Lagunay paimbestigahan ang mahal nga plete sa mga V-Hire 

Sinulat ni Dave Albarado

Gi-isa ni Board Member Lucille Lagunay ang laraw nga imbestigahan sa Sangguniang Panlalawigan (SP) ang gikatahong kamahal sa pletehan sa mga V-Hire o “vans for hire” dinhi sa Bohol bisan pa nga ge-alegar nga wala nagsunod sa tukmang seating capacity nga gitakda sa mga protocol.

Matud pa nga adunay pipila ka mga V-Hires nga magpasakay ug pasahero taman sa full capacity nga supak sa gi-lagda nga 50% capacity lamang ang tugutan.

Ug bisan gi-alegar nga nagpasakay taman sa full capacity ang pipila ka mga V-Hire, giingon usab nga mahal ang gisingil nga plete sa mga pasahero.

Si Lagunay, ang pangu sa Committee on Social Services, miisa sa maong isyu pinaagi sa usa ka privilege speech atol sa regular session sa SP niadtong adlawng Martes, Mar. 9, 2021.

Nasabtan ni Lagunay ang kamahal sa pletehan gumikan sa gipatuman nga mga protocol apan dili maki-angayon kun ang mga V-Hire mag pasakay ug pasahero nga taman sa full capacity apan mao ra gihapon ang kinubrahan sa pletehan ngadto sa ilang mga pasahero.

Gusto ni Lagunay nga masusi ang maong isyu sa SP sa dili madugay.

Dugang ni Lagunay nga angayang susihon kon tugotan na ba ang pagpasakay sa full-capacity ang mga V-Hires ug ang risgo niini sa panglawas taliwala sa padayong giatubang nga pandemya.

Ang isyu nga gi-isa ni Lagunay gi-duso ngadto sa Committee on Public Utilities ug Committee on Health sa SP alang sa usa ka imbestigasyon in   aid of legislation.