DMW-7 nag-awhag sa mga namalik nga babayeng OFWs sa pagnegosyo
Sinulat ni Elvira C. Bongosia
Ang Department of Migrant Workers Region 7 (DMW-7) nag-awhag sa mga namalik nga mga babayeng overseas Filipino workers (OFWs) sa Central Visayas nga himoon ang ilang mga ideya sa negosyo ngadto sa malungtarong panginabuhian pinaagi sa Likhang Kababaihan 2026 Business Plan Competition.
Ang kompetisyon nagtanyag ug tunga sa milyon nga grant sa mananaog nga proposal ug mahimong kabahin sa reintegration program sa gobyerno alang sa kababayen-an nga OFWs nga nakahukom nga mopuyo na ug permanente sa Pilipinas.
Ang DMW-7 miingon nga ang inisyatiba nagtumong sa pagtabang sa mga namalik nga babaye nga OFWs sa pagtukod ug mga negosyo nga makamugna ug kita ug mahimong aktibong mga tigtampo sa lokal nga kalamboan sa ekonomiya.
Ang kompetisyon bukas sa mga babayeng OFW nga mibalik sa nasod sa o sa wala pa ang Disyembre 30, 2021; wala nagpanag-iya o pagpadagan sa bisan unsang pormal o rehistradong negosyo sa Pilipinas; wala na moadto sa gawas sa nasud alang sa trabaho; ug karon permanente na nga nagpuyo sa nasud.
Ang mga interesadong aplikante kinahanglang mosumite sa ilang mga entries online pinaagi sa LIKHA application portal sa o sa dili pa ang Enero 31, 2026.
Ang mga aplikante gikinahanglan nga makompleto ug mag-upload sa mosunod nga mga dokumento: accomplished application form; gilagdaan nga declaration form; kopya sa ilang passport or travel document; proof of latest arrival; Business Model Canvas; ug barangay certification nga nagpahayag nga walay business o negosyo nga na-rehistro ubos sa pangalan sa aplikante ug ang aplikante dili kauban sa bisan unsang negosyo.
Ang programang Likhang Kababaihan nagtumong sa pagpalig-on sa partisipasyon sa ekonomiya sa kababayen-an pinaagi sa paghatag sa mga namalik nga OFW ug mga oportunidad sa pagpalambo sa kahanas sa pagnegosyo, pagmugna ug lokal nga trabaho, ug pagsuporta sa paglambo sa komunidad.
Ang mga kwalipikado nga mga aplikante mahimong maka-access sa portal sa aplikasyon pinaagi sa: https://sites.google.com/dmw.gov.ph/likha-ofw/home.
Gi-awhag sa DMW-7 ang mga kwalipikadong babaye nga OFWs sa Central Visayas sa pag-apply ug pagsumite sa ilang mga entries sa dili pa ang deadline.
Gi-awhag sa DMW RO-VII ang tanang mga babayeng OFWs dinhi sa Region-7, ilabi na kadtong adunay lig-ong business plan ideas sa pagsalmot ug pag-sumiter sa ilang mga entries. Ang mga kwalipikado nga mga aplikante mahimong maka-access sa portal sa aplikasyon pinaagi sa: https://sites.google.com/dmw.gov.ph/likha-ofw/home. (Hulagway gikan sa DMW-7)
31 ka mga COS sa DA migradwar sa Expanded Basic Agri Extension Course
Sinulat ni Elvira C. Bongosia
Kinatibuk-ang katloan ug usa (31) ka mga contract of service (COS) sa Department of Agriculture-Central Visayas (DA-7) nga mingsalmot sa programang Deployment and Advancement of the Responsive Extension on Agricultural for Community Holistic Development (DA-REACH) ang andam nang ipakatap sa mga kalungsoran human sila migradwar sa Expanded Basic Agricultural Extension Course.
Ang maong 31 ka mga COS gibansay sa Agricultural Training Institute Region 7 (ATI 7), sulod sa 22 ka adlaw sugod niadtong Disyembre 1-12, 2025 ug Enero 12-22, 2026, diin migradwar sila niadtong Enero 23.
Tumong sa pagbansay nga mapalambo ang kapasidad sa mga COS, isip kabahin sa ilang preparasyon sa DA-REACH.
Apil sa ilang kalihokan ang pagpresentar sa Stakeholders’ Needs Assessment (SNA), nga magsilbing basehan sa paghimo sa Area Specific Action Plan (ASAP).
Ang ASAP naglatid sa nagkalain-laing mga problema nga giatubang sa sektor sa agrikultura ug sa mga mag-uuma sa matag lugar, nga mahimong basehan sa angay nga aksyon ug interbensyon sa DA.
Makahuloganon ang ilang pag-gradwar tungod kay gitambongan kini sa mga kadagkuan sa nasudnong buhatan sa DA-Central Office ug ATI ug sa DA-7.
Gisaysay ni Atty. Asis G. Perez, Undersecretary for Policy, Planning, and Regulations sa DA Central Office, ang kamahinungdanon sa hustong pag-ila ug pag-assess sa tanang stakeholders sa mga lugar nga pagadeployan isip kabahin sa ASAP alang sa kalambuan sa mga mag-uuma.
Gitumbok usab niya ang mga estratehiya sa DA, lakip na ang kamahinungdanon sa pagpalig-on sa agricultural extension services.
Tumong sa ahensya ang pag-rebuild ug pagscale-up sa usa ka modernong agricultural extension system nga maghatag ug polisiya, teknolohiya, ug market support sa mga umahan sa tibuok nasod pinaagi sa digital tools, technical assistance, ug koordinadong pakigtambayayong sa mga local government units (LGUs), pribadong sektor, ug academe aron mapalambo ang produktibidad, kalig-on, ug kita sa mga mag-uuma.
Samtang mipadayag ug pasalamat si DA7- Regional Technical Director for Operations Division, Engr. Cirilo Namoc sa DA-ATI 7 sa paghatag sa gikinahanglan nga kahibalo ug kahanas sa mga kawani sa DA7.
Mipasalamat usab siya sa mga COS sa pagdawat sa hagit ug sa ilang dedikasyon sa pagserbisyo alang sa kalambuan sa sektor sa agrikultura.
Ang mga migradwar kauban sa mga opisyal sa DA ug ATI-7 niadtong Enero 23 sa Panda Tea Garden sa syudad sa Tagbiran. Human sa pagtapos sa Expanded Basic Agricultural Extension Course, ang mga gradwado gilauman nga estratehikong ipakatap sa mga lungsod, diin sila makatabang sa pagbalhin sa mga teknolohiya ug kahibalo sa mga mag-uuma ug mangingisda, nga makatampo sa pag-uswag sa produktibidad sa uma, seguridad sa pagkaon, ug pag-uswag sa kabanikanhan. (Hulagway gikan sa ATI-7 photo)
21 ka mga tambal ubos sa YAKAP nagpabiling ma-akses
Sinulat ni Elvira C. Bongosia
Ang Philippine Health Insurance Corporation (PhilHealth) nagpasalig sa publiko nga ang 21 ka importanteng tambal ubos sa Yaman ng Kalusugan Program (YAKAP) padayong magamit karong tuiga sa YAKAP-accredited primary care facilities sa tibuok nasod.
“Makakaasa po ang lahat ng Pilipino na patuloy silang makakakuha nitong 21 na mga gamot sa kanilang napiling YAKAP Clinic, habang mas lalo naming pinagbubuti ang mga benepisyo ng PhilHealth YAKAP at GAMOT,” matud pa sa giluwatang pahayag ni Dr. Edwin M. Mercado, PhilHealth President ug CEO.
Ang listahan naglakip sa Amoxicillin, Co-amoxiclav, Cotrimoxazole, Nitrofurantoin, Ciprofloxacin, Clarithromycin, Oral Rehydration Salts (ORS), Prednisone, Salbutamol, Fluticasone + Salmeterol, Paracetamol, Gliclazide, Metformin, Simvastatin, Enalapril, Losarthiazipinerol, Losarthiazipinerol Aspirin, ug Chlorphenamine.
Ang mga miyembro mahimong magpadayon sa pag-access niini nga mga tambal pinaagi sa akreditado nga YAKAP nga mga klinika diin sila giubanan, pagsiguro sa tukma sa panahon nga pagtambal ug pagpadayon sa pag-atiman.
Gipahinumdoman usab sa PhilHealth ang mga partner nga YAKAP providers nga maghupot ug igong stocks sa mga covered medicines ug magmintinar sa service standards ubos sa programa.
Gipasalig sa PhilHealth nga padayon ang ilang paningkamot nga paayohon pa ang paghatod sa ilang serbisyo pinaagi sa padayon nga pakig-alayon sa mga YAKAP providers aron padayon pang magbaton ug kalinaw sa hunahuna ang tanang Pilipinong naglaum sa PhilHealth.
Aron makakuha ug libreng tambal pinaagi sa YAKAP program sa PhilHealth, kinahanglang magparehistro sa YAKAP Clinic, magpakonsulta ug electronic nga reseta gikan sa doktor sa YAKAP, ug dayon mo-claim sa giresita nga generic nga mga tambal sa accredited nga PhilHealth GAMOT nga botika, nga nagpakita sa imong ID ug sa prescription code nga libre hangtod sa P20,000 matag tuig.
Gipasalig sa PhilHealth nga padayon ang ilang paningkamot nga paayohon pa ang paghatod sa ilang serbisyo pinaagi sa padayon nga pakig-alayon sa mga YAKAP providers aron padayon pang magbaton ug kalinaw sa hunahuna ang tanang Pilipinong naglaum sa PhilHealth.
PNP Loon giila isip Best Municipal Police station sa tibuok nasod
Sinulat ni Elvira C. Bongosia
Ang Loon Municipal Police Station giila isip Best Municipal Police Station (National Level), Class B Category atol sa PNP Day Celebration 2026 nga gipahigayon sa Camp Rafael T. Crame, sa syudad sa Quezon adlaw’ng Huwebes, Enero 29, 2026.
Ang award gidawat sa Hepe sa Pulisya sa Loon, Police Captain Thomas Zen Cheung gikan ni Executive Secretary, Ralph G. Recto, Police General Jose Melencio C. Nartatez Jr., Hepe sa Philippine National Police, ug DILG Secretary, Jonvic Remulla.
Ang PNP miila sa mga outstanding officers, personnel ug stakeholders kansang epektibong serbisyo, liderato ug pasalig sa kalinaw ug kahusay nakahatag ug makahuluganon nga resulta sa ground ug elevated nga mga sumbanan sulod sa ilang mga unit.
Kini nga pag-ila pagmatuod sa kamaayo, disiplina, ug propesyonalismo sa Loon PNP sa tanang aspeto sa serbisyo sa kapulisan, nga nagtakda sa sumbanan sa epektibo ug dekalidad nga serbisyo sa kapolisan sa tibuok nasod sulod sa ilang kategorya.
Ang PNP Loon miila usab niining talagsaon nga kalampusan nga nahimong posible pinaagi sa lig-on nga liderato ug makanunayon nga paggiya ni PBGEN Redrico A. Maranan, Regional Director, ug PCOL Patricio C. Degay, Provincial Director, kansang panan-awon, estratehikong direksyon, ug makanunayon nga suporta nagpadayon sa pagdasig sa operational excellence, disiplina, ug propesyonalismo sa mga han-ay.
Kauban usab niini nga kalampusan ang padayon ug dili matarug nga suporta sa local government unit sa Loon, inubanan sa aktibong kooperasyon ug makahuluganong partisipasyon sa katawhan sa lungsod.
Ang ilang pakigtambayayong sa PNP Loon sa kampanya batok sa kriminalidad ug sa pagpatuman sa mga programa ug mga inisyatibo sa kapulisan mahinungdanon sa pagpatunhay sa kalinaw, kahapsay, ug kaluwasan sa komunidad.
Gidawat ni Police Captain Thomas Zen Cheung, Hepe sa PNP Loon ang award nga Best Municipal Police Station gikan ni Executive Secretary Ralph G. Recto atol sa PNP Day Celebration 2026 nga gipahigayon sa Camp Rafael T. Crame, sa syudad sa Quezon niadtong Huwebes, Enero 29, 2026. (Hulagway gikan sa screen grab sa RTVM)
BALAK
ANG BALAY DANGPANAN
Sinulat ni Engr. Rogelio Podelino
Sa atong katilingban karon Nagkuyanap ang bisyo sa mga batan-on
Kinahanglan nga madali kini pagpakgang
Dautang bisyo sa mga batan-on maundang
Nagkadaiyang bisyo sa mga batan-on
Labihan kalabad sa ulo hunahuna-on
Mga namunoan nangita ug paagui
Unsaon pagsugpo sa ilang kalaki
Mga batan-on guipahimuslan sa syndikato
Sila ang padalhon sa droga nga sekreto
Aron kapulisan dili mahibalo
Tighatud sa droga maoy ilang trabaho
Aron masulbad ang suliran sa katilingban
Kinahanglan motabang tanang katawhan
Santa-on dautang bisyo sa mga batan-on
Guinikanan ilang mga anak suhitohon
Dad-on tanang batan-on nga nagbisyo
Tudloan sila sa pamatasang maayo
Tug-anan sa linugdangan bahin sa droga
Hatagan sa higayon makabalik pag-eskwela
May panahon pa kabatan-onan magbag-o
Guiyahan pag-ayo aron mosalig ug husto
Mga tawo nagsakripisyo gapahigayon tanan
Didto sa: ANG BALAY DANGPANAN