Sinulat ni Dave Albarado
Padayong gi-imbestigahan sa kapolisan sa lungsod sa Bilar ang pagpusil patay sa usa ka kanhi sakop sa Provincial Security Force (PSF) sa Kapitolyo ug karon empleyado na sa Bohol Environment Management Office (BEMO), sa naasoy nga lungsod.
Ang biktima gipusil-patay sud sa ilang balay alas 7 ang takna niadtong adlaw nga Domingo, Agosto 2, 2021.
Ang biktima giila nga si Ismael Hingpit, hingkod ang pangedaron ug molopyo sa barangay Zamora, Bilar.
Matud pa sa anak sa biktima nga nakasaksi sa pagpusil, dihay nanuktok sa ilang pultahan mao nga giablihan sa anak ug mitindog ang iyang amahan nga naglingkod sa sala aron tan-awon kinsay nanuktok.
Apan sa pag-abli sa pwertahan, midiritso ug pabuto ang gikatahapan sa iyang pusil ug giigo ang ulo sa biktima.
Diha diha ang biktima namatay tungod sa pinusilan sa iyang ulo, matud sa mga taho.
Ang gikatahapan human sa pagpamusil mitalikod ug ming-angkas sa motor nga nagahuwat ang kauban niyang driver sa daplin sa kalsada.
Padayon pang blangko ang kapolisan sa Bilar kon unsay motibo sa pagpamusil sa biktima.
Matod sa asawa sa biktima nga wala siyay nasayran nga dunay gikaaway ang iyang bana nga posibleng hinungdan sa pagpamusil.
