DA nanawagan sa mga trabahante sa Sektor sa Panguma nga magpalista sa RSBSA 

TAGBILARAN CITY, (PIA)—Bukas pa gihapon ang pagpanglista alang sa mga mag-uuma ug trabahante sa batakang sektor sa agrikultura.

Kini maoy gibutyag ni Department of Agriculture Regional Executive Director Atty. Salvador Diputado sa usa ka pagpakighinabi dili pa lamang dugay.

Kini samtang nagpadayon usab ang kagamhanan sa paghimo sa Registry System for Basic Sectors in Agriculture (RSBSA), usa ka pamaagi sa nasudnong kagamhanan nga batonan ang usa ka digital nga database sa tanang mga mag-uuma, mangingisda ug nga trabahante og namuo sa sektor sa agrikultura.

Listahan nga adto magsugod sa pag-tambayayongay sa mag-uuma mismo, uban sa Municipal Agriculture Officer, sa kapitan sa barangay diin nanimuyo ang mag-uuma ug sa Municipal Fisheries ang Agriculture Management Council (MFARMC), ang RSBSA usa ka pamaagi diin ang nasudnong kagamhanan pinaagi sa DA, makakuha sa batakang mga trabahante sa sektor alang sa mas sayon nga pagpadagan sa mga kasayuran, teknolohiya ug hinabang.

Kahinumduman nga gibutyag ni Diputado didto sa Kapihan sa PIA nga daghang gagmay’ng mga mag-uuma ang nasuko sa DA kay wala sila maapil sa listahan sa RSBSA.

Matud ni Diputado, dugay na sila nga nagkampanya aron ang mga mangingisda ug mag-uuma magpalista, apan daghan pa gihapon ang nagmagahi.

Pila ka buwan ang minglabay, ang mga naa sa RSBSA kang kinsag mga basakan ug mga pananum, apil na ngani ang mga panghayupan ug mga pangisdaan nga naapektohan sa huwaw, nahatagan sa kagamhanan sa mga nilibo nga hinabang gikan sa crop insurance.

Sa miaging buwan, sa pagpang-apud-apud sa ayuda sa kagamhanan ngadto sa mga manghuhumayan nga maapektohan sa pagsulod sa mga imported nga humay dala sa Rice Tariffication Law, nanghatag ang kagamhanan sa tag P5,000 sa mag-uuma nga nagtikad sa humayan nga gikan sa tunga sa ektarya ngadto na sa 2 ka ektarya.

Ang tag P5 mil nga unconditional cash transfer, alang gyud unta sa pag-abag sa mag-uuma nga makapangandam sa epekto sa mas barato nga humay nga mahimong mopilde sa ilang mga ginagmay nga panghumayan.

Apan sa mga daghanan nga nakadawat, ang pagpamalit sa mga pagkaon, gamit sa balay ug ubang nag-una nga gikinahanglan ang ilang gigastohan sa ilang nadawat nga ayuda.

Daghan pa nga posible nga mapaabut nga mga kaayohan nga madawat, apan kinahanglan lang gayud nga maapil ka sa RSBSA, padugang ni Diputado. (rahchiu/PIA-7/Bohol)