Sinulat ni Elvira Bongosia
Karong ibalik na ang face-to-face set-up sa mga kolehiyo, gipahinumdoman sa Philippine Health Insurance Corporation (PhilHealth) ang mga estudyante sa paagi sa pagparehistro ug paghatag ug update sa ilang membership sa PhilHealth.
Kini human sa Joint Memo nga gipagawas sa Commission on Higher Education (CHED) ug Department of Health (DOH) nga nag-require sa mga estudyanteng 21 anyos pataas nga mobalik sa face-to-face nga klase sa pagparehistro sa PhilHealth o katumbas sa medical insurance.
Sa usa ka pahayag, miingon si PhilHealth Corporate Affairs Group Vice President Dr. Shirley Domingo mga mahinungdanon ang maong insurance aron masiguro usab nga protektado ang mga estudyante batok sa Coronavirus disease (Covid).
Giingong dili kumplikado ang pagparehistro tungod kay kinahanglan lang moduso ug duly accomplished PhilHealth Member Registration Form (PMRF) sa bisan asang PhilHealth office/branch. Magdala lamang ug birth certificate ug valid ID o school ID alang sa verification ug hulaton ang ID ug Member Data Record.
Matud pa nga wala usab angay ikabalaka ang mga estudyanteng wala pa’y katakos nga mag-contribute ug premium tungod kay mahimo silang mosulod sa ‘indirect contributors’ sa PhilHealth. Kini nagpasabot nga dawaton ang membership sa ilang mga ginikanan.
Subling gi-klaro sa PhilHealth nga dili pa kinahanglang mahimong primary member ang mga estudyanteng 20-anyos paubos.
