Sinulat ni Elvira Bongosia
Gipahinumdoman sa Commission on Elections (Comelec) ang tanang nisalmot sa 2022 national ug local elections, apil ang mga nag-withdraw, sa pagduso sa ilang Statement of Contribution and Expenditures (SOCEs).
Sa usa ka pahayag, miingon si Comelec Commissioner George Garcia nga dinhi mahibaw-an kun asa gikan ang pondong gigasto sa mga kandidato sa kampanya.
Matud pa ni Garcia nga pinaagi sa idusong SOCE, masayran usab sa katawhan ug sa Comelec kun nagbayad ba ug saktong buhis ang mga nisalmot sa piniliay sa ilang paggasto mismo sa kampanya.
Ubos sa Section 14 sa Republic Act 7166, matag kandidato ug treasurer sa political party kinahanglang moduso sa Comelec sa listahan sa tibuok, sakto ug itemized statement sa tanang kontribusyon ug gasto nga may kalabotan sa piniliay.
Kinahanglan kining iduso sa Comelec 30 ka adlaw human sa adlaw sa piniliay.
Nakalatid usab sa balaod nga dili makalingkod sa iyang pwesto ang bisan kinsang napiling kandidato hangtod di kini makaduso sa iyang SOCE.
Gipatuman usab kini sa mga political parties nga nagbutang sa mga nidaog nga mga kandidato.
