Gisulat ni Elvira Bongosia

Nipasidaan ang Securities and Exchange Commission (SEC) sa publiko batok sa “text scam” nga naggamit sa pangalan ni Presidente Rodrigo Roa Duterte ug magpadala ug mensahe nga midaog sila ug P750,000 pinaagi sa electronic raffle.

Sa gipagawas nilang advisory, miingon ang SEC nga dili rehistrado ang “President Rodrigo Duterte Charity Foundation” isip usa  ka korporasyon ug kumpirmado usab nga peke ang Policy and Specialized Supervision Sector sa Bangko Sentral ng Pilipinas.

Dugang pa sa ahensya, mangayo ang maong foundation ug salapi gikan sa mga recipient aron giingong makuha ang ilang prize money.

Gipahinumdoman sa SEC ang publiko nga ipahibalo dayon sa National Telecommunications Commission (NTC), National Bureau of Investigation (NBI), Bangko Sentral ng Pilipinas (BSP), Department of Trade and Industry (DTI) ug sa ilang buhatan ang ingon niining ilegal nga buhat.

Nagpagawas na usab ang SEC ug advisory batok sa upat ka kompanyang nangayo ug investment gikan sa publiko sama sa Sharelink Ads and Cryptotrading, Cashdrop, Coinmax.PH ug Lokalplate.

Matud pa nga  ang Sharelink Ads and Cryptotrading nga gipamunuan sa usa  ka Cedric V. Suarez, nalambigit sa digital marketing ug cryptocurrency trading diin pabayron ang miyembro ug P1,500 matag account ug mokita pinaagi sa Sharelink Ads Bonus ug P1,500 o P150 matag adlaw pinaagi sa pag-share sa link sa kompanya sa iyang Facebook account sulod sa 10 ka adlaw o 100% return sulod sa 10 ka adlaw; direct referral bonus diin mokita ug P150 matag member-recruit;  pairing income diin mokita ug P200 sa matag pairing ubos sa iyang structure; leveling bonus nga mokita ug P200 per level ug crypto trading bonus nga P50 matag adlaw sulod sa 60 ka adlaw o kinatibuk-ang P3,000 o 200% return sulod sa 60 ka adlaw.

Gidugang pa sa SEC nga giilad sa Cashdrop ang publiko nga mag-invest online o pinaagi sa internet samtang ang Coinmax.ph usa ka scheme diin ipa-invest ang miyembro nga mokita gikan 90% hangtod 150% return ug ang Lokalplate nagtanyag ug investment sa publiko diin ang franchisee nga mag-i-invest ug P12,888 mokita ug P40,000 hangtod P80,000 matag buwan gawas pa sa komisyon ug uban pa.