Ang Provincial Health Service Unit (PHSU) padayong nag-atiman sa kahimsog sa panglawas sa mga sakop sa kapulisan sa lalawigan taliwa niining padayong giatubang nga hulga sa Coronavirus disease (Covid).
Kini maoy gibutyag ni Lt. Myra Sajulga, ang hepe sa PHSU sa Bohol Police Provincial Office (BPPO) kansang buhatan anaa sa Camp Francisco Dagohoy dinhi sa dakbayan sa Tagbilaran.
Matod ni Sajulga nga ilang gimonitor ug giatiman sa PHSU ang kahimtang sa panglawas ug pangisip sa mga pulis dinhi sa Bohol niining padayong pakigbatok sa Covid.
Midugang si Sajulga pag-ingon nga gipadayon ang gihimong paglibot sa naasoy nga unit sa BPPO sa mga estasyonan sa kapulisan dinhi sa Bohol aron masuta ang ilang kahimtang sa panglawas ug pangisip sa atong mga pulis. Nang apud-apud usab ang maon unit sa BPPO ug mga tambal sama ug mga Vitamin C ug ubang mga supply nga maoy silbing panagang ug pagpalig-on sa panglawas sa atong mga kapulisan.
Miangkon si Sajulga nga adunay duha (2) ka mga pulis nga nagpositibo sa Covid: usa niini gikan sa Cebu ug ang usa na-takdan didto sa Guindacpan, Talibon. Kining maong dapit mao ang kanhi epicenter sa Covid 19 dinhi sa Bohol. Dugang nagkanayon nga naayo na sa ilang sakit ang mga nataptan sa Covid 19 sa naasoy nga dapit. (Dave Charles Responte)