Publiko gipa-amping batok sa mga mangingilad nga nagagamit sa PhilSys 

Sinulat ni Elvira Bongosia

Gipahinumdoman sa Philippine Statistics Authority (PSA) ang publiko nga mag-amping ug molikay sa mga indibidwal o grupo nga nagpagawas ug sayop ug malimbongon nga impormasyon kalabot sa Philippine Identification System (PhilSys).

Ang PhilSys o giila isip National ID System, usa ka programa sa gobyerno nga nagtinguhang mahatagan ug nag-unang pagmatuod sa pagkatawo sa matag Pilipino.

Sa gipagawas nga pahayag sa PSA, giingong nakadawat sila ug taho kalabot sa pipila ka post gikan sa Facebook group nga ang Philippine National ID (News & Information) ug usa  ka indibidwal nga nigamit sa pangalang ‘Calvin Processings’ ang giingong nag-process ug PhilID nga may tukmang bayad o fee.

Giklaro sa PSA nga ang pagpa-rehistro sa PhilSys libre lamang mao nga gi-awhag ang publiko sa pag-report dayon sa mga pekeng post, page o indibidwal nga naghimo ug ilegal nga aktibidad kalabot sa PhilSys.

Matud pa sa PSA nga mahimong magpadala ug mensahe sa ilang Facebook page aron i-report ang mga post (m.me/PSAPhilSysOfficial) o di kaha motawag lamang sa PhilSys hotline nga 1388 (may tukmang bayad).

Ang PhilSys Registration adunay tulo ka lakang hugna sa proseo nga makita sa: https://bit.ly/38EkTKn.

Sa pagkakaron, gipahigayon sa mga PSA enumerators ang Step 1 registration alang sa low-income household heads pinaagi sa pagbisita matag panimalay sa 32 ka inisyal nga mga lalawigan.

Karong tuig 2021 buksan na sa publiko ang registration sa PhilSys.

Hingpit usab nga gipahinumdoman ang publiko, ilabi na sa mga nagplanong mang-scam o mangilad nga ang unauthorized o walay pagtugot nga pag-issue ug paggamit sa PhilID adunay tukmang silot nga tulo hangtod unom ka tuig nga pagka-bilanggo ug may multa nga P1 milyon ngadto sa P3 milyon base sa Implementing Rules and Regulation (IRR) sa R.A. No. 11055 o Philippine Identification System Act.