Sinulat ni Elvira Bongosia
Nihatag ug katin-awan ang Department of Health (DOH) kalabot sa nikatap nga bidyo nga naghatag ug sayop nga impormasyon kalabot sa reyalidad sa Coronavirus disease (Covid) ug sa mga bakuna batok niini.
Subling giklaro sa DOH nga napamatud-an sa makuting pagtuon sa mga siyentipiko ug mga eksperto sa medikal ang tinuod nga presensya sa Covid sa kalibotan.
Ang Covid gideklarar sa World Health Organization (WHO) isip usa ka global pandemic. Gani, nadtong Sept. 20, 2021, may natalang 228,394,572 ka kumpirmadong kaso sa Covid diin 4,690,186 na ka tawo ang namatay tungod niini, base sa taho sa WHO.
Giklaro sa DOH nga walay kamatuoran nga ang pagbakuna makamatay. Ang bakuna sa Covid nga nahatagan ug Emergency Use Authorization (EUA) sa Food and Drugs Administration (FDA) luwas ug epektibo.
Dungan niini, giseguro sa buhatan ang ilang makuti ug mabinantayong pagtuon nga ang tanang bakuna nga atong gigamit karon sa nasud luwas, epektibo, ug makahatag ug tinuod nga proteksyon batok sa grabeng sakit nga dala sa Covid.
Gidugang pa sa DOH nga ang tanang pagtuon sa atong mga kaubang eksperto naka-base sa mga prosesong siyentipiko, ug nagsiguro sa atong kaluwasan sa kasamtangang panahon.
Ang bakuna batok sa Covid ug pagsunod sa minimum public health standard sama sa paggamit ug face mask magsilbing proteksyon alang sa atong pamilya.
Boluntaryo ug libre lamang ang pagpabakuna. Ang informed consent nga lagdaan lang ang gikinahanglan sa dili pa makakuha sa unang shot sa bakuna.
Gipahinumdoman sa DOH ang publiko nga kanunay e-beripika ang mga impormasyon nga makita online sa mga lehitimong tinubdan lamang.
