Mikabat ug dul-an sa P17 milyones ang mga natala nga mga booking sa Philippine Travel Exchane (PhiTEx) 2020 atol sa pagtak-op sa maong kalihukan didto sa lungsod sa Panglao niadtong milabay nga semana.
Mao kini ang gitaho ni Tourism Promotions Board (TPB) Chief Operating Officer (COO) nga si Atty. Antoinette Allones. Miingon si Allones nga nakab-ot sa PhiTEx ang maong kantidad sa gross sales bisan ug ang mga misalmot sa maong trade fair padulong na nga mobiya gawas sa Bohol aron mobalik didto sa kaulohan niadtong adlawng Lunes. Gitaho usab kini sa tinubdan gikan sa Kapitolyo.
Ang kalihukan sa ‘travel trade’ maoy labing unang virtual ug hybrid edition sa PhiTEx diin ang mga misalmot nagagikan sa 33 ka mga nasud pinaagi sa video negotiation-conference. Ang mga misalmot mao ang mga tourism product sellers ug buyers ug ubay-ubay usab ang mga transaksyones nga mga nahipno, matud sa susamang taho gikan sa Kapitolyo.
Namugna ang hybrid nga PhiTEx tungod sa padayong pandemya nga nasinati dinhi sa atong nasud.
Apan bisan pa sa pandemya, mipabati si Allones sa iyang dakong kalipay tungod sa kalamposan nga nakab-ot sa pagpahigayon sa PhiTEx dinhi sa Bohol. Miingon siya nga inanay na ang pagbukas ug balik sa turismo sa probinsya sa Bohol.
Tungod niini, gidayeg sa pangulo sa TPB ang administrasyon ni Gob. Arthur Yap ug ang mga sakop sa hut-ong sa local tourism stakeholders tungod sa ilang pagpasi-ugda dinhi sa Bohol sa PhiTEx. Gidayeg usab sa TPB ang mga Bol-anon tungod sa ilang pagka maabi-abihon.
Mipadayag si Allones nga daghan pa diay kaayo ang angay pang masuroyan ug makita sa Bohol.
Nunot niini, si Allones mihulagway, agi ug ehemplo sa simbahan ug creative arts didto sa lungsod sa Alburquerque nga matud pa diya usa ka talagsaong mutya nga angay ipasigarbo ug makita sa mga muduaw sa probinsya.
Matud pa sa tinubdan nga gikan sa kapitolyo, misaad si Allones nga mobalik sa Bohol ug sa iyang pagbalik, iyang pagadalhon ang hut-ong sa mga tagdumala sa mga convention ug exhibition sa nasud.