Sinulat ni Elvira Bongosia
Sukwahi sa naandan nga petsa kaniadto, ipahigayon na ang kompetisyon ug parada sa Saulog Street Dancing sa Abril 30 karong tuiga.
Sa gipahigayong tigom ug “Bisita Opisina” sa Association of United Development Information Officers (AUDIO)-Bohol niadtong Marso 23 nga gi-host sa City Government of Tagbilaran, gibutyag sa Public Relations Officer sa syudad nga si Fiel Angeli Araoarao-Gabin nga ang Saulog Tagbilaran 2023 karong tuiga puno sa mga mahinungdanong mga kalihokan.
Sa dili pa ang Saulog Street Dancing sa Abril 30, ipahigayon usab ang Mutya sa Tagbilaran sa Abril 22, Saulog Festival King and Queen sa Abril 26 ug ang Maoy sa Mayo Saulog Concert sa Mayo 1, 2023.
Gawas niini, ang selebrasyon magpasiugda usab sa mosunod nga mga kalihokan: Saulog Tennis Tournament gikan Marso 11 – Abril 16, 2023 sa CPG Sports Complex Tennis Court; Saulog Football Festival gikan Marso 25 – 26, 2023 sa CPG Sports Complex; ug Saulog Table Tennis gikan Marso 31 – Abril 2, 2023.
Dugang mga kalihukan naglakip sa Saulog Rapid Chess Tournament karong Abril 1 – 2, 2023 sa Island City Mall; Saulog Visual Arts Exhibit sa Abril 10 – 14, 2023 sa BQ Mall Atrium; Saulog Football Festival karong Abril 10 – 14, 2023 sa CPG Sports Complex; Victory Band: Praise and Worship Night sa Abril 14, 2023, sa Island City Mall; Saulog Airgun Competition sa Abril 15, 2023, sa Camp Bernido Shooting Range; Saulog Inklaban Tattoo Competition sa Abril 15, 2023, sa Island City Mall; Aquamania-Saulog Aquascaping Exhibit sa Abril 16 – 22, 2023 sa Island City Mall; Saulog Airsoft Competition sa Abril 16, 2023, sa Bool Covered Court; Saulog Singing Idol niadtong Abril 21, 2023, sa City Hall compound; Music Festival karong Abril 21-30, 2023 sa Tagbilaran City Old Airport; Basstrip Music Fest sa Abril 22, 2023, sa Galleria Luisa Mall Bay Parking; ug Saulog Volleyball Open Tournament sa Abril 22-23, 2023 sa UB/Saulog Gymnasium.
Samtang ang Himug Huni Interschool Songwriting Competition sa Bohol Cultural Center, Saulog Badminton sa Galleria Luisa, Saulog Got Talent sa City Hall compound ug Saulog Motorshow sa Island City Mall ipahigayon sa Abril 23, 2023.
Sa pagtapos sa buwan sa Abril, ipahigayon usab ang mosunod nga mga kalihokan sa Saulog: Saulog Fashion Show karong Abril 24, 2023, sa Bohol Cultural Center; Saulog Dance Expo sa Abril 24, 2023, sa compound sa City Hall; Abag Concert sa Abril 25, 2023, sa Bohol Cultural Center; Dagohoy Masonic Lodge No. 84 Centennial Night sa Abril 25, 2023, sa compound sa City Hall; Saulog Arnis Tournament karong Abril 27-29, 2023 sa BQ Mall; Seafront SEPO Night sa Abril 28, 2023, sa City Hall compound; DUEKSAM Night ug Saulog Motocross Race 2023 karong Abril 29, 2023.
Si Tagbilaran City Vice Mayor Adam Relson Jala mi-awhag sa mga miyembro sa AUDIO-Bohol nga gilangkoban sa mga information officers sa local government units ug national government agencies sa pagtabang sa pagpakatap sa mga kalihokan sa Saulog 2023 ug mga programa ug proyekto sa kagamhanan sa syudad sa Tagbilaran.
“We hope that pareho pod sa mga niaging mga katuigan, ato pod mahatagan ug promotion ang atoang event pinaagi sa atoang mga information officers sa different government agencies. Importante kaayo gyud nga naa mo to partner with us para mas successful ang event sa Saulog”, matud pa ni Jala.
Ang mga opisyal ug miyembro sa AUDIO-Bohol nahatagan usab ug guided tours sa mga project sites sa Tagbilaran City Government nga naglakip sa City Disaster Risk Reduction and Management Office diin gipahigayon ang Fire Safety Lecture sa Tagbilaran City Fire Station. Ang grupo nibisita usab sa Tagbilaran City College ug Tagbilaran City Garments Manufacturing Facility sa barangay Dampas.
Ang AUDIO-Bohol, usa ka hugpong sa mga information officers kun tigpamaba sa mga kalungsoran ug nasudnong ahensiya sa kagamhanan nga nia sa lalawigan sa Bohol.
Usa sa kalihokan sa AUDIO-Bohol ang ‘Bisita Opisina’ diin mobisita ang grupo sa mga buhatan sa ahensiya sa gobyerno ug mga munisipyo sa kalungsoran aron sa pagpahigayon ug diskusyon ug pagpasabot sa ilang mga programa aron matabangan sa grupo sa pagpakatap niini.
