Sinulat ni Elvira Bongosia
Nipasidaan ang Department of Labor and Employment (DOLE) sa publiko batok sa mga nagtanyag ug mga salapi ug pekeng trabaho sa social media.
Kalabot niini, gitambagan sa DOLE ang publiko nga batasanon ang pag-berepika una sa registration sa mga kompanyang nakapangalan sa Facebook page sa dili pa makig-transaksyon o mohatag og mga mahinungdanong impormasyon.
Nipagawas ug pasidaan ang buhatan human makadawat ug reklamo batok sa kompanyang nagpailang Eternal Investment.
Matud pa sa DOLE, nang-awhag ang kompanya sa Facebook ug mga mo-apil sa ilang kumpanya ug nag-assign pa kini ug job positions o trabaho pinaagi sa voluntary o commission basis.
Giingong apil sa gitanyag nga posisyon sa kompanya mao ang executives, managers ug graphic artists.
Apan giingong wala gibayaran og sakto sa Eternal Investment ang mga kawani niini.
Gibutyag sa DOLE nga migawas sa ilang pakig-alayon sa Department of Trade and Industry (DTI) nga dili rehistradong negosyo ang Eternal Investment.
Matud pa nga wala usab narehistro ang maong kumpanya sa Securities and Exchange Commission (SEC).
Gisang-at sa DOLE ang reklamo batok sa Eternal Investment ngadto sa SEC aron maimbestigahan kini.