BWUI nakapalit ug dugang nga BRAND NEW WATER TRUCK
Sinulat ni Victor L. Tambis
Ang hulagway sa wala nga dapit nagpakita sa bag-o nga WATER TRUCK sa Bohol
Water Utilities, Inc. (BWUI) atol sa blessing sa maong sakyanan; samtang ang
hulagway sa tu-o nga dapit nagpakita sa duha (2) ka mga WATER TRUCKS nga
gipanag-iya sa maong kompanya.
Sa pagpalambo sa serbisyo sa Bohol Water ngadto sa mga konsumidor, ang maong
Kompanya mipalit ug dugang usa ka unit “brand new” water truck aron magamit sa
panahon nga gikinahanglan ang pag hatud ug tubig ilabi na sa mga lugar nga
makasinati ug hinay ngadto sa walay agas ang tubig.
Ang maong water truck, diin ang capacity niini mosulod anaa sa 10 cubic meters o
10,000 liters, gipalit sa BWUI isip dugang sa nahaunang usa ka unit, nga ang capacidad
makakarga ug 12 cubic meters.
Matud pa sa General Manager sa BWUI nga si Christine Ranay, dako kaayo ang
ikatabang nga nadugangan ug usa ka unit ang water truck sa BWUI tungod kay
makatabang kini pagdeliver ug tubig ilabi na kon adunay mga lugar nga makasinati sa
hinay ngadto sa pagkawala sa tubig ug ingon man usab magamit pagdeliver ug tubig
panahon sa mga kalamidad.
Ang mga water truck sa BWUI modeliver usab ug tubig derecho ngadto sa mga
establisimyento nga nagkinahanglan sama sa hotel, restaurant, swimming pool ug uban
pang commercial ang katuyuan.
Alang kini sa mga nagkinahanglan ug daghan nga bul-og sa tubig diin aduna kini lahi
nga rate o taripa.
Sa dugang pakisayod mahitungod niini, mahimo kitang motawag sa mga numero sa
opisina sa BWUI nga mao ang mga mosunod: 412-3154 / 411-0210 ug cellphone #
09177208672.
BLCI nagpahibalo sa DISKWENTO sa KURYENTE alang sa mga senior citizens
Sinulat ni Sheryl B. Paga
Ang Bohol Light Company, Inc. buot magpahibalo ngadto sa atong mga konsumidor sa
kuryenta nga mga Senior Citizen sa pag-apply alang sa Senior Citizen Discount.
Usa kini ka programa sa gobyerno nga nagkinahanglan ug pormal nga applikasyon and renewal
matag tuig.
Ang diskwento sa Senior Citizen pinasubay sa Republic Act 9994 nga gitawag ug Expanded
Senior Citizen Act 2010.
Ang kwalipikado nga senior citizen nga makapahimulos sa programa mao kadtong mga
residensyal nga konsumidor kansang binuwan nga konsumo dili molapas sa 100 KWH. Sila
mao ang adunay katungod sa 5% nga diskwento sa ilang bayranan sa kuryente.
Aron maka-apply ug diskwento, ang senior citizen kinahanglang mosumite sa mosunod nga
mga kinahanglanon ngadto sa distribution utility:
- Birth Certificate aron pagmatuod sa insaktong edad ug citizenship;
- Sertipiko gikan sa Barangay aron pagmatuod nga kita nagpuyo sa maong lugar;
- Senior Citizen Identification Card (ID). Kung wala pa nakadawat ug Senior ID, pwde ra kitang
muhatag ug kopya sa bisan unsang Government Issued ID sama sa SSS id, Driver’s License,
Postal Id, PRC Card, etc.) - Ug kopya sa pinakabag-o nga electricity bill.
Kon ugaling dili mismo ang tagtungod ang mo proseso sa application, magdala ang tinugyanan
niining musunod:
- Valid identification card sa representante sa registered customer
- Authorization letter penermahan o thumb-marked sa senior citizen end-user na balido lamang
sulod sa us aka tuig gikan sa pagperma niini.
Ang kwalipikadong aplikante kinahanglan usab nga nahaum niining musunod nga mga
sitwasyon: - Ang tagsa-tagsa nga metro kinahanglan nga registered sa ngalan sa Senior Citizen nga
nagpuyo dinhi; - Ang binuwan nga konsumo kinahanglan nga dili molapas sa 100KWH;
- Ang maong pribiliyo gihatag lamang sa matag panimalay bisan unsa pa ang gidaghanon sa
mga senior citizen nga nagpuyo niini.
Ug tungod niini, ang Bohol Light Company, Inc. magadasig sa wala pa nakaparehistro, sa pag
apply na sa labing sayong panahon aron padayon kamo nga makapahimulos sa maong
pribilihiyo nga gimugna sa gobyerno.
Pagpanghatag sa PAFFF ipadayon sa usa buwan
Sinulat ni Rey Anthony Chiu
Ipadayon ang pagpang-apud-apod sa ayuda nga gitanyag sa Buhatan sa Presidente ngadto sa mga mag-uuma, mangingisda ug mga banay nga nagkalisud, hangtod pa sa usa ka buwan.
Kini maoy gibutyag ni Presidential Communications Office Task Force El Nino spokesperson Assistant Secretary Joey Villarama, didto sa media briefing kabahin sa Presidential Assistance to Farmers, Fisherfolk and Families (PAFFF).
Ang PAFFF usa ka matang sa ayuda sa presidente nga gipaagi sa Department of Agriculture (DA) ug alang sa mga nalista nga biktima nga mas nanginahanglan sa hinabang aron makasugakod pa sa sunod nga mga buwan human sa huwaw ug hangtud makabalik ang normal nga ani sa mga basakan ug mga baul.
Mismo si Presidente Ferdinand Marcos Jr ang personal nga mingtunol sa unang mga representasyon sa ayuda ngadto sa 7,634 ka mga Bol-anon nga banay nga napumbok nga angayan makadawat sa nahisgutang ayuda.
Niadtong Junyo 28, gitunol sa Presidente ngadto sa 10 ka mga Bol-anon ang tag P10 mil nga parte sa P50 milyones nga PAFFF nga gipahat sa Presidente alang sa mga Bol-anon.
Subay sa lagda sa Malakanyang, sanglit dili gyud maatul ug hatag sa president ang tanan nga nakalista nga benepisaryo sa us aka adlaw, kini tiwason sa pagpanghatag sa mga Local Government Units sa mga kalungsuran kay may dali kini mapapahigayon niini kay sa Kapitolyo.
Kahinumduman nga sa tungatunga nga bahin sa taas nga lanat sa huwaw, minghimo ang mga Municipal Agricultural Officers (MAO) sa kalungsuran sa pag-survey sa mga kadaut sa umahan ug mga pangisdaan, aron may ikataho kini ngadto sa DA.
Apan, sa pagkahuman sa adlaw nga gitagal aron makuha ang mga taho sa mga kadaut sa kalungsuran, 36 lamang sa 48 ka kalungsuran ug syudad sa Bohol ang mingduso sa listahan sa mga kadaut.
Kini nga listahan, giduso usab sa DA ngadto sa kaulohan, ug nagtangag na sa 22,000 ka mga pamilya nga apektado sa taas nga lanat sa init.
Didto sa kaulohan, ang DA mingtandi niining listahan sa Listahanan sa Department of Social Welfare and Development (DSWD) aron mangatangtang ug dili na madoble ang dawaton sa mga banay nga anaa sa duha ka listahan.
Kini usab nga listahan, mao nay gibasehan sa pagpanghatag sa ayuda. Ug possible nga kadtong mga kalungsuran nga wala mopasa sa gikinahanglang listahan sa mga nadaut ang pananum ug pangisda, dili maapil niining hinanang, unang pagpasabut ni DA Provincial Agriculture and Technology Center Officer Roman Dabalos, sa usa ka pagpakighinabi.
