Sinulat ni Elvira Bongosia
Dili na obligahon sa kagamhanang probinsyal sa Bohol ang mga residente niini ug mga bisitang mosulod sa lalawigan nga mopaubos sa lima ka adlaw nga quarantine.
Sa gilagdaang Executive Order No. 44 ni Gobernador Arthur Yap, nakalatid nga dili na kinahanglan ang maong patakaran ug kausa na lamang ang real time-polymerase chain reaction (RT-PCR) testing dili sama kaniadto nga duha ka higayon kini gikinahanglan.
Base sa bag-ong EO, kinahanglan lamang magpresinta sa mga moabot sa Bohol sa ilang negatibong resulta sa RT-PCR test nga gipahigayon 72-oras sa dili pa ang ilang pag-abot.
Kinahanglan usab nga makig-coordinate una sa local government unit ang mga byahero pinaagi sa Department of Science and Technology (DOST)’s Safe, Swift, and Smart Passage (S-PaSS) Travel Management.
Kining desisyon bunga sa ilang pagtuon nga ubos o halos walay nahitabong pagpanakod gikan sa mga niabot nga byahero sa lalawigan.
Matud pa nga ang wala makontrolar nga local transmission ang kasagarang hinungdan sa pagdagsang sa sakit.
Ang desisyon sa pagtangtang sa pipila ka travel restrictions giduso sa mga sakop sa Bohol Inter-Agency Task Force (BIATF), medical experts, tourism stakeholders ug mga mayor, kinsa nagtuo nga mas luwas ang mga byahedor nga nakasulod sa probinsya kun itandi sa mga ania na sa Bohol nga nagsuroy-suroy nga walay kasayoran nga natakdan na diay sa mga nagpositibo sa Coronavirus disease (Covid).
Sa pagkakaron, naa sa 2,052 ang aktibong kaso sa Covid sa lalawigan sa Bohol.
May kinatibuk-ang 12,191 ka recoveries o nangaayo na samtang 326 na ang namatay tungod sa maong sakit.
