Sinulat ni Dave Albarado
Gipahigayon sa National Grid Corporation (NGCP), kagamhanang probinsiyal ug buhatan sa kongresista sa unang distrito ang groundbreaking sa Cebu-Bohol power transmission Interconnection project nga nahimutang sa barangay Punta Cruz, Maribojoc niadtong adlaw nga Huwebes, Dis. 9, 2021.
Sa ilawom sa dagat nga duol sa barangay Punta Cruz magsugod ang submarine cable nga mosumpay sa kable sa kuryente nga anaa sa ilawom sa dagat gikan sa Sugbo.
Sumala sa taho, nanguna sa seremonya sila si NGCP Senior Manager Henry Labrada, Provincial Administrator Kathyrin Fe Pioquinto sa ngalan ni Gob. Arthur Yap ug Bise Gob. Rene Relampagos, ug kanhi Board Member Abeleon Damalerio sa ngalan ni Cong. Edgar Chatto.
Ang kagamhanan sa lungsod sa Maribojoc gi representahan ni Bise Mayor Emilio Castilla sa ngalan ni Mayor Romulo Manuta.
Nunot niini, ang habig sa mga kontraktor nga Hapon, nga lakip sa seremonyas mao sila si Project Manager Koichi Hirata ug Project Director Yutaka Majima sa Sumitomo Philippines, Yasushi Usui sa Takashio Power International Corp., ug President Jess Achurra sa Subseatech.
Ang proyekto motabang ug tubag sa nagsakang panginahanglan sa kuryente sa Bohol sa umaabot nga katuigan.
Tumong usab sa proyekto ang kasaligan ug mosugakud nga suplay sa kuryente, ilabina na sa panahon sa katalagman.
Gikan sa Sugbo padulung nganhi sa Bohol, ikutay sa ilawom sa dagat ang 230 kilovolts (kv) nga submarine cable nga double circuit ug ang matag circuit adunay kapasidad ug 600 megawatts (mw).
Gikan sa power station sa barangay Punta Cruz, molatas pinaagi sa overhead transmission line 230kv double circuit ngadto sa NGCP substation didto sa Corella. Didto sa Corella itukod ang 230kv nga switchyard.
Matud sa mga taho, gilauman nga mahuman ang proyekto sa tuig 2023.