Gawas niining hinabang, may mga ahensya pa usab sa goberno nga nanghatag ug mga ayuda sama TUPAD sa Department of Labor and Employment, Ayuda sa Kapus ang Kita sa Department of Social Welfare and Development, mga scholarships ug starter kits sa Technical Education and Skills Development Authority, Pangkabuhayan sa Pagbangion at Ginhawa sa Department of Trade and Industry ug daghan pa.
Alang sa mga wala pa makadawat sa ilang hinabang, mahimong moadto una sa inyong mga barangay halls aron mapiho kon nahilakip bas a lista nga may PAFFF.
USA KA BUWAN PA. Gipasabut ni Asec Villarama sa PCO nga moabut pa sa usa ka buwan ang pagpang-apud-apod sa PAFFF kay dili gyud kini mahuman sa usa lamang ka adlaw. (Hulagway gikan sa PIA-Bohol)
Mabini-Cayacay hapit na mahuman – PBBM
Sinulat ni Rey Anthony Chiu
Sa dili madugay, magamit na ang P725 milyones nga pasilidad sa patubig nga posibleng maka-alagad sa 500 ka ektarya nga basakan ug makatabang sa 320 ka mga mag-uuma sa Mabini ug Alicia Bohol.
Kini maoy maayong balita nga gipadayag ni Presidente Ferdinand Marcos Jr., atul sa ilang labing una nga state visit sa Bohol human siya mapili nga president.
Pasilidad nga magkuha sa iyang tubig nga pundo gikan sa sapa sa Baujanan ug Cawasan, ang Mabini-Cayacay Small Reservoir Impounding Project (SRIP) gitagana unta mga humanon silod sa duha ka tuig lamang apan sukad gisugdan niadtong Mayo 2017, molanat pag lima ka tuig aron kini pormal na nga magamit.
Kini usab sanglit naabtan sa pandemya, ang pagtukod gipa-oktaba una dala sa kalisud sa pagpatabok sa mga kagamitan niini, ilabi na kay may plano usab sa dugang ekspansiyon sa pasilidad.
Kon mabuksan na, kini nga pasilidad makatabang sa mga mag-uuma sa Barangays Abaca, San Roque, Cabidian ug Aguipo sa Mabini ug may pipila usab ka barangay sa Alicia nga makabenepisyo niini, matud pa ni kanhi National Irrigation Administration Bohol Engr Modesto Membreve.
Segun sa desinyo, ang Mabini-Cayacay SRIP may 9.5 kilometro kwadrado ug gidesinyo nga makapapundo sa 3.09 million cubic meters.
Gipanglantawan usab kini nga gamiton, dili lamang sa pagpatubig sa basakan, apan usab sa pagpamuhi ug isda sa tab-ang, pagpugong sa pagpabah ug uban pang kagamitan sama sa kalingawan.
Gipadayag usab sa mga NIA engineers nga ang Mabini Cayacay SRIP may mga dugang pang service areas kon kini mapalapdan pa.
Matud sa Presidente, ang kagamhanan dili gayud mo-undang sa pagpaningkamot aron lamang mahatag ang mga pangandoy sa katawhan.
UBAYANON NGA NAKALAMANO SA PRESIDENTE. Si Zosimo Palacan, taga Ubay, usa sa mga mag-uuma nga nakadawat sa P10 mil nga ayuda, ug matud niya, kini iyang gamiton sa pagpaayo sa iyang balay nga naguba sa bagyong Odette, tulo na ka tuig ang nakalabay. Matud ni Palacan, mas maayo na karon nga panahon sa mga mag-uuma kay may tabang ang goberno sama sa makinarya, binhi, abuno ug bisan pa sa pagpamalit sa ani. (Hulagway gikan sa PIA-Bohol)
IpoNalo gilusad sa LandBank alang sa ilang mga depositors
Sinulat ni Elvira Bongosia
Ang Land Bank of the Philippines (LandBank) nilusad ug bag-ong promo nga maghatag ug kahigayonan sa mga depositor nga makadaog ug hangtod sa P1 milyon nga cash ug gadgets pinaagi sa pagpatubo sa ilang tinigom sa bangko.
Ang mga kustomer mahimong makakuha ug e-raffle ticket ug makaapil sa LandBank IpoNalo raffle promo pinaagi sa pagdugang sa ilang deposito sa ilang LandBank accounts gikan Hulyo 3, 2024 hangtod sa Enero 31, 2025.
Ang LandBank mopili ug usa (1) ka mananaog pinaagi sa electronic raffle alang sa matag major cash prize nga P1 milyon alang sa grand prize ug P500,000.00 ug P250,000.00, isip 2nd ug 3rd prizes, matag usa.
Ang mga minor prizes naglakip sa iPhones, iPads ug Macbook Airs, nga adunay 36 ka mananaog matag usa.
Kini nga kampanya nagtumong sa paghatag ug gahum sa mga kliyente sa bangko sa pagpraktis sa responsable nga mga pamatasan sa pinansyal ug pagtukod sa pinansyal nga seguridad aron matabangan nga makab-ot ang ilang pinansyal nga mga katuyoan nga mas paspas.
Ang promo sa LandBank nga IpoNalo magamit alang sa bag-o ug kasamtangan nga mga kliyente nga adunay LandBank accounts, sama sa regular nga passbook ug ATM savings account, dollar savings account, regular ug interest-bearing current account, Easy Savings Plus (ESP), OptiSaver Account, Green Growth Account, High Yield Savings Account (HYSA), ug peso o dolyar nga time deposit account.
Ang indibidwal nga mga depositor makadawat ug usa (1) ka e-raffle ticket sa matag incremental average daily balance (ADB) nga P100,000.00.
Samtang ang private institutional depositors makadawat ug usa (1) ka e-raffle ticket sa matag incremental ADB nga P1,000,000.00.
Ang mga partisipante kinahanglan nga magpadayon sa ilang ADB hangtod sa katapusan sa promo period sa Enero 31, 2025 aron magpabilin nga kwalipikado alang sa e-raffle draw sa Pebrero 14, 2025.
Patuboi ang inyong tinigom sa LandBank ug pagbaton ug kahigayonan nga makadaog hangtod sa P1 milyon nga cash, ug uban pang kulbahinam nga premyo sama sa iPhones, iPads, ug Macbook Airs. Pag-angkon ug daghang e-raffle nga mga tiket kutob sa inyong mahimo hangtod sa Enero 31, 2025, alang sa dugang kahigayonan nga makadaog sa raffle draw sa Pebrero 14, 2025. (Hulagway gikan sa LBP/PIA)
BALAK
NAHANAW DAW ASO
Sinulat ni Engr. Rogelio Podelino
Matag linalang ni kalibutan adunay pangandoy
Kayod sa husto dili balihon ang kakapoy
Tinguha niya nga kaugmaon mousbaw
Moasenso sa kinabuhi ang iiyang panglantaw
Tanang kinitaan iyang guihipos
Aron sa kapobrehon dili siya magapos
Guipanglimbasogan sa adlw’ng tanan
Kakugui sa gimbuhaton ang pohonan
Wala’y adlaw nga iyang gui-usikan
Katapul sa buluhaton wala sa alimpatakan
Panginabuhi sa kanunay maoy naghari
Haruhay sa kaugmaon iyang guimithi
Mi-abot na ang adlaw sa iyang katumanan
Usa na siya karon ka adunahan
Guikaibgan sa kadaghanan sa mga tawo
Patigayon nidaghan ug labihan pag-asenso
Usa ka butang ang iyang hikalimtan
Nalimot siya sa pagsimba sa AMAHAN
Sa labihan niyang pag-atiman sa patigayon
Nawala ang pagsimba matag Domingo dayon
Wala niya damha may dakung mahitabo
Miulbo ang dakung kalayo mora’g guibubo
Dakung sunog wala matabang sa bumbero
Tanang katigayonan NAHANAW DAW ASO