Sinulat ni Rey Anthony Chiu
Mingtugpa dayon ang bag-ong napili nga hepe sa Bien Unido sa hiniusa nga kalihukan nga naglakip sa pagtugyan sa katungdanan, pagdawat sa bag-ong sakyanan sa kapolisan, pagpamati sa sitwasyon sa mga lagda sa pakigbatok sa coronavirus disease (Covid) ug ang pagtambong sa Municipal Peace and Order Council Meeting, Enero 26 ug 27, 2021, didto sa nahisgutan nga lungsod.
Si Lt. Marjun Cagogo Jr., mingdawat sa responsibilidad isip hepe sa kapolisan, isip puli kang Capt. Lito Rosales, kinsa nahuman sa iyang pangalagad sa lungsod nga gitiman-an sa epektibo nga pagdumala sa katawhan sa panahon kanus-a nanghasi ang Covid didto sa isla nga barangay sa Malingin.
Ang pagtugyan sa responsibilidad sa kapolisan gisaksihan usab nila Mayor Rene Borenaga ug Bise mayor Ramon Arsenal, uban usab ang mag sakop sa Sangguniang Bayan, Enero 26, 2021.
Mainiton usab ang pagdawat sa lungsod ni Lt. Cagogo, kinsa maoy nanguna sa kapolisan sa pagpatuman sa road clearing program sa kagamhanan.
Uban sa Department of Interior and Local Government (DILG), gipatuman sa kapulisan ang road clearing aron pagpapaspas sa mga sakyanan nga nakabara sa mga kilid sa dala ug magpahinay sa dagan sa trapiko.
“Nalipay kita samtang atong gipapas-an sa atong bag-ong hepe sa kapolisan ang dili sayun nga tahas: ang pagseguro sa pagpatunhay sa kahapsay ug kalinaw sa lungsod aron dinhi maghimo ug salag ang mga negosyante nga nakakita sa daku nga potensyal sa Bien Unido, alang sa negosyo ug linaw nga pagpuyo,” matud pa ni Mayor Borenaga.
Nunot niini, gedawat sa bag-ong hepe sa kapulisan ang bag-ong police patrol car, nga nakuha sa lungsod gikan sa mga tinugyanan sa Philippine National Police (PNP).
Kahinumduman nga ang Campo Dagohoy, kauban sa League of Municipalities of the Philippines Bohol Chapter pinaagi ni Mayor Marietta Sumaylo, una nga mipadayag nga may 10 ka bag-o nga Toyota Hilux patrol cars nga nakuha ang Bohol.
Ang Bien Unido, kinsa usa sa napulo ka lungsod, ming-claim sa ilang bag-ong patrol car gikan sa Regional Office 7 niadtong imaging semana, taho pa ni Manuelito Item, Municipal Public Information Officer.
Ang Bien Unido, parehas nga nakakuha sa patrol car sama sa Dauis, Panglao, Alburquerque, Loay, Garcia-Hernandez, Trinidad, Talibon, San Isidro ug Ubay.