Mga 1 ka milyon ka mga Pilipino ang nakabenepisyo sa programa nga cash-for-work nga gipasi-ugdahan sa Department of Labor and Employment (DOLE).
Ang mga nakabenepisyo mao ang mga pipila ka mga Pilipino nga nawad-an ug trabaho tungod sa pandemya, sumala sa taho gikan sa CNN Philippines nga migawas niadtong Lunes, Dis. 28, 2020.
Sa usa ka pamahayag, matud sa DOLE, kasagaran sa mga nakabenepisyo sa maong programa mao ang mga taga informal sector nga trabahante nga nawad-an ug trabaho tungod sa pandemya ug tungod sa sagunson nga mga bagyo nga miigo sa nasud.
Ang mga trabahante gihatagan ug temporaryong trabaho pinaagi sa Tulong Panghanapbuhay sa Ating Disadvantaged/Displaced Workers (TUPAD) program.
Mokabat sa 797,222 ka mga trabahante nga ubos sa TUPAD ang nabayran ug 141,989 ka mga trabahante ang kasamtangan nga nagtrabaho. Miabot na sa P4.5 billion ang nabayran nga sweldo sa mga trabahante ubos sa na-asoy nga programa.
Nagtuo si Karen Trayvilla, ang direktor sa Bureau of Workers with Special Concern sa DOLE nga posibli nga molapas sa usa ka milyon ang mga benepisyaryo sa maong programa ug aduna pay nahabilin nga budget. Ang budget sa TUPAD mokabat ug P6 bilyon. Ang bala-od nga Bayanihan 2 maoy naghatag ug budget sa maong programa.
Ang mga trabahante nanarbaho ug dili momenus sa 10 ka adlaw ug dili molapas ug 16 ka adlaw depende sa trabaho nga gihimo.Anaa sa 8.7% ang unemployment rate sa nasud base sa datos gikan sa kagamhanang nasyonal.