Gikan sa Primer
Gob Art Yap mitambong sa sa 2021 Provincial Congress sa Liga ng mga Barangay – Bohol Chapter alang sa mga kapitanes sa segundo distrito nga gipahigayon didto sa Bohol Tropics Resort niadtong Agosto 12, 2021, matud sa taho gikan sa Provincial Information and Media Relations (PRIMER).
Mipa-ambit ang Gobernador ngadto sa mga kapitan sa segundo distrito kabahin sa mga programa, aksyon ug lagda nga gibuhat sa Kagamhanang Probinsyal taliwala sa pandemya.
Dugang pa, nagpahimangno usab ang gobernador sa mga kapitanes nga padayon ang hugot nga pagsunod sa mga health protocols ug pag-amping hilabi na karon nga mas kusog ang delta variant. Gi-awhag usab niya ang mga opisyales nga paspasan ang pagbakuna sa katawhan para matuman ang target nga dugang 40,000 nga Bol-anong mabakunahan sulod sa buwan sa Agosto.
Mihisgot usab si Gob. Yap sa ubang mga programa sa Kagamhanan sama sa seguridad sa pagkaon, pagpa-ugmad sa agrikultura, pagtarong sa sistema sa panubig ug ang sitwasyon sa ekonomiya sa Probinsya sa Bohol sa milabay nga tuig.
Mitambong sa maong kalihokan ang mga kapitan sa segundo distrito, Vice Governor Rene Relampagos, Liga President ug Board Member Romulo Cepedoza, Board Member Frans Garcia, Board Member Mimi Boniel, Former Board Members Jaja Jumamoy ug Agapito Avenido, Jiselle Rae Villamor ang representante ni Cong. Aris Aumentado ug mga kadagkuan sa mga buhatan sa Kapitolyo.
