Dili pa ika-sugyot dinhi sa Pilipinas ang pagpagamit sa extracorporeal membrane oxygenation (ECMO) isip dinali-an nga paagi alang sa nagka grabe nga kundisyon sa pasyente sa coronavirus disease (COVID-19).
Kini tungod kay limitado ang gidaghanon sa mga tambalanan nga makahibalo ug may gihuptan nga makina nga makahimo sa mga pama-agi nga gitumomg aron maabagan ang pag ginhawa sa usa ka nagka grabe nga pasyente sa COVID.
Gawas pa, nakita usab sa mga mananambal nga mas daghang komplikasyon ang posible nga pagadangatan sa pagamit niini, ug dyutay lang usab ang alibyo nga ikahatag niini sa kasingkasing ug sa baga sa pasyente.
Kini gipahayag sa mga tinubdan kasamtangang gitun-an pa sa Department of Health (SOH) ang kritikal nga ikatampo sa ECMO sa pagdumala sa mga pasyente sa COVID-19 ilabi na kadtong may grabe na nga kundisyon sa iyang respiratory symptoms.
Ang Extracorporeal membrane oxygenation o ECMO usa ka medical nga pamaagi sa paghulip sa trabaho sa kasingkasing ug baga gamit ang usa ka makina nga mao una’y mobomba aron makapadagan sa dugo nga nagkarga sa oxygen nga ipalibot sa lawas.
Alang sa mas grabe nga pasyente sa COVID-19, mahimo nga ang sakit maoy makapaluya sa iyang baga niini, ug kini maoy hinungdan nga magkuwang na sa oxygen ang lawas.
Alang niini nga mga kaso, mahimong magamit ang ECMO sa pagdumala sa kalisud sa pag ginhawa, kay niini nga paagi, mahimong dili mahago ang kasingkasing ug baga sa pasyente.
Alang sa ingon niini nga kahimtang sa usa ka pasyente, kasagaran nga gigamit mao ang gitawag ug mechanical ventilation.
Kini nagpasabut nga gamit gihapon ang makina, paslakan ug nasogastric nga tubo ang ilong sa pasyente paingon sa iyang tiyan, samtang paslakan usab ug endotracheal nga tubo ang baba paingon sa iyang tutonlan.
Pinaagi sa makina nga gitawag ug mechanical ventilator, sudlan ug hangin nga may mas gipadaghan nga oxygen ang lawas sa pasyente pinaagi sa mga tubo nga gipangpaslak.
Hinuon, kon itandi sa mechanical ventilation, may mga kamatuoran nga nagapakita nga sa ECMO, dyutay lang gyud usab ang pag-improve sa trabaho sa kasingkasing ug baga ug ang pagkaluwas sa pasyente.
Dugang pa, ang mga pasyente nga i-agi sa ECMO may taas nga kakuyaw sa komplikasyon sa pagdugo, nga manginahanglan na usab sa mas daghang dugo nga iabono.
Dinhi sa Pilipinas, segun sa pagtuon, limitado kaayo ang access sa maong matang sa pag-atiman sa pasyente, kay 13 pa lamang ka makina sa ECMO ang nia sa nasud, ug kasagaran niini, tua mahimutang sa specialized nga mga ospitals ug centers sa Metro Manila.
Mas daghan usab nga gikinahanglan sa ECMO. Kini naglangkob sa mga espesyalista nga maghatag sa intervention, pagbansaybansay niini nga mga tawhana, pagpahiuli sa masakiton nga natambalan apil na ang bili sa kasagaran nga ekipos nga gamiton sa pagtambal.
Niini, nakita na nga daan sa DOH nga ang paghatag ug pag atiman sa modagsang nga mga pasyente mahimong daku kayo nga hagit sa mga tambalanan ug sa public healthcare system. (PIA)