Laing sakop sa New People’s Army (NPA) ang mihimo sa iyang pagsurender sa mga tinugyanan sa balaod.
Gi-paila ni Police Brigadier General Albert Ignatius Ferro, ang Regional Director sa Police Regional Office 7 ang misurender nga rebelde nga mao si Salvador Avenido, 61 ang panuigon, ug taga Purok 4, barangay Achila, Ubay.
Matod ni Ferro nga si Avenido boluntaryong mitahan sa iyang kaugalingon ngadto sa atong pangagamhanan niadtong Setyembre 28, 2020 alas 7 sa gabie didto sa Ubay Municipal Police Station.
Si Avenido gi-ila sa nagkalain lain nga alias susama sa Admiral, Samuel, Tadu. Usa kini siya ka aktibong sakop sa Squad 2 ubos sa Sandatahang Yunit Propaganda Alyansang Yunit Propaganda (SYP/AYP) Platoon sa Bohol Party Committee.
Nagkanayon si Ferro nga si Avenido nadasig nga misurrender sa gobierno gumikan kay wala matuman ang mga gisaad ngadto kaniya sa communist terrorist group (CTG).
Ang pagsurender ni Avenido gisaksihan ni Ubay Mayor Constantino Reyes, Police Captain Rufo Potane, ang Ubay police chief ug mga opisyal sa 47th Infantry Battalion sa Philippine Army.
Gipadayag ni Ferro nga ang pagsurender ni Salvador Avenido usa ka dakong kapildihan sa NPA dinhi sa Bohol nga naningkamot nga makakuha pagbalik sa ilang kusog, kamanduan ug impluwensya nga ilang nahuptan kaniadto.
Midugang si Ferro sa pag-ingon nga niining maong pagsurender ni alias Tadu, makapahuyang sa kalihokan, recruitment, ug komunikasyonsa sa mga CTG’s ug sa mga sakop sa people’s organization.
Ang Bohol Provincial Police Office pinangulohan ni Colonel Joselito Clarito ang mihikauy aron ma sulod ang misurrender sa programa sa Enhanced Comprehensive Local Integration Program (ECLIP).
Nagtanyag ang ECLIP sa mga mosurender nga mga rebelde ug mga livelihood programs alang sa pagsugod sa ilang bag-ong kinabuhi nga malinawon labi na karon kay mibalik na sila sa sabakan sa balaod.
Si Ferro maoy mipresentar sa misurender atol sa usa ka press briefing didto sa Camp Franciso Dagohoy niadtong Oktubre 6, 2020.
Miduaw dinhe sa Bohol si Ferro alang sa iyang ikaupat nga command visit. (Dave Charles Responte)