Ni Elvira Bongosia, PIA

Human sa nagmalampusong proyekto nga ‘Grow My Own Food’ (GMOF), laing agricultural private-public-partnership na usab ang namugna.

Kini atol sa paglusad sa Liboron Community (Communal) Garden sa barangay Liboron sa lungsod sa Calape niadtong Agosto 7, 2020.

Ang maong garden gipangunahan og dumala ni Cecilia de Leon sa Organic Street and Cecees Organic Farm nga nigamit sa iyang yuta nga may plantasyon sa kakaw ug kalubihan nga gihimong diversified vegetable ug herbs production garden.

Si De Leon, kansang benepisyaryo sa usa  ka gamay nga pahulam sa Aspiring Women Entrepreneurs Bootcamp sa SPARK Ph ug New Zealand Embassy, nadasig sa pagpaambit sa iyang ‘seed grant’ alang niining proyekto kauban sa iyang 58 ka kauban sa barangay nga mga mag-uuma agi og paglihok sa posibleng hulga sa kagutom tungod sa coronavirus disease 2019 (COVID-19) nga krisis.

Ang inilang Bohol chocolate princess nga si Dalareich Polot nga maoy ni asister ning proyekto maoy nagpahiluna ning kalihokan sa pakig tambayayong sa Agricultural Training Institute (ATI) 7 pinaagi sa Center Director niini nga si Dr. Carolyn May O. Daquio.

Apil sa mga nitambong atol sa paglusad naglakip nilang Provincial Board Member (BM) Lucille Lagunay, Rey Balatayo sa Gawad Kalinga/BahandiKO, ug Acting Municipal Agriculturist Maria Teresita Pentacase.

Nisalmot usab ang kabataan pinaagi sa suporta sa Sangguniang Kabataan Council of Barangay Liboron.

“There is no barren soil, only barren mind” matud pa ni Director Daquio samtang nagdasig sa mga nitambong.

Gibutyag niini nga ang pormula sa kalampusan naglangkob sa 4 ka letra: Ampo, Antus, Kakugi ug Technological Inputs.

Isip paagi sa pagsuporta, si Dir. Daquio nitugyan sa mga binhi, vermicast, technoguides ug uban pang farm inputs.

Samtang si BM Lagunay nihisgot sa umaabot nga assistance ug distribution sa mga propagules gikan sa Kagamhanang Probinsiyal sa Bohol diin ang lungsod sa Calape usa  sa ‘recipient municipalities’ ug bukas alang sa legislative assistance kun manginahanglan ang grupo.

Si Rey Balatayo usab sa GK/BahandiKO mipahayag sa ilang suporta pinaagi sa pagpa-ambit og organic technologies aron ang mga mag-uuma dili na mopalit pa og bisan unsang klase sa abono ug mopahigayon usab og ‘values formation’ alang sa komunidad.

Samtang ang MAO misaad nga mogiya ug mohatag og technical support niining proyekto. (ecb/PIA7-Bohol)