sa Presidential Communication Operations Office (PCOO) ni Kalihim Martin Andanar nga gisibya usab sa ilang Facebook page Biyernes sa buntag, Hunyo 19.

Sa maong programa, gisulti usab ni Yap ang iyang panghinaot nga sa maong panahon pod unta mahimong operational na ang PCR laboratory sa Gov. Celestino Gallares Memorial Hospital (GCGMH).

Ning bag-o lang, gidason permi sa gobernador ang kalabot sa pagbaton og kaugalingong mga PCR laboratoryo sa lalawigan ilabi na sa mga entry points sa Bohol sama sa mga pantalan ug tugpahanan.

Giingong angay nga mutuo ang mga bisita nga ang lalawigan sa Bohol adunay maayong medical protocols ug palisiya sa pagpanalipod sa mga bisita.

“That visitor must believe that Bohol has good medical protocols and policies to protect the visitor,” matud pa ni Yap.

Kalabot sa pagbukas sa industriya sa turismo sa Bohol, ang gobernador miingon nga dili kini angay dali-dalion tungod kay daghang angay e-konsiderar ug usa na niin ang pagbaton og kaugalingong molecular laboratory sa lalawigan.

“We know that this is a global pandemic. Siyempre natatakot din yung mga tao na tumanggap basta-basta,” dugang pa ni Yap.

Gawas sa pagbutang og kaugalingog mga laboratoryo, gitumbok usab sa gobernador ang maayong contract tracing protocols sa pagbukas og balik sa turismo sa lalawigan. (ecb/PIA7-Bohol)