Ni Rey Anthony H. Chiu,
Tugotan na ang mga banay nga nagpuyo ilawom sa usa lamang ka bubong, sa pagkaon sa mga restaurants nga mag-ipon sa usa lamang ka lamesa, basta makapakita sila og kamatuoran nga usa lamang ang ilang home address ug nga ang ilang lamesa, nakadistansya og labing menos usa ka metros sa laing lamesa nga may nangaon nga customer.
Kini tipik lamang sa Department of Trade and Industry (DTI) Memorandum Circular 20-39 nga nagpalibkas sa ubang probisyones sa MC 20-37 series of 2020 alang sa mga restaurants ug fast food joints nga nagbukas na subay sa lagda sa mga lugar diin gipailawom na sa Modified General Community Quarantine (MGCQ)
Ubos sa MGCQ, gitugotan na ang mga restaurants nga mag-bukas sa 75 porsyento nga seating capacity samtang sa mga lugar nga ubos pa sa GCQ, 50 porsyento pa lamang usab sa ilang capacity ang gitugot sa kagamhanan.
Mahimo na usab ang restaurants nga motanyag sa bisan unsa nga pagkaon ug ilimnon lakip na ang mga makahubog, apag gikinahanglang labing daghan nga ikatagay, duha lamang ka shots, kini subay sa bag-ong normal.
Gani, matud pa sa MC, ang tanan nga serbisyo sa pagpangaon sulod sa restaurant gikinahanglang himoon sa labing paspas ug labing menos nga pagduol-duol sa mga serbidora.
Segun pa sa MC, ang mga restaurants ug dine in establishments tugotan na nga maka-operate taman sa alas 11 sa gabii, samtang giaghat ang mga LGUs sa pagpasibog sa ilang mga curfew nagdto na sa tungang gabii aron makaalagad sa mas daghan pang customer ug may dugang kita alang sa mga trabahante.
Gisugyot usab ug gipaboran sa DTI ang pagpangaon sa gawas o “al fresco,” alang sa mga kan-anan nga air-conditioned, gikinahanglang ayohon ang exhaust system sa ilang ventilation aron maseguro ang tukmang paghoyohoy sa hangin sulod sa kan-anan ug giaghat ang mga tag-iyahan niining mga establisemento sa pagpahimutang sa high efficiency particulate air filtration systems.
Giaghat usab ang pagpabutang og mga air filtration systems sa restaurants ug kan-anan nga airconditioned.
Kon may pagpila man ugaling, segurohon usab sa restaurant ang usa ka metros nga distansya sa atubangan, luyo ug kilid-kilid sa mga tawo nga mingpila.
Tugotan lamang, matud sa DTI MC, ang buffet o ang gitawag og Dutch lunch kon may mga serbidora sa restaurant nga tugyanan sa pagpang-apud-apod ug paghukad sa pagkaon ug nga ang mga pagkaon, permi gyud nga gitabunan diha sa counters.
Gidid-an na usab ang kusog nga mga music sa mga kan-anan ug dine in establishments kay kini maoy kina-ingnan nga ang mga tawo magsininggitay aron madunggan, ug magpataas sa posibilidad nga may manglagsik nga laway.
Sa mga lamesa, gi-aghat sa DTI nga botangan og mga tin-aw nga plastic dividers nga labing menos 18 pulgadas ka taas aron mapugngan ang pagtakod sa kagaw gikan sa mga customer ug mga dividers sa mga lamesa sa susama nga katuyu-an.
Kadtong mga kan-anan nga mapamatud-an nga napakyas sa pagsunod sa mga reglamentos, pagapadalhan ug warning ug isumbong ngadto sa mga lokal nga kagamhanan nga naghatag kanila sa business permits to operate.
Kon sa sunod nga pagtanda sa monitoring team og masayran nga wala pa gihapon motuman sa minimum health standards, temporaryo nga sirad-an ang restaurant aron ilang ikapahimutang ang mga gilagda nga buhatonon ug makabukas lamang sa pagbalik kon mapahimutang na ang minimum compliance niini. (rahc/PIA-7/Bohol)