Sinulat ni Elvira Bongosia
Nipasidaan ang National Privacy Commission (NPC) sa publiko kalabot sa “smishing” o matang sa phishing nga ginahimo pinaagi sa text message.
Sa gipahigayong Laging Handa briefing, gi-awhag ni NPC Commissioner Raymund Liboro ang publiko nga dili i-click ang link sa text nga ipadala sa dili iladong numero.
Matud pa ni Liboro nga kining smishing paagi sa mga hacker nga magpadala ug mensahe via SMS ug kini adunay mga link nga kun i-click, dalhon sa usa ka website nga mahimong pangutan-an ug dugang pang impormasyon, apil na ang bank account number ug mga password nga maoy magdala ug lain-laing problema apil na ang pagsulod sa bank account ug hutdon nila ug kuha ang tinigom nimo sa bangko.
Gitutokan na sa NPC ang mga report kalabot sa phishing sa mga numerong nakuha sa contact tracing forms.
